magar zulm ke KHilaf

hum amn chahte hain magar zulm ke khilaf
gar jang lazmi hai to phir jang hi sahi
zalim ko jo na roke wo shamil hai zulm mein
qatil ko jo na toke wo qatil ke sath hai
hum sar-ba-kaf uthe hain ki haq fatah-yab ho
kah do use jo lashkar-e-baatil ke sath hai
is dhang par hai zor to ye dhang hi sahi
zalim ki koi zat na mazhab na koi qaum
zalim ke lab pe zikr bhi in ka gunah hai
phalti nahin hai shakh-e-sitam is zamin par
tarikh jaanti hai zamana gawah hai
kuchh kor-baatinon ki nazar tang hi sahi
ye zar ki jang hai na zaminon ki jang hai
ye jang hai baqa ke usulon ke waste
jo khun hum ne nazr diya hai zamin ko
wo khun hai gulab ke phulon ke waste
phutegi subh-e-amn lahu-rang hi sahi

KHun phir KHun hai

zulm phir zulm hai badhta hai to mit jata hai
khun phir khun hai tapkega to jam jaega
khak-e-sahra pe jame ya kaf-e-qatil pe jame
farq-e-insaf pe ya pa-e-salasil pe jame
tegh-e-be-dad pe ya lasha-e-bismil pe jame
khun phir khun hai tapkega to jam jaega
lakh baithe koi chhup-chhup ke kamin-gahon mein
khun khud deta hai jalladon ke maskan ka suragh
sazishen lakh udati rahin zulmat ki naqab
le ke har bund nikalti hai hatheli pe charagh
zulm ki qismat-e-nakara-o-ruswa se kaho
jabr ki hikmat-e-parkar ke ima se kaho
mahmil-e-majlis-e-aqwam ki laila se kaho
khun diwana hai daman pe lapak sakta hai
shoala-e-tund hai khirman pe lapak sakta hai
tum ne jis khun ko maqtal mein dabana chaha
aaj wo kucha o bazar mein aa nikla hai
kahin shoala kahin nara kahin patthar ban kar
khun chalta hai to rukta nahin sanginon se
sar uthata hai to dabta nahin aainon se
zulm ki baat hi kya zulm ki auqat hi kya
zulm bas zulm hai aaghaz se anjam talak
khun phir khun hai sau shakl badal sakta hai
aisi shaklen ki mitao to mitae na bane
aaise shoale ki bujhao to bujhae na bane
aaise nare ki dabao to dabae na bane

jaan beTa KHilafat pe de do

bolin aman 'mohammad-ali' ki
jaan beta khilafat pe de do
sath tere hain 'shaukat-ali' bhi
jaan beta khilafat pe de do
gar zara sust dekhungi tum ko
dudh hargiz na bakhsungi tum ko
main dilawar na samjhungi tum ko
jaan beta khilafat pe de do
ghaib se meri imdad hogi
ab hukumat ye barbaad hogi
hashr tak ab na aabaad hogi
jaan beta khilafat pe de do
khansi aae agar tum ko jaani
mangna mat hukumat se pani
budhi aman ka kuchh gham na karna
kalma padh padh khilafat pe marna
pure us imtihan mein utarna
jaan beta khilafat pe de do
hote mere agar sat bete
karti sab ko khilafat pe sadqe
hain yahi din-e-ahmad ke raste
jaan beta khilafat pe de do
hashr mein hashr barpa karungi
pesh-e-haq tum ko le ke chalungi
is hukumat pe dawa karungi
jaan beta khilafat pe de do
chain hum ne 'shafiq' ab na paya
jaan beta khilafat pe de do

dawat-e-inqilab

kya lega khak-e-murda-o-uftada ban ke tu
tufan ban ki hai teri fitrat mein inqalab
kyun timtimae kirmak-e-shab-tab ki tarah
ban sakta hai tu auj-e-falak par agar shahab
wo khak ho ki jis mein milen reza-ha-e-zar
wo sang ban ki jis se nikalte hain lal-e-nab
chidiyon ki tarah dane pe girta hai kis liye
parwaz rakh buland ki tu ban sake uqab
wo chashma ban ki jis se hon sarsabz khetiyan
rah-rau ko tu fareb na de surat-e-sarab

aurat

uth meri jaan mere sath hi chalna hai tujhe
qalb-e-mahaul mein larzan sharar-e-jang hain aaj
hausle waqt ke aur zist ke yak-rang hain aaj
aabginon mein tapan walwala-e-sang hain aaj
husn aur ishq ham-awaz o ham-ahang hain aaj
jis mein jalta hun usi aag mein jalna hai tujhe
uth meri jaan mere sath hi chalna hai tujhe
tere qadmon mein hai firdaus-e-tamaddun ki bahaar
teri nazron pe hai tahzib o taraqqi ka madar
teri aaghosh hai gahwara-e-nafs-o-kirdar
ta-ba-kai gird tere wahm o tayyun ka hisar
kaund kar majlis-e-khalwat se nikalna hai tujhe
uth meri jaan mere sath hi chalna hai tujhe
tu ki be-jaan khilaunon se bahal jati hai
tapti sanson ki hararat se pighal jati hai
panw jis rah mein rakhti hai phisal jati hai
ban ke simab har ek zarf mein dhal jati hai
zist ke aahani sanche mein bhi dhalna hai tujhe
uth meri jaan mere sath hi chalna hai tujhe
zindagi jehd mein hai sabr ke qabu mein nahin
nabz-e-hasti ka lahu kanpte aansu mein nahin
udne khulne mein hai nikhat kham-e-gesu mein nahin
jannat ek aur hai jo mard ke pahlu mein nahin
us ki aazad rawish par bhi machalna hai tujhe
uth meri jaan mere sath hi chalna hai tujhe
goshe goshe mein sulagti hai chita tere liye
farz ka bhes badalti hai qaza tere liye
qahr hai teri har ek narm ada tere liye
zahr hi zahr hai duniya ki hawa tere liye
rut badal dal agar phulna phalna hai tujhe
uth meri jaan mere sath hi chalna hai tujhe
qadr ab tak teri tarikh ne jaani hi nahin
tujh mein shoale bhi hain bas ashk-fishani hi nahin
tu haqiqat bhi hai dilchasp kahani hi nahin
teri hasti bhi hai ek chiz jawani hi nahin
apni tarikh ka unwan badalna hai tujhe
uth meri jaan mere sath hi chalna hai tujhe
tod kar rasm ka but band-e-qadamat se nikal
zof-e-ishrat se nikal wahm-e-nazakat se nikal
nafs ke khinche hue halqa-e-azmat se nikal
qaid ban jae mohabbat to mohabbat se nikal
rah ka khar hi kya gul bhi kuchalna hai tujhe
uth meri jaan mere sath hi chalna hai tujhe
tod ye azm-shikan daghdagha-e-pand bhi tod
teri khatir hai jo zanjir wo saugand bhi tod
tauq ye bhi hai zamurrad ka gulu-band bhi tod
tod paimana-e-mardan-e-khirad-mand bhi tod
ban ke tufan chhalakna hai ubalna hai tujhe
uth meri jaan mere sath hi chalna hai tujhe
tu falatun o arastu hai tu zahra parwin
tere qabze mein hai gardun teri thokar mein zamin
han utha jald utha pa-e-muqaddar se jabin
main bhi rukne ka nahin waqt bhi rukne ka nahin
ladkhadaegi kahan tak ki sambhalna hai tujhe
uth meri jaan mere sath hi chalna hai tujhe

mulaqat

ye raat us dard ka shajar hai
jo mujh se tujh se azim-tar hai
azim-tar hai ki is ki shakhon
mein lakh mishal-ba-kaf sitaron
ke karwan ghar ke kho gae hain
hazar mahtab is ke sae
mein apna sab nur ro gae hain
ye raat us dard ka shajar hai
jo mujh se tujh se azim-tar hai
magar isi raat ke shajar se
ye chand lamhon ke zard patte
gire hain aur tere gesuon mein
ulajh ke gulnar ho gae hain
isi ki shabnam se khamushi ke
ye chand qatre teri jabin par
baras ke hire piro gae hain
2
bahut siyah hai ye raat lekin
isi siyahi mein runuma hai
wo nahr-e-khun jo meri sada hai
isi ke sae mein nur gar hai
wo mauj-e-zar jo teri nazar hai
wo gham jo is waqt teri banhon
ke gulsitan mein sulag raha hai
wo gham jo is raat ka samar hai
kuchh aur tap jae apni aahon
ki aanch mein to yahi sharar hai
har ek siyah shakh ki kaman se
jigar mein tute hain tir jitne
jigar se noche hain aur har ek
ka hum ne tesha bana liya hai
3
alam-nasibon jigar-figaron
ki subh aflak par nahin hai
jahan pe hum tum khade hain donon
sahar ka raushan ufuq yahin hai
yahin pe gham ke sharar khil kar
shafaq ka gulzar ban gae hain
yahin pe qatil dukhon ke teshe
qatar andar qatar kirnon
ke aatishin haar ban gae hain
ye gham jo is raat ne diya hai
ye gham sahar ka yaqin bana hai
yaqin jo gham se karim-tar hai
sahar jo shab se azim-tar hai

Don't have an account? Sign up

Forgot your password?

Error message here!

Error message here!

Hide Error message here!

Error message here!

OR
OR

Lost your password? Please enter your email address. You will receive a link to create a new password.

Error message here!

Back to log-in

Close