sannaTa

koi dhadkan
na koi chap
na sanchal
na koi mauj
na halchal
na kisi sans ki garmi
na badan
aise sannate mein ik-adh to patta khadke
koi pighla hua moti
koi aansu
koi dil
kuchh bhi nahin
kitni sunsan hai ye rahguzar
koi rukhsar to chamke koi bijli to gire

pas che-bayad-kard

khwab-e-khas-khana-o-barfab ke pichhe pichhe
garmi-e-shahr-e-muqaddar ke satae hue log
kaisi yakh-basta zaminon ki taraf aa nikle
mauj-e-khun barf hui jati hai sansen bhi hain barf
wahshaten jin ka muqaddar thin wo aankhen bhi hain barf
yaad-e-yaran-e-dil-awez ka manzar bhi hai barf
ek ek nam har aawaz har ek chehra barf
munjamid khwab ki tiksal ka har sikka barf
aur ab sochte hain sham-o-sahar sochte hain
khwab-e-khas-khana-o-barfab se wo aag bhali
jin ke shoalon mein bhi qirtas o qalam zinda hain
jis mein har ahd ke har nasl ke gham zinda hain
khak ho kar bhi ye lagta tha ki hum zinda hain

mujhe rone do

mujhe rone do rone do
usi pipal ke sae mein
jahan ek dard ki tasir ka mara
batata tha ki raaz-e-dard-o-gham kya hai
mudawa-e-alam kya hai
mujhe rone do rone do
jahan murli ki dhun sun kar
wo radhaen
kade jade ke mausam mein
kisi ki garmi-e-aghosh se uth kar
mohabbat ki damakti chandni mein ja nikalti thin
mujhe rone do rone do
ki main ek ajnabi ban kar
tumhaare dar pe aaya hun, mera kashkol khali hai
tumhaare pas jo dhan tha
mera dil aaj phir us ka sawali hai
magar tum dan kya doge
ki tum to khud bhikari ho
mujhe rone do rone do

dildar dekhna

tufan ba-dil hai har koi dildar dekhna
gul ho na jae mishal-e-rukhsar dekhna
aatish ba-jaan hai har koi sarkar dekhna
lau de uthe na turra-e-tarrar dekhna
jazb-e-musafiran-e-rah-e-yar dekhna
sar dekhna, na sang, na diwar dekhna
ku-e-jafa mein qaht-e-kharidar dekhna
hum aa gae to garmi-e-bazar dekhna
us dil-nawaz shahr ke atwar dekhna
be iltifat bolna, bezar dekhna
khali hain garche masnad o mimbar, nigun hai khalq
roab-e-qaba o haibat-e-dastar dekhna
jab tak nasib tha tera didar dekhna
jis samt dekhna, gul-o-gulzar dekhna
phir hum tamiz-e-roz-o-mah-o-sal kar saken
ai yaad-e-yar phir idhar ek bar dekhna

andheri shab se ek la-hasil

andheri shab ke sharmile moattar kan mein us ne kaha wo shakhs
dur uftada lekin mere dil ki tarah raushan hai
jo mere panw ke talwe hatheli ke gulabi gal mein
kanta sa chubhta hai
jo mere jism ki kheti pe barish ka chhalawa hai
wo jis ki aankh ki qatil
hawas ek muntazir lekin na zahir hone wale phul ki manind
bechaini mein rakhti hai mujhe wo
aane wala hai
magar wo shakhs is shab bhi nahin aaya
bhala tuti kalai se
wo sare khwab sab wade mulaqaton ke paimane
kahan sambhlen
bhala be-nur aankhon mein wo surat
jham jhamati tund josh-e-khun se garmi-e-lab tak tamtamati
kis tarah rukti
andheri raat ne
dekha na kuchh sunna hi chaha us ke gosh-e-nazuk aur chashm-e-siyah masum hote hain

bint-e-lamhat

tumhaare lahje mein jo garmi o halawat hai
use bhala sa koi nam do wafa ki jagah
ghanim-e-nur ka hamla kaho andheron par
dayar-e-dard mein aamad kaho masiha ki
rawan-dawan hue khushbu ke qafile har-su
khala-e-subh mein gunji sahar ki shahnai
ye ek kohra sa, ye dhund si jo chhai hai
is iltihab mein, is surmagin ujale mein
siwa tumhaare mujhe kuchh nazar nahin aata
hayat nam hai yaadon ka, talkh aur shirin
bhala kisi ne kabhi rang o bu ko pakda hai
shafaq ko qaid mein rakkha saba ko band kiya
har ek lamha gurezan hai, jaise dushman hai
na tum milogi na main, hum bhi donon lamhe hain
wo lamhe ja ke jo wapas kabhi nahin aate!

Don't have an account? Sign up

Forgot your password?

Error message here!

Error message here!

Hide Error message here!

Error message here!

OR
OR

Lost your password? Please enter your email address. You will receive a link to create a new password.

Error message here!

Back to log-in

Close