radio ne das baje shab ke khabar di id ki
aalimon ne raat bhar is news ki tardid ki

radio kahta tha sun lo kal hamari id hai
aur aalim kahte the ye ghair-sharai id hai

do dhadon mein bat gae the mulk ke sare awam
us taraf sab muqtadi the is taraf sare imam

beta kahta tha ki kal shaitan roza rakkhega
bap bola tera abba jaan roza rakkhega

beta kahta tha ki main sarkari afsar hun janab
roza rakkhunga to mujh se manga jaega jawab

bap kahta tha ki phir yun baam par iman ke chadh
roza bhi rakh aur roze mein namaz-e-id padh

aaj kitna farq ful stop aur comme mein tha
bap ka roza tha beta id ke jame mein tha

ikhtilaf is baat par bhi qaum mein paya gaya
chand khud nikla tha ya jabran nikalwaya gaya