dard ho to dawa kare koi

dard ho to dawa kare koi
ishq gar ho to kya kare koi
hai jo aana to ai ajal jald aa
rah kab tak taka kare koi
tum na mano to dil ko samjha le
dil na mane to kya kare koi
wo masiha na aaega ai dil
jaan apni diya kare koi
tum jo dil mein raho to phir nahaq
dar-ba-dar kyun phira kare koi
kuchh kahani nahin mera qissa
tum suno aur kaha kare koi
apni qismat hi ko bura na kahe
aap ka kyun gila kare koi
mujh pe jo hijr mein guzarti hai
us se kah de khuda kare koi
dil buton ko diya khuda ko jaan
faisla aur kya kare koi
kyun bigadte ho gar kaha mashuq
tum ko kya hai kaha kare koi
tum to nazron mein phirte rahte ho
dil mein kis tarah ja kare koi
ba-wafa se sabhi nibahte hain
bewafa se wafa kare koi
dukh uthane ki had bhi hai zalim
ranj kab tak saha kare koi
dil-dahi bhi tujhe nahin aati
jaan kyun-kar fida kare koi
aap ki chaal to qayamat hai
yun hi kab tak mita kare koi
but bhi 'anjum' kahin hue hain khuda
kahne ko yun kaha kare koi

wo ada-e-dilbari ho ki nawa-e-ashiqana

wo ada-e-dilbari ho ki nawa-e-ashiqana
jo dilon ko fath kar le wahi fateh-e-zamana
ye tera jamal-e-kaamil ye shabab ka zamana
dil-e-dushmanan salamat dil-e-dostan nishana
kabhi husn ki tabiat na badal saka zamana
wahi naz-e-be-niyazi wahi shan-e-khusrawana
main hun us maqam par ab ki firaq o wasl kaise
mera ishq bhi kahani tera husn bhi fasana
meri zindagi to guzri tere hijr ke sahaare
meri maut ko bhi pyare koi chahiye bahana
tere ishq ki karamat ye agar nahin to kya hai
kabhi be-adab na guzra mere pas se zamana
teri duri o huzuri ka ye hai ajib aalam
abhi zindagi haqiqat abhi zindagi fasana
mere ham-safir bulbul mera tera sath hi kya
main zamir-e-dasht-o-dariya tu asir-e-ashiyana
main wo saf hi na kah dun jo hai farq mujh mein tujh mein
tera dard dard-e-tanha mera gham gham-e-zamana
tere dil ke tutne par hai kisi ko naz kya kya
tujhe ai 'jigar' mubarak ye shikast-e-fatehana

chupke chupke raat din aansu bahana yaad hai

chupke chupke raat din aansu bahana yaad hai
hum ko ab tak aashiqi ka wo zamana yaad hai
ba-hazaran iztirab o sad-hazaran ishtiyaq
tujh se wo pahle-pahal dil ka lagana yaad hai
bar bar uthna usi jaanib nigah-e-shauq ka
aur tera ghurfe se wo aankhen ladana yaad hai
tujh se kuchh milte hi wo bebak ho jaana mera
aur tera danton mein wo ungli dabana yaad hai
khinch lena wo mera parde ka kona dafatan
aur dupatte se tera wo munh chhupana yaad hai
jaan kar sona tujhe wo qasd-e-pa-bosi mera
aur tera thukra ke sar wo muskurana yaad hai
tujh ko jab tanha kabhi pana to az-rah-e-lihaz
haal-e-dil baaton hi baaton mein jatana yaad hai
jab siwa mere tumhaara koi diwana na tha
sach kaho kuchh tum ko bhi wo kar-khana yaad hai
ghair ki nazron se bach kar sab ki marzi ke khilaf
wo tera chori-chhupe raaton ko aana yaad hai
aa gaya gar wasl ki shab bhi kahin zikr-e-firaq
wo tera ro ro ke mujh ko bhi rulana yaad hai
dopahar ki dhup mein mere bulane ke liye
wo tera kothe pe nange panw aana yaad hai
aaj tak nazron mein hai wo sohbat-e-raaz-o-niyaz
apna jaana yaad hai tera bulana yaad hai
mithi mithi chhed kar baaten nirali pyar ki
zikr dushman ka wo baaton mein udana yaad hai
dekhna mujh ko jo bargashta to sau sau naz se
jab mana lena to phir khud ruth jaana yaad hai
chori chori hum se tum aa kar mile the jis jagah
muddaten guzrin par ab tak wo thikana yaad hai
shauq mein mehndi ke wo be-dast-o-pa hona tera
aur mera wo chhedna wo gudgudana yaad hai
bawajud-e-iddia-e-ittiqa 'hasrat' mujhe
aaj tak ahd-e-hawas ka wo fasana yaad hai

Don't have an account? Sign up

Forgot your password?

Error message here!

Error message here!

Hide Error message here!

Error message here!

OR
OR

Lost your password? Please enter your email address. You will receive a link to create a new password.

Error message here!

Back to log-in

Close