aao kuchh der to baith kar
rishta-e-lafz-o-mani ki tajdid ho

is junun-khez pani ke tufan mein
jaane kashti salamat rahe na rahe

hum rahen na rahen
tum raho na raho

kale kaghaz ki tahrir rahne bhi do
lo ye qirtas-e-abyaz hai is ko padho

hum gae chand par us ka qissa suno
saghar-e-mah mein phul pine ki baaten karo

lal pili shuaon pe ho tabsira
sina-e-arz se mah-pare nikala karo

kale kaghaz ki tahrir rahne bhi do
aao kuchh der to baith kar

rishta-e-lafz-o-mani ki tajdid ho