hum ko kis ke gham ne mara ye kahani phir sahi

hum ko kis ke gham ne mara ye kahani phir sahi
kis ne toda dil hamara ye kahani phir sahi
dil ke lutne ka sabab puchho na sab ke samne
nam aaega tumhaara ye kahani phir sahi
nafraton ke tir kha kar doston ke shahr mein
hum ne kis kis ko pukara ye kahani phir sahi
kya bataen pyar ki bazi wafa ki rah mein
kaun jita kaun haara ye kahani phir sahi

dil tha ki KHush-KHayal tujhe dekh kar hua

dil tha ki khush-khayal tujhe dekh kar hua
ye shahr be-misal tujhe dekh kar hua
apne khilaf shahr ke andhe hujum mein
dil ko bahut malal tujhe dekh kar hua
tul-e-shab-e-firaq teri khair ho ki dil
aamada-e-visal tujhe dekh kar hua
ye hum hi jaante hain judai ke mod par
is dil ka jo bhi haal tujhe dekh kar hua
aai na thi kabhi mere lafzon mein raushni
aur mujh se ye kamal tujhe dekh kar hua
bichhde to jaise zehn muattal sa ho gaya
shahr-e-sukhan bahaal tujhe dekh kar hua
phir log aa gae mera mazi kuredne
phir mujh se ek sawal tujhe dekh kar hua

daya saqi labaalab mujhko saghar

daya saqi labaalab mujh ko saghar
hua sara kudurat dil sun bahar
ajab tha mast saqi jam tera
chhupa baatin laga disne ko zahir
andhaara ghair ka ji sun gaya tal
hua khurshid aa ankhiyan mein hazir
diya zarre ko apne mahr sun nur
hua tis par karam sun aap nazir
laga kar faiz ka mujh jag mein engine
kiya hai ganj sun baatin ke mahir
tasadduq jaan-o-dil sun mein sarapa
nawazish hai teri do jag mein nadir
'alimullah' tera saqi sacha hai
laqab jis ko 'muhayuddin-qadir'

dasht-e-tanhai mein kal raat hawa kaisi thi

dasht-e-tanhai mein kal raat hawa kaisi thi
der tak tutte lamhon ki sada kaisi thi
zindagi ne mera pichha nahin chhoda ab tak
umr bhar sar se na utri ye bala kaisi thi
sunte rahte the mohabbat ke fasane kya kya
bund bhar dil pe na barsi ye ghata kaisi thi
kya mila faisla-e-tark-e-talluq kar ke
tum jo bichhde the to honton pe dua kaisi thi
tut kar khud jo wo bikhra hai to malum hua
jis se lipta tha wo diwar-e-ana kaisi thi
jism se noch ke phenki bhi to khushbu na gai
ye riwayat ki bosida qaba kaisi thi
dubte waqt bhanwar puchh raha hai 'qaisar'
jab kinare se chale the to faza kaisi thi

Don't have an account? Sign up

Forgot your password?

Error message here!

Error message here!

Hide Error message here!

Error message here!

OR
OR

Lost your password? Please enter your email address. You will receive a link to create a new password.

Error message here!

Back to log-in

Close