aadmi kis ka eatibar kare
jab mohabbat hi ko dawam nahin

wo mohabbat bhi kya mohabbat hai
chaar din bhi jise qayam nahin

kashmakash-ha-e-zindagani se
rishta ulfat ka tut jata hai

chand lamhon ki bad-gumani se
sath barson ka chhut jata hai

zud-ranj aadmi ki fitrat hai
aur matlab-parast ahl-e-jahan

waqiat-e-jahan mein sang-ba-dast
aur dil kargah-e-shishagaran

kya tajjub hai phir agar is ne
kar diya mahw ahl-e-ulfat ko

ye wafa ka meri sila bakhsha
bhul baithe meri mohabbat ko

zindagi bhar nibah ke wade
umr bhar ki wafa ke qaul-o-qarar

aah na-paedar the kitne
jaise zulmat mein hon numud-e-sharar

phir bhi us ki taraf se ai hamdam
mere dil mein koi ghubar nahin

jaanta hun ki ek haalat par
gardish-e-charkh ko qarar nahin

kar chuka hun muaf use dil se
phir bhi ek pech-o-tab hai mujh ko

dil ko samjha chuka hun main lekin
zindagani azab hai mujh ko

apni khuddari-e-wafa ki qasam
nahin rona gham-e-judai ka

us ki masumi-e-ada ki qasam
nahin gham us ki bewafai ka

han magar is jahan se hun bezar
jis mein mehr-o-wafa ka nam nahin

chand roza hayat se hasil
jab mohabbat hi ko dawam nahin