ilm-o-adab ko sikho bachcho
ilm ki kyari sincho bachcho

jis ko hai hasil ilm ki daulat
kyon na ho us ki har-ja izzat

ilm se adna bhi ho aala
zarra bhi ho jae parbat

ilm-o-adab ko sikho bachcho
ilm ki kyari sincho bachcho

ilm na ho bekar hai jiwan
ilm hai har insan ka darpan

khalq hai moti ilm sadaf hai
ilm-o-adab se jag hai raushan

ilm-o-adab ko sikho bachcho
ilm ki kyari sincho bachcho

ilm ki hai kya shan nirali
dur ho us se kham-khayali

dekh 'samia' baghon mein ja kar
padhti hain chidiyan dali dali

ilm-o-adab ko sikho bachcho
ilm ki kyari sincho bachcho