khule nile aakash ki katran
pairahan-e-khwab ki dhajjiyan

shisha-e-dil dil ki kirchiyan
reshmi jismon ki utran

dastan-e-ishq ke pareshan auraq
visal-e-yar ke kate-phate aur basi akhbar

ruswai ki diwaron ke gande ishtihaar
maila kuchaila dard

phata purana firaq
husn-o-ranai ke shikasta jam

bhule-bisre nam
gahri kali aankhon ke bujhe charagh

daman-e-yaad ke bad-numa dagh
sari chizen behis duniya ne

mujh ko kude-dan samajh kar
mere andar

dal di hain