shikasta ghar hai
dahakte aangan mein sin-rasida shajar ke patte bikhar chuke hain

parindagan jo yahan chahakne mein mahw rahte the
khamushi ki silon ke niche dabe pade hain

silen jo ghar ki udhadti chhat se kalam kartin to raushni ko qarar milta
qarar jis ne bujhe charaghon ki hairaton ko sabaat bakhsha

ufuq se aage
hamare hilon

fareb dete hue bahanon ki qadr kam thi
so hum baqa se fana ki jaanib palat rahe hain

khamir-e-adam hai istiara shikastagi ka
khala se bahar hamare hone ki kahkashaen

sarak rahi hain