phir usi rahguzar par shayad

phir usi rahguzar par shayad
hum kabhi mil saken magar shayad
jin ke hum muntazir rahe un ko
mil gae aur ham-safar shayad
jaan pahchan se bhi kya hoga
phir bhi ai dost ghaur kar shayad
ajnabiyat ki dhund chhat jae
chamak uthe teri nazar shayad
zindagi bhar lahu rulaegi
yaad-e-yaran-e-be-khabar shayad
jo bhi bichhde wo kab mile hain 'faraaz'
phir bhi tu intizar kar shayad

kushada dast-e-karam jab wo be-niyaz kare

kushada dast-e-karam jab wo be-niyaz kare
niyaz-mand na kyun aajizi pe naz kare
bitha ke arsh pe rakkha hai tu ne ai waiz
khuda wo kya hai jo bandon se ehtiraaz kare
meri nigah mein wo rind hi nahin saqi
jo hoshiyari o masti mein imtiyaz kare
mudam gosh-ba-dil rah ye saz hai aisa
jo ho shikasta to paida nawa-e-raaz kare
koi ye puchhe ki waiz ka kya bigadta hai
jo be-amal pe bhi rahmat wo be-niyaz kare
sukhan mein soz ilahi kahan se aata hai
ye chiz wo hai ki patthar ko bhi gudaz kare
tamiz-e-lala-o-gul se hai nala-e-bulbul
jahan mein wa na koi chashm-e-imtiyaz kare
ghurur-e-zohd ne sikhla diya hai waiz ko
ki bandagan-e-khuda par zaban daraaz kare
hawa ho aisi ki hindostan se ai 'iqbaal'
uda ke mujh ko ghubar-e-rah-e-hijaz kare

kam-zarf ehtiyat ki manzil se aae hain

kam-zarf ehtiyat ki manzil se aae hain
hum zindagi ke jada-e-mushkil se aae hain
girdab mahw-e-raqs hai tufan mahw-e-josh
kuchh log shauq-e-mauj mein sahil se aae hain
ye waz-e-zabt-e-shauq ki dil jal bujha magar
shikwe zaban pe aaj bhi mushkil se aae hain
aankhon ka soz dil ki kasak to nain mili
mana ki aap bhi usi mahfil se aae hain
ye qashqa-e-khulus hai zakhm-e-jabin nahin
har chand hum bhi kucha-e-qatil se aae hain
dil ka lahu nigah se tapka hai bar-ha
hum rah-e-gham mein aisi bhi manzil se aae hain
dil ek udas subh nazar ek udas sham
kaise kahen ki dost ki mahfil se aae hain
chheda tha nok-e-khar ne lekin guman hua
taza payam parda-e-mahmil se aae hain
han gae ja mughanni-e-bazm-e-tarab ki aaj
naghme teri zaban pe mere dil se aae hain

jite ji maut ke tum munh mein na jaana hargiz

jite ji maut ke tum munh mein na jaana hargiz
dosto dil na lagana na lagana hargiz
ishq bhi tak mein baitha hai nazar-bazon ki
dekhna sher se aankhen na ladana hargiz
hath malne na hon piri mein agar hasrat se
to jawani mein na ye rog basana hargiz
jitne raste the tere ho gae viran ai ishq
aa ke viranon mein ab ghar na basana hargiz
kuch sab kar gae dilli se tere qadr-shanas
qadr yan rah ke ab apni na ganwana hargiz
tazkira dehli-e-marhum ka ai dost na chhed
na suna jaega hum se ye fasana hargiz
dhundta hai dil-e-shorida bahane mutrib
dard-angez ghazal koi na gana hargiz
sohbaten agli musawwir hamein yaad aaengi
koi dilchasp muraqqa na dikhana hargiz
le ke dagh aaega sine pe bahut ai sayyah
dekh is shahr ke khandaron mein na jaana hargiz
chappe chappe pe hain yan gauhar-e-yakta tah-e-khak
dafn hoga kahin itna na khazana hargiz
mit gae tere mitane ke nishan bhi ab to
ai falak is se ziyaada na mitana hargiz
wo to bhule the hamein hum bhi unhen bhul gae
aisa badla hai na badlega zamana hargiz
hum ko gar tu ne rulaya to rulaya ai charkh
hum pe ghairon ko to zalim na hansana hargiz
aakhiri daur mein bhi tujh ko qasam hai saqi
bhar ke ek jam na pyason ko pilana hargiz
bakht soe hain bahut jag ke ai daur-e-zaman
na abhi nind ke maton ko jagana hargiz
kabhi ai ilm o hunar ghar tha tumhaara dilli
hum ko bhule ho to ghar bhul na jaana hargiz
shairi mar chuki ab zinda na hogi yaro
yaad kar kar ke use ji na kudhana hargiz
'ghaalib' o 'shefta' o 'nayyar' o 'azurda' o 'zauq'
ab dikhaega ye shaklen na zamana hargiz
'momin' o 'alwi' o 'sahbai' o 'mamnun' ke baad
sher ka nam na lega koi dana hargiz
kar diya mar ke yaganon ne yagana hum ko
warna yan koi na tha hum mein yagana hargiz
'dagh' o 'majruh' ko sun lo ki phir is gulshan mein
na sunega koi bulbul ka tarana hargiz
raat aakhir hui aur bazm hui zer-o-zabar
ab na dekhoge kabhi lutf-e-shabana hargiz
bazm-e-matam to nahin bazm-e-sukhan hai 'haali'
yan munasib nahin ro ro ke rulana hargiz

jaan se ishq aur jahan se gurez

jaan se ishq aur jahan se gurez
doston ne kiya kahan se gurez
ibtida ki tere qaside se
ab ye mushkil karun kahan se gurez
main wahan hun jahan jahan tum ho
tum karoge kahan kahan se gurez
kar gaya mere tere qisse mein
dastan-go yahan wahan se gurez
jang haari na thi abhi ki 'faraaz'
kar gae dost darmiyan se gurez

hijr ki shab nala-e-dil wo sada dene lage

hijr ki shab nala-e-dil wo sada dene lage
sunne wale raat katne ki dua dene lage
aaiye haal-e-dil-e-majruh suniye dekhiye
kya kaha zakhmon ne kyun tanke sada dene lage
kis nazar se aap ne dekha dil-e-majruh ko
zakhm jo kuchh bhar chale the phir hawa dene lage
sunne wale ro diye sun kar mariz-e-gham ka haal
dekhne wale taras kha kar dua dene lage
juz zamin-e-ku-e-jaanan kuchh nahin pesh-e-nigah
jis ka darwaza nazar aaya sada dene lage
baghban ne aag di jab aashiyane ko mere
jin pe takiya tha wahi patte hawa dene lage
mutthiyon mein khak le kar dost aae waqt-e-dafn
zindagi bhar ki mohabbat ka sila dene lage
aaina ho jae mera ishq un ke husn ka
kya maza ho dard agar khud hi dawa dene lage
sina-e-sozan mein 'saqib' ghut raha hai wo dhuan
uf karun to aag duniya ki hawa dene lage

Don't have an account? Sign up

Forgot your password?

Error message here!

Error message here!

Hide Error message here!

Error message here!

OR
OR

Lost your password? Please enter your email address. You will receive a link to create a new password.

Error message here!

Back to log-in

Close