madar-e-hind ke fankar the mirza 'ghaalib'
apne fan mein bade hushyar the mirza 'ghaalib'

aap ka nam asadullah tha nau-shah laqab
mirza ghaalib se hue baad mein maruf-e-adab

aaj bhi padh ke kalam aap ka hairat mein hain sab
zulf-e-urdu mein giraftar the mirza ghaalib

madar-e-hind ke fankar the mirza ghaalib
akbarabad mein paida hue dehli mein rahe

ahd-e-tifli hi se duniya ke bade zulm sahe
ab bhi har ahl-e-sukhan aap ko ustad kahe

sare shoara ke alam-dar the mirza ghaalib
madar-e-hind ke fankar the mirza 'ghaalib'

tang-dasti mein bhi chhoda na wafa ka daman
muflisi mein bhi na apnae khushamad ke chalan

khun-e-jazbaat se shadab kiya bagh-e-sukhan
fitratan shaer-e-khuddar the mirza 'ghaalib'

madar-e-hind ke fankar the mirza ghaalib
aap par farsi shoara ka bhi tha khub asar

masala khidmat-e-urdu ka bhi tha pesh-e-nazar
apne ashaar ki azmat se bhi waqif the magar

'mir' ji ke bhi taraf-dar the mirza 'ghaalib'
madar-e-hind ke fankar the mirza 'ghaalib'

khat-nawisi ka diya ek anokha andaz
gunj uthi bazm-e-adab mein ye nirali aawaz

aap maidan-e-sukhan mein bhi the sab se mumtaz
sath hi ek bade nassar the mirza 'ghaalib'

madar-e-hind ke fankar the mirza 'ghaalib'
be-niyaz-e-gham-o-alam har ek fikr se dur

ho musibat mein bhi rahte the hamesha masrur
aaj bhi jin ke latife hain jahan mein mashhur

muskuraate hue kirdar the mirza 'ghaalib'
madar-e-hind ke fankar the mirza 'ghaalib'