zindagi ke gham-o-alam se takrane de
dard ban kar mujhe ehsas pe chha jaane de

do qadam aur hain manzil pe pahunch jaane de
phir teri bazm mein aaunga ghazal-khwani ko

chand lamhe meri khatir se sahi aur thahar
dard ke saye mein palti hai tamna-e-hayat

khun milta hai to lau deti hai kuchh sham-e-hayat
ek tamasha hai sar-e-dar ba-unwan-e-hayat

zindagi ko nae unwan se saja lene de
chand lamhe meri khatir hi sahi aur thahar

ab bhi afkar pe pahra hai siyah-karon ka
soch sakte hain magar jurat-e-taqrir nahin

hijr ki aag mein jalta hai tamanna ka shabab
meri taqdir hai jalna teri taqdir nahin

chand lamhe meri khatir se sahi aur thahar
ab bhi kante hain mohabbat ki guzargahon par

ab bhi har rah pe rahzan hain ba-shakl-e-rahbar
ab bhi shair ke muqaddar mein hai be-nur sahar

ab bhi mauqa hai zara soch mere sath na aa
chand lamhe meri khatir se sahi aur thahar

sath chalti hai to kanton se guzarna hoga
kasa-e-dil gham-o-alam se bharna hoga

saya-e-dar-o-rasan mein bhi sanwarna hoga
chand lamhon ke liye khud ko pareshan na kar

shab ko pahuncha ke sahar tak main chala aaunga
chand lamhe meri khatir se sahi aur thahar