hum ko kis ke gham ne mara ye kahani phir sahi

hum ko kis ke gham ne mara ye kahani phir sahi
kis ne toda dil hamara ye kahani phir sahi
dil ke lutne ka sabab puchho na sab ke samne
nam aaega tumhaara ye kahani phir sahi
nafraton ke tir kha kar doston ke shahr mein
hum ne kis kis ko pukara ye kahani phir sahi
kya bataen pyar ki bazi wafa ki rah mein
kaun jita kaun haara ye kahani phir sahi

gar humne dil sanam ko diya phir kisi ko kya

gar hum ne dil sanam ko diya phir kisi ko kya
islam chhod kufr liya phir kisi ko kya
kya jaane kis ke gham mein hain aankhen hamari lal
ai hum ne go nasha bhi piya phir kisi ko kya
aaphi kiya hai apne gireban ko hum ne chaak
aaphi siya siya na siya phir kisi ko kya
us bewafa ne hum ko agar apne ishq mein
ruswa kiya kharab kiya phir kisi ko kya
duniya mein aa ke hum se bura ya bhala 'nazir'
jo kuchh ki ho saka so kiya phir kisi ko kya

achchha hua ki ishq mein barbaad ho gae

achchha hua ki ishq mein barbaad ho gae
majburiyon ki qaid se aazad ho gae
kab tak fareb khate rahen qaid mein rahen
ye soch kar asir se sayyaad ho gae
is kaifiyat ka nam hai kya sochte hain hum
aur doston ki zid hai ki farhad ho gae
milne ka man nahin to bahana naya tarash
ab to mukalme bhi tere yaad ho gae
bezar bad-mizaj ana-dar bad-lihaz
aise nahin the jaise tere baad ho gae
'sani' faqat tumhaara likha jin khutut par
wo to kabhi ke zaed-ul-miad ho gae

lamhe lamhe ki na-rasai hai

lamhe lamhe ki na-rasai hai
zindagi haalat-e-judai hai
mard-e-maidan hun apni zat ka main
main ne sab se shikast khai hai
ek ajab haal hai ki ab us ko
yaad karna bhi bewafai hai
ab ye surat hai jaan-e-jaan ki tujhe
bhulne mein meri bhalai hai
khud ko bhula hun us ko bhula hun
umr bhar ki yahi kamai hai
main hunar-mand-e-rang hun main ne
khun thuka hai dad pai hai
jaane ye tere wasl ke hangam
teri furqat kahan se aai hai

aap apna ru-e-zeba dekhiye

aap apna ru-e-zeba dekhiye
ya mujhe mahw-e-tamasha dekhiye
shauq ko hangama-ara dekhiye
karobar hasrat-afza dekhiye
rang-e-gulzar-e-tamanna dekhiye
dilkashi-ha-e-tamasha dekhiye
husn hai sau rang mein tahsin-talab
dida-e-hairan se kya kya dekhiye
bazm mein us be-murawwat ki mujhe
dekhna padta hai kya kya dekhiye
hasrat aankhon mein hai lab khamosh hain
shewa-e-arz-e-tamanna dekhiye
hae re zauq-e-tamasha-e-jamal
khud tamasha hun tamasha dekhiye
aap ne phir kar na dekha is taraf
ho gaya khun-e-tamanna dekhiye
uthti hain nazren meri kis shauq se
mujh ko hangam-e-tamasha dekhiye
hasraton ka hae re dil mein hujum
aarzuon ka natija dekhiye
sajde ko betab hoti hain jabin
shokhi-e-naqsh-e-kaf-e-pa dekhiye
main hun us saqi ka diwana jise
dekhiye jab mast-e-sahba dekhiye
khak mein kis din milati hai mujhe
us se milne ki tamanna dekhiye
kahte hain kar lenge us kafir ko ram
hazrat-e-'wahshat' ka dawa dekhiye

Don't have an account? Sign up

Forgot your password?

Error message here!

Error message here!

Hide Error message here!

Error message here!

OR
OR

Lost your password? Please enter your email address. You will receive a link to create a new password.

Error message here!

Back to log-in

Close