ek parinda abhi uDan mein hai

ek parinda abhi udan mein hai
tir har shakhs ki kaman mein hai
jis ko dekho wahi hai chup chup sa
jaise har shakhs imtihan mein hai
kho chuke hum yaqin jaisi shai
tu abhi tak kisi guman mein hai
zindagi sang-dil sahi lekin
aaina bhi isi chatan mein hai
sar-bulandi nasib ho kaise
sar-nigun hai ki saeban mein hai
khauf hi khauf jagte sote
koi aaseb is makan mein hai
aasra dil ko ek umid ka hai
ye hawa kab se baadban mein hai
khud ko paya na umr bhar hum ne
kaun hai jo hamare dhyan mein hai

hawa ke par katarna ab zaruri ho gaya hai

hawa ke par katarna ab zaruri ho gaya hai
mera parwaz bharna ab zaruri ho gaya hai
mere andar kai ehsas patthar ho rahe hain
ye shiraaza bikharna ab zaruri ho gaya hai
main aksar zindagi ke un marahil se bhi guzra
jahan lagta tha marna ab zaruri ho gaya hai
meri khamoshiyan ab mujh pe hawi ho rahi hain
ki khul kar baat karna ab zaruri ho gaya hai
bulandi bhi nashebon ki tarah lagne lagi hai
bulandi se utarna ab zaruri ho gaya hai
main is yak-rangi-e-haalat se ukta chuka hun
haqiqat se mukarna ab zaruri ho gaya hai
meri aankhen bahut viran hoti ja rahi hain
khala mein rang bharna ab zaruri ho gaya hai

hadsa wo jo abhi parda-e-aflak mein hai

hadsa wo jo abhi parda-e-aflak mein hai
aks us ka mere aaina-e-idrak mein hai
na sitare mein hai ne gardish-e-aflak mein hai
teri taqdir mere nala-e-bebak mein hai
ya meri aah mein hi koi sharar zinda nahin
ya zara nam abhi tere khas-o-khashak mein hai
kya ajab meri nawa-ha-e-sahar-gahi se
zinda ho jae wo aatish jo teri khak mein hai
tod dalegi yahi khak tilsim-e-shab-o-roz
garche uljhi hui taqdir ke pechaak mein hai

bargashta-e-yazdan se kuchh bhul hui hai

bargashta-e-yazdan se kuchh bhul hui hai
bhatke hue insan se kuchh bhul hui hai
ta-hadd-e-nazar shoale hi shoale hain chaman mein
phulon ke nigahban se kuchh bhul hui hai
jis ahd mein lut jae faqiron ki kamai
us ahd ke sultan se kuchh bhul hui hai
hanste hain meri surat-e-maftun pe shagufe
mere dil-e-nadan se kuchh bhul hui hai
huron ki talab aur mai o saghar se hai nafrat
zahid tere irfan se kuchh bhul hui hai

agar na zohra-jabinon ke darmiyan guzre

agar na zohra-jabinon ke darmiyan guzre
to phir ye kaise kate zindagi kahan guzre
jo tere aariz o gesu ke darmiyan guzre
kabhi kabhi wahi lamhe bala-e-jaan guzre
mujhe ye wahm raha muddaton ki jurat-e-shauq
kahin na khatir-e-masum par giran guzre
har ek maqam-e-mohabbat bahut hi dilkash tha
magar hum ahl-e-mohabbat kashan kashan guzre
junun ke sakht marahil bhi teri yaad ke sath
hasin hasin nazar aae jawan jawan guzre
meri nazar se teri justuju ke sadqe mein
ye ek jahan hi nahin sainkadon jahan guzre
hujum-e-jalwa mein parwaz-e-shauq kya kahna
ki jaise ruh sitaron ke darmiyan guzre
khata-muaf zamane se bad-guman ho kar
teri wafa pe bhi kya kya hamein guman guzre
mujhe tha shikwa-e-hijran ki ye hua mahsus
mere qarib se ho kar wo na-gahan guzre
rah-e-wafa mein ek aisa maqam bhi aaya
ki hum khud apni taraf se bhi bad-guman guzre
khulus jis mein ho shamil wo daur-e-ishq-o-hawas
na raegan kabhi guzra na raegan guzre
usi ko kahte hain jannat usi ko dozakh bhi
wo zindagi jo hasinon ke darmiyan guzre
bahut hasin manazir bhi husn-e-fitrat ke
na jaane aaj tabiat pe kyun giran guzre
wo jin ke sae se bhi bijliyan larazti thin
meri nazar se kuchh aise bhi aashiyan guzre
mera to farz chaman-bandi-e-jahan hai faqat
meri bala se bahaar aae ya khizan guzre
kahan ka husn ki khud ishq ko khabar na hui
rah-e-talab mein kuchh aise bhi imtihan guzre
bhari bahaar mein taraji-e-chaman mat puchh
khuda kare na phir aankhon se wo saman guzre
koi na dekh saka jin ko wo dilon ke siwa
muamlat kuchh aise bhi darmiyan guzre
kabhi kabhi to isi ek musht-e-khak ke gird
tawaf karte hue haft aasman guzre
bahut hasin sahi sohbaten gulon ki magar
wo zindagi hai jo kanton ke darmiyan guzre
abhi se tujh ko bahut nagawar hain hamdam
wo hadsat jo ab tak rawan-dawan guzre
jinhen ki dida-e-shair hi dekh sakta hai
wo inqilab tere samne kahan guzre
bahut aziz hai mujh ko unhen kya yaad 'jigar'
wo hadsat-e-mohabbat jo na-gahan guzre

aaine ka sath pyara tha kabhi

aaine ka sath pyara tha kabhi
ek chehre par guzara tha kabhi
aaj sab kahte hain jis ko nakhuda
hum ne us ko par utara tha kabhi
ye mere ghar ki faza ko kiya hua
kab yahan mera tumhaara tha kabhi
tha magar sab kuchh na tha dariya ke par
is kinare bhi kinara tha kabhi
kaise tukdon mein use kar lun qubul
jo mera sare ka sara tha kabhi
aaj kitne gham hain rone ke liye
ek tere dukh ka sahaara tha kabhi
justuju itni bhi be-mani na thi
manzilon ne bhi pukara tha kabhi
ye nae gumrah kya jaanen mujhe
main safar ka istiara tha kabhi
ishq ke qisse na chhedo dosto
main isi maidan mein haara tha kabhi

Don't have an account? Sign up

Forgot your password?

Error message here!

Error message here!

Hide Error message here!

Error message here!

OR
OR

Lost your password? Please enter your email address. You will receive a link to create a new password.

Error message here!

Back to log-in

Close