bhari hai dil mein jo hasrat kahun to kis se kahun

bhari hai dil mein jo hasrat kahun to kis se kahun
sune hai kaun musibat kahun to kis se kahun
jo tu ho saf to kuchh main bhi saf tujh se kahun
tere hai dil mein kudurat kahun to kis se kahun
na kohkan hai na majnun ki the mere hamdard
main apna dard-e-mohabbat kahun to kis se kahun
dil us ko aap diya aap hi pashiman hun
ki sach hai apni nadamat kahun to kis se kahun
kahun main jis se use howe sunte hi wahshat
phir apna qissa-e-wahshat kahun to kis se kahun
raha hai tu hi to gham-khwar ai dil-e-gham-ghin
tere siwa gham-e-furqat kahun to kis se kahun
jo dost ho to kahun tujh se dosti ki baat
tujhe to mujh se adawat kahun to kis se kahun
na mujh ko kahne ki taqat kahun to kya ahwal
na us ko sunne ki fursat kahun to kis se kahun
kisi ko dekhta itna nahin haqiqat mein
'zafar' main apni haqiqat kahun to kis se kahun

bahana DhunDte rahte hain koi rone ka

bahana dhundte rahte hain koi rone ka
hamein ye shauq hai kya aastin bhigone ka
agar palak pe hai moti to ye nahin kafi
hunar bhi chahiye alfaz mein pirone ka
jo fasl khwab ki tayyar hai to ye jaano
ki waqt aa gaya phir dard koi bone ka
ye zindagi bhi ajab karobar hai ki mujhe
khushi hai pane ki koi na ranj khone ka
hai pash pash magar phir bhi muskuraata hai
wo chehra jaise ho tute hue khilaune ka

arz-o-sama kahan teri wusat ko pa sake

arz-o-sama kahan teri wusat ko pa sake
mera hi dil hai wo ki jahan tu sama sake
wahdat mein teri harf dui ka na aa sake
aaina kya majal tujhe munh dikha sake
main wo fatada hun ki baghair-az-fana mujhe
naqsh-e-qadam ki tarah na koi utha sake
qasid nahin ye kaam tera apni rah le
us ka payam dil ke siwa kaun la sake
ghafil khuda ki yaad pe mat bhul zinhaar
apne tain bhula de agar tu bhula sake
ya-rab ye kya tilism hai idrak-o-fahm yan
daude hazar aap se bahar na ja sake
go bahs kar ke baat bithai bhi kya husul
dil se utha ghilaf agar tu utha sake
itfa-e-nar-e-ishq na ho aab-e-ashk se
ye aag wo nahin jise pani bujha sake
mast-e-sharab-e-ishq wo be-khud hai jis ko hashr
ai 'dard' chahe lae ba-khud phir na la sake

aalam hi aur tha jo shanasaiyon mein tha

aalam hi aur tha jo shanasaiyon mein tha
jo dip tha nigah ki parchhaiyon mein tha
wo be-panah khauf jo tanhaiyon mein tha
dil ki tamam anjuman-araiyon mein tha
ek lamha-e-fusun ne jalaya tha jo diya
phir umr bhar khayal ki ranaiyon mein tha
ek khwab-gun si dhup thi zakhmon ki aanch mein
ek saeban sa dard ki purwaiyon mein tha
dil ko bhi ek jarahat-e-dil ne ata kiya
ye hausla ki apne tamashaiyon mein tha
katta kahan tawil tha raaton ka silsila
suraj meri nigah ki sachchaiyon mein tha
apni gali mein kyun na kisi ko wo mil saka
jo e'timad baadiya-paimaiyon mein tha
is ahd-e-khud-sipas ka puchho ho majra
masruf aap apni paziraiyon mein tha
us ke huzur shukr bhi aasan nahin 'ada'
wo jo qarib-e-jaan meri tanhaiyon mein tha

Don't have an account? Sign up

Forgot your password?

Error message here!

Error message here!

Hide Error message here!

Error message here!

OR
OR

Lost your password? Please enter your email address. You will receive a link to create a new password.

Error message here!

Back to log-in

Close