palkon pe gham-e-hijr ke sab dip jalae
nindon ke shabistan mein bhaari meri aankhen

kahun to kya main kahun pyari pyari aankhon ko
subu kahun ki surahi tumhaari aankhon ko

kuchh aisa chhaya hai dil par mere ghubar-e-alam
gulon ke sae bhi lagte hain bhaari aankhon ko [...]

raat taswir numudar hui aankhon mein
subh ke samne diwar hui aankhon mein
matla-e-dil pe phir ek chand pighal jaega
aaj ek tez chamak khar hui aankhon mein
aa tujhe lal karun zard-rukhi bint-e-khizan
surkh sailab ki yalghaar hui aankhon mein

tujh se hi kya wafa ki nahin khush-nigah chashm
jitne safed-posh hain sab hain siyah-chashm
us mehr-wash ke hone na de girya ru-ba-ru
jab tak safed howe na manind-e-mah chashm
andher hai dayar-e-mohabbat mein ham-daman
taqsir dil ki thahre kare jo gunah chashm
donon makan ghair se khali hain aa ke baith
tere pasand khwah ye dil aae khwah chashm
us ki shab-e-firaq mein itna tu ro ki ho
dariya-e-ashk mein teri kashti tabah chashm
mujh ko jala ke khak kya aur baha diya
tum se to ye na thi mujhe ai ashk-o-ah chashm
'joshish' wo kaun sa hai jafa-kar jis par aaj
munh par lahu male hue hai dad-khwah chashm

'mir' un nim-baz aankhon mein
sari masti sharab ki si hai

aankh kam-bakht se us bazm mein aansu na ruka
ek qatre ne duboya mujhe dariya ho kar