husain nam hai ek raushni ke paikar ka
husain fikr-e-bashar ki azim manzil hai

husain sina-e-insan mein jagta dil hai
husain sirf kisi ek bashar ka nam nahin

husain ek alamat hai zindagi ke liye
husain azm-e-safar hai musafiron ke liye

husain zist ke tapte hue bayaban mein
hai qafilon ke liye ek ghane darakht ka nam

hai be-kason ke liye quwwat-e-amal ki misal
fasurda phulon ke daman pe misl-e-shabnam hai

husain zist ka ek ba-waqar parcham hai