anmol sahi nayab sahi be-dam-o-diram bik jate hain

anmol sahi nayab sahi be-dam-o-diram bik jate hain
bas pyar hamari qimat hai mil jae to hum bik jate hain
sikkon ki chamak pe girte hue dekha hai shaikh o barhaman ko
phir mere khandar ki qimat kya jab dair o haram bik jate hain
kya sharm-e-khudi kya pas-e-haya ghurbat ki andheri raaton mein
kitne hi butan-e-zohra-jabin ba-dida-e-nam bik jate hain
ye hirs-o-hawa ki manzil hai ai rah-rawo hushyar zara
jab hath rupahle badhte hain rahbar ke qadam bik jate hain
wo sahib-e-ilm-o-hikmat hon ya paikar-e-aql-o-danai
ek mere dil-e-nadan ke siwa sab teri qasam bik jate hain
ye shahr hai shahr-e-zardari kya hoga 'shamim' anjam tera
yan zehn kharida jata hai yan ahl-e-qalam bik jate hain

pareshan ho ke meri KHak aaKHir dil na ban jae

pareshan ho ke meri khak aakhir dil na ban jae
jo mushkil ab hai ya rab phir wahi mushkil na ban jae
na kar den mujh ko majbur-e-nawa firdaus mein huren
mera soz-e-darun phir garmi-e-mahfil na ban jae
kabhi chhodi hui manzil bhi yaad aati hai rahi ko
khatak si hai jo sine mein gham-e-manzil na ban jae
banaya ishq ne dariya-e-na-paida-karan mujh ko
ye meri khud-nigah-dari mera sahil na ban jae
kahin is aalam-e-be-rang-o-bu mein bhi talab meri
wahi afsana-e-dumbaala-e-mahmil na ban jae
uruj-e-adam-e-khaki se anjum sahme jate hain
ki ye tuta hua tara mah-e-kaamil na ban jae

miTTi ho kar ishq kiya hai ek dariya ki rawani se

mitti ho kar ishq kiya hai ek dariya ki rawani se
diwar-o-dar mang raha hun main bhi bahte pani se
be-khabari mein hont diye ki lau ko chumne wale the
wo to achanak phut padi thi khushbu raat ki rani se
wo majburi maut hai jis mein kase ko buniyaad mile
pyas ki shiddat jab badhti hai dar lagta hai pani se
duniya walon ke mansube meri samajh mein aae nahin
zinda rahna sikh raha hun ab ghar ki virani se
jaise tere darwaze tak dastak dene pahunche the
apne ghar bhi laut ke aate hum itni aasani se
hum ko sab malum hai 'mohsin' haal pas-e-girdab hai kya
aankh ne sachche gur sikhe hain suraj ki darbani se

humne sab sher mein sanware the

hum ne sab sher mein sanware the
hum se jitne sukhan tumhaare the
rang-o-khushbu ke husn-o-khubi ke
tum se the jitne istiare the
tere qaul-o-qarar se pahle
apne kuchh aur bhi sahaare the
jab wo lal-o-gohar hisab kiye
jo tere gham ne dil pe ware the
mere daman mein aa gire sare
jitne tasht-e-falak mein tare the
umr-e-jawed ki dua karte
'faiz' itne wo kab hamare the

Don't have an account? Sign up

Forgot your password?

Error message here!

Error message here!

Hide Error message here!

Error message here!

OR
OR

Lost your password? Please enter your email address. You will receive a link to create a new password.

Error message here!

Back to log-in

Close