charaghon ka gharana chal raha hai

charaghon ka gharana chal raha hai
hawa se dostana chal raha hai
jawani ki hawaen chal rahi hain
buzurgon ka khazana chal raha hai
meri gum-gashtagi par hansne walo
mere pichhe zamana chal raha hai
abhi hum zindagi se mil na pae
taaruf ghaebana chal raha hai
nae kirdar aate ja rahe hain
magar natak purana chal raha hai
wahi duniya wahi sansen wahi hum
wahi sab kuchh purana chal raha hai
ziyaada kya tawaqqoa ho ghazal se
miyan bas aab-o-dana chal raha hai
samundar se kisi din phir milenge
abhi pina-pilana chal raha hai
wahi mahshar wahi milne ka wada
wahi budha bahana chal raha hai
yahan ek madrasa hota tha pahle
magar ab kar-khana chal raha hai

apni aankhon ke samundar mein utar jaane de

apni aankhon ke samundar mein utar jaane de
tera mujrim hun mujhe dub ke mar jaane de
ai nae dost main samjhunga tujhe bhi apna
pahle mazi ka koi zakhm to bhar jaane de
zakhm kitne teri chahat se mile hain mujh ko
sochta hun ki kahun tujh se magar jaane de
aag duniya ki lagai hui bujh jaegi
koi aansu mere daman pe bikhar jaane de
sath chalna hai to phir chhod de sari duniya
chal na pae to mujhe laut ke ghar jaane de
zindagi main ne ise kaise piroya tha na soch
haar tuta hai to moti bhi bikhar jaane de
in andheron se hi suraj kabhi niklega 'nazir'
raat ke sae zara aur nikhar jaane de

ab nibhani hi paDegi dosti jaisi bhi hai

ab nibhani hi padegi dosti jaisi bhi hai
aap jaise bhi hain niyyat aap ki jaisi bhi hai
khul chuki hain us ke ghar ki khidkiyan mere liye
rukh meri jaanib rahega be-rukhi jaisi bhi hai
chotiyan chhu kar guzarte hain baraste kyun nahin
baadalon ki ek surat aadmi jaisi bhi hai
ajnabi shahron mein tujh ko dhundhta hun jis tarah
ek gali har shahr mein teri gali jaisi bhi hai
aaj ke dukh hi bahut hain bim-e-farda kis liye
kat hi jaegi aziyyat ki ghadi jaisi bhi hai
dhundla dhundla hi sahi rasta dikhai to diya
aaj ka din hai ghanimat raushni jaisi bhi hai
jhulti hai mere dil mein ek shakh us ped ki
wo tar-o-taza hai ya sukhi hui jaisi bhi hai
main ne dekha hai falak ko jagte sote hue
meri aankhon tak to aai chandni jaisi bhi hai
ab kahan le jaen sanson ki sulagti aag ko
zindagi hai zindagi achchhi buri jaisi bhi hai
koi mausam ho meri khushbu rahe is phul mein
dastan meri kahi ya an-kahi jaisi bhi hai
apna haq 'shahzad' hum chhinenge mangenge nahin
rahm ki talib nahin be-chaargi jaisi bhi hai

ab ke tajdid-e-wafa ka nahin imkan jaanan

ab ke tajdid-e-wafa ka nahin imkan jaanan
yaad kya tujh ko dilaen tera paiman jaanan
yunhi mausam ki ada dekh ke yaad aaya hai
kis qadar jald badal jate hain insan jaanan
zindagi teri ata thi so tere nam ki hai
hum ne jaise bhi basar ki tera ehsan jaanan
dil ye kahta hai ki shayad hai fasurda tu bhi
dil ki kya baat karen dil to hai nadan jaanan
awwal awwal ki mohabbat ke nashe yaad to kar
be-piye bhi tera chehra tha gulistan jaanan
aakhir aakhir to ye aalam hai ki ab hosh nahin
rag-e-mina sulag utthi ki rag-e-jaan jaanan
muddaton se yahi aalam na tawaqqo na ummid
dil pukare hi chala jata hai jaanan jaanan
hum bhi kya sada the hum ne bhi samajh rakkha tha
gham-e-dauran se juda hai gham-e-jaanan jaanan
ab ke kuchh aisi saji mahfil-e-yaran jaanan
sar-ba-zanu hai koi sar-ba-gareban jaanan
har koi apni hi aawaz se kanp uthta hai
har koi apne hi sae se hirasan jaanan
jis ko dekho wahi zanjir-ba-pa lagta hai
shahr ka shahr hua dakhil-e-zindan jaanan
ab tera zikr bhi shayad hi ghazal mein aae
aur se aur hue dard ke unwan jaanan
hum ki ruthi hui rut ko bhi mana lete the
hum ne dekha hi na tha mausam-e-hijran jaanan
hosh aaya to sabhi khwab the reza reza
jaise udte hue auraq-e-pareshan jaanan

aankh mein pani rakho honTon pe chingari rakho

aankh mein pani rakho honton pe chingari rakho
zinda rahna hai to tarkiben bahut sari rakho
rah ke patthar se badh kar kuchh nahin hain manzilen
raste aawaz dete hain safar jari rakho
ek hi naddi ke hain ye do kinare dosto
dostana zindagi se maut se yari rakho
aate jate pal ye kahte hain hamare kan mein
kuch ka ailan hone ko hai tayyari rakho
ye zaruri hai ki aankhon ka bharam qaem rahe
nind rakho ya na rakho khwab meyari rakho
ye hawaen ud na jaen le ke kaghaz ka badan
dosto mujh par koi patthar zara bhaari rakho
le to aae shairi bazar mein 'rahat' miyan
kya zaruri hai ki lahje ko bhi bazari rakho

Don't have an account? Sign up

Forgot your password?

Error message here!

Error message here!

Hide Error message here!

Error message here!

OR
OR

Lost your password? Please enter your email address. You will receive a link to create a new password.

Error message here!

Back to log-in

Close