shairi mein na kabhi shikwa-e-ruswai kar
apne ashaar ki tu khud hi pazirai kar

tere viran shab-o-roz bhi rangin honge
bas kisi tarah hasinon se shanasai kar

jo marizan-e-mohabbat hain ghamon ke mare
un ki ashaar-e-zarafat se masihai kar

pet ki aag bujha mehnat-o-mazduri se
waqt bach jae to mashq-e-sukhan-arai kar

bhul kar ishq ka sauda na sama le sar mein
aur majnun ki tarah khud ko na saudai kar

apni tanhaiyan yaadon se darakhshan kar le
phir tasawwur mein sahi anjuman-arai kar

aajizi aur na aansu na fughan shamil hai
kuchh to fariyaad ko tu qabil-e-shanwai kar

waqt ke sath tera dil bhi bahal jaega
le ke kaghaz-o-qalam qafiya-paimai kar

apne mashuq ke khwabon mein chala ja har shab
'khwah-makhwah' yun bhi ilaj-e-gham-e-tanhai kar

aur agar chahe ki ho 'khwah-makhwah' shohrat teri
yusufi gar nahin mumkin to zulekhai kar