tesha-e-karb kandhon pe rakkhe hue
kohkan be-aman phir rahe hain yahan

khwahishon ke diye
sab dhuan ho gae

wo jo mazi ke chamkile auraq the
un pe likkhe hue git gum ho gae

khwab ki bastiyon mein koi sar-phira
apni palkon se taqdir gadhta raha

aur tarikiyan munh chhupae hue
haal-e-rafta pe aansu bahati rahin

pastiyon ke safar se palatte hue
dhul udate hue rath pareshan hain

yun bulandi se khaif bhala kyun hue
ye musafir sabhi

oxigen se dam un ka ghutta hai kyun