sozish-e-gham ka bayan lab pe na laun kyunkar
dard hai had se siwa dil mein chhupaun kyunkar

tu yahin dost mere gham ka mudawa kar de
chot jo dil pe lagi hai wo dikhaun kyunkar

kaise dohraun gham-e-zist ke afsane ko
sunne wala na koi ho to sunaun kyunkar

raushni hoti nahin mere siyah-khane mein
sham-e-dil ab shab-e-hijran mein jalaun kyunkar

silk-e-anjum hain teri yaad mein aansu ab tak
tere daman ko sitaron se sajaun kyunkar

jab ke tinke ka sahaara bhi nahin hai 'nashad'
apni kashti ko talatum se bachaun kyunkar