ham-safar tham to sahi dil ko sambhaalun to chalun

ham-safar tham to sahi dil ko sambhaalun to chalun
manzil-e-dost pe do ashk baha lun to chalun
har qadam par hain mere dil ko hazaron uljhao
daman-e-sabr ko kanton se chhuda lun to chalun
mujh sa kaun aaega tajdid-e-makarim ke liye
dasht-e-imkan ki zara khak uda lun to chalun
bas ghanimat hai ye shiraaza-e-lamhat-e-bahaar
dhum se jashn-e-kharabaat mana lun to chalun
panw zakhmi hue aur dur hai manzil 'wasif'
khun-e-aslaf ki azmat ko jaga lun to chalun

hum ko miTa sake ye zamane mein dam nahin

hum ko mita sake ye zamane mein dam nahin
hum se zamana khud hai zamane se hum nahin
be-faeda alam nahin bekar gham nahin
taufiq de khuda to ye nemat bhi kam nahin
meri zaban pe shikwa-e-ahl-e-sitam nahin
mujh ko jaga diya yahi ehsan kam nahin
ya rab hujum-e-dard ko de aur wusaten
daman to kya abhi meri aankhen bhi nam nahin
shikwa to ek chhed hai lekin haqiqatan
tera sitam bhi teri inayat se kam nahin
ab ishq us maqam pe hai justuju-naward
saya nahin jahan koi naqsh-e-qadam nahin
milta hai kyun maza sitam-e-rozgar mein
tera karam bhi khud jo sharik-e-sitam nahin
marg-e-'jigar' pe kyun teri aankhen hain ashk-rez
ek saneha sahi magar itna aham nahin

dukh apna agar hum ko batana nahin aata

dukh apna agar hum ko batana nahin aata
tum ko bhi to andaza lagana nahin aata
pahuncha hai buzurgon ke bayanon se jo hum tak
kya baat hui kyun wo zamana nahin aata
main bhi use khone ka hunar sikh na paya
us ko bhi mujhe chhod ke jaana nahin aata
is chhote zamane ke bade kaise banoge
logon ko jab aapas mein ladana nahin aata
dhundhe hai to palkon pe chamakne ke bahane
aansu ko meri aankh mein aana nahin aata
tarikh ki aankhon mein dhuan ho gae khud hi
tum ko to koi ghar bhi jalana nahin aata

dast-e-dua ko kasa-e-sail samajhte ho

dast-e-dua ko kasa-e-sail samajhte ho
tum dost ho to kyun nahin mushkil samajhte ho
sine pe hath rakh ke batao mujhe ki tum
jo kuchh dhadak raha hai use dil samajhte ho
har shai ko tum ne farz kiya aur is ke baad
sae ko apna madd-e-muqabil samajhte ho
dariya tumhein sarab dikhai diya aur ab
gard-o-gubar-e-rah ko manzil samajhte ho
khush-fahmiyon ki had hai ki pani mein ret par
jo bhi jagah mile use sahil samajhte ho
tanhai jalwa-gah-e-tahayyur hai aur tum
viraniyon ke raqs ko mahfil samajhte ho
jis ne tumhaari nind pe pahre bitha diye
apni taraf se tum use ghafil samajhte ho

dasht mein pyas bujhate hue mar jate hain

dasht mein pyas bujhate hue mar jate hain
hum parinde kahin jate hue mar jate hain
hum hain sukhe hue talab pe baithe hue hans
jo talluq ko nibhate hue mar jate hain
ghar pahunchta hai koi aur hamare jaisa
hum tere shahr se jate hue mar jate hain
kis tarah log chale jate hain uth kar chup-chap
hum to ye dhyan mein late hue mar jate hain
un ke bhi qatl ka ilzam hamare sar hai
jo hamein zahr pilate hue mar jate hain
ye mohabbat ki kahani nahin marti lekin
log kirdar nibhate hue mar jate hain
hum hain wo tuti hui kashtiyon wale 'tabish'
jo kinaron ko milate hue mar jate hain

dagh-e-dil hum ko yaad aane lage

dagh-e-dil hum ko yaad aane lage
log apne diye jalane lage
kuchh na pa kar bhi mutmain hain hum
ishq mein hath kya khazane lage
yahi rasta hai ab yahi manzil
ab yahin dil kisi bahane lage
khud-farebi si khud-farebi hai
pas ke dhol bhi suhane lage
ab to hota hai har qadam pe guman
hum ye kaisa qadam uthane lage
is badalte hue zamane mein
tere qisse bhi kuchh purane lage
rukh badalne laga fasane ka
log mahfil se uth ke jaane lage
ek pal mein wahan se hum utthe
baithne mein jahan zamane lage
apni qismat se hai mafar kis ko
tir par ud ke bhi nishane lage
hum tak aae na aae mausam-e-gul
kuchh parinde to chahchahane lage
sham ka waqt ho gaya 'baqi'
bastiyon se sharar aane lage

Don't have an account? Sign up

Forgot your password?

Error message here!

Error message here!

Hide Error message here!

Error message here!

OR
OR

Lost your password? Please enter your email address. You will receive a link to create a new password.

Error message here!

Back to log-in

Close