Muddat Se Lapata Hai Khudaa Jaane Kya Hua

Muddat Se Lapata Hai Khudaa Jaane Kya Hua,

Phirta Tha Ek Shakhs Tumhein Puchta Huaa



Wo Zindgi Thi Aap The Ya Koi Khwab Tha,

Jo Kuch Tha Ek Lamhe Ko Bas Samna Hua



Hum Ne Tere Bagair Bhi Jee Kar Dikha Diya,

Ab Ye Sawal Kya Hai Ki Phir Dil Ka Kya Hua



So Bhi Wo Tu Na Dekh Saki Ai Hawa-e-Dahar,

Seene Mein Ik Charag Rakha Tha Jala Hua



Duniya Ko Zid Numaish-e-Zakhm-e-Jigar Se Thi,

Fariyad Maine Kee Na Zamana Khafa Hua



Har Anjuman Mein Dhyaan Usi Anjuman Ka Hai,

Jagaa Ho Jaise Khwaab Koi Dekhta Hua



Ye Iztiraab-e-Shauq Hai 'Akhtar' Ki Gum-Rahi,

Main Apne Kaafile Se Hun Koson Badha Hua!

pahli nazm

dewta ke gun gane walon udta suraj kya hai
udta suraj ek paheli badi purani
suna ambar jis ko har din dohraata hai
aprampar andheron mein wo an-jaani
maut ki jaanib jadu ki naw pe chadha
dur bahut hi dur ko udta jata hai
udta suraj kya hai bhagto ek rupahli
shan hai chandi ka shoala hai
uthti aur nikharti kheti pakta phal hai
lal lahu mein lahren leti garmahat hai
is baste sansar mein chamkila din hai
udta suraj kya hai ki do dhan hai
soz bhari ya jalta hai ambar pe diya
aasmanon aur zaminon ke raja ka
din aur din ke bich mein aane wale thande
andhiyare mein dil ko dhaaras dene wala
dhyan jo fawware ki surat nur bikhere
udta suraj kya hai aankho hai
bade gyani chitrkar ki jaanta hai jo
apne kaam ke sare nukton ko baaton ko
aur ambar par sanjh sawere khinchta hai wo
apne dil ke bijon ki rang birangi
jalti aur dahakti parton ki taswiren
udta suraj kya hai aag hai
jo sansar ke sare jine walon ki
rag rag aur reshe reshe mein jalti hai

music director

kabhi sare kabhi gama kabhi padha kabhi nisa
masala jaan kar is nai sada har git ko paisa
kabhi us ne mila dekha jo muli ko chuqandar se
to laya dur ki kaudi ye sargam ke samundar se
banai jo bhi tarz us ne wo fan ki jaan hoti thi
ki us mein unt ki gardan se lambi tan hoti thi
nahin tha chor lekin koi tohmat aa bhi jati thi
kisi ki dhun se us ki dhun kabhi takra bhi jati thi
kiye hain bhanje recording mein shamil-e-baja
likhaya git bawarchi se us ne aasure-raja
ye aksar shairon ko be-tarah islah deta hai
aur us par apne sazindon se khul kar dad leta hai
mohurat par sada us ke lage mein haar hote the
zarurat par use do ghont bhi darkar hote the
barhaman ko gawain thumriyan is ne shiwale mein
khuda-bakhshe bahut si khubiyan thin marne wale mein

himmat-e-mardan

nai tahzib ne barbaad ghaarat kar diya bilkul
hum apne mulk se ab is ko ghaarat kar ke chhodenge
hamare ilm o fan sab is ne rukhsat kar diye hum se
hum ab hindostan se is ko rukhsat kar ke chhodenge
ghulami ne hamare sare jauhar khak kar dale
hum apne mulk se dur ab ye lanat kar ke chhodenge
hum apne mulk par qabza karenge jis tarah hoga
zaban-e-be-kasi se khatm hujjat kar ke chhodenge
fana kar denge ahl-e-jabr-o-istibdad ki hasti
zamin mein dafn rasm-e-jahal-o-wahshat kar ke chhodenge
mita dalenge hum har khud-sar o maghrur ka ghurra
tah-o-baala nizam-e-kibr-o-nakhwat kar ke chhodenge
hata denge har ek sang-e-giran ko apne raste se
numayan apni shan-e-istaqamat kar ke chhodenge
agar koh-e-giran bhi hoga apni rah mein hail
use bhi paemal-e-azm-o-himmat kar ke chhodenge
gharaz ab ye tahayya kar liya hai mustaqil hum ne
fana ek din ye taghuti hukumat kar ke chhodenge

begam aur shaeri

ek din mujh se ye farmane lagi biwi meri
meri sautan ban gai hai aap ki ye shaeri
wo ye kah kar mujh se karti hai hamesha ehtijaj
shaeri se aap ki hota hai mujh ko ikhtilaj
sochti hun kis tarah hoga hamara ab nibah
mujh ko roti chahiye aur aap ko bas wah wah
mujh ko rahti hai sada bachchon ke mustaqbil ki dhun
aap baithe kar rahe hain faelatun faelun
raat kafi ho chuki hai nind mein bachche hain dhut
aap yun sakit hue baithe hain jaise koi but
main ye kahti hun chuka dije jo pichhla qarz hai
aap apni dhun mein kahte hain ki matla arz hai
main ye kahti hun ki dekha kijiye mauqa-mahal
chhed dete hain kahin bhi ghair-matbua ghazal
man leti hun main chaliye aap hain shaer great
shaeri se bhar nahin sakta magar bachchon ka pet
apne hindustan mein murda-parasti aam hai
jitne shaer mar chuke hain bas unhin ka nam hai
jab talak zinda rahe paise na the karne ko kharch
mar gae to ho rahi hai mirza-'ghaalib' par research
main ye bola band kar apna ye ba-huda kalam
tujh ko kya malum kya hai ek shaer ka maqam
jhut hai shamil tasanno hai na kuchh is mein darogh
shaeri se pa rahi hai aaj bhi urdu farogh
hun sana-khwan main 'figar'-o-'saghar'-o-'shahbaz' ka
rukh badal dala jinhon ne sher ke parwaz ka

Don't have an account? Sign up

Forgot your password?

Error message here!

Error message here!

Hide Error message here!

Error message here!

OR
OR

Lost your password? Please enter your email address. You will receive a link to create a new password.

Error message here!

Back to log-in

Close