har adawat ki ibtida hai ishq

har adawat ki ibtida hai ishq
ki mohabbat ki intiha hai ishq
lo zulekha ko kab hua hai ishq
kis qadar taqat-azma hai ishq
falak o muddai o yar o ajal
sab bhale hain magar bura hai ishq
dekhiye is ka hoga kya anjam
ab khuda se hamein hua hai ishq
ho chuka hum se kuchh jo hona tha
tu ne ye haal kya kiya hai ishq
wamiq-o-qais-o-kohkan kya the
ajal-o-afat-o-bala hai ishq
dekhna shauq-o-sharm ka shewa
husn-e-khud-bin hai khud-numa hai ishq
kaun jaane tha us ka nam-o-numud
meri barbaadi se bana hai ishq
dil karo khun to kya hai dildari
jaan jati rahe to kya hai ishq
gham-zadai mein gham-faza kya kuchh
dil-ruba ya na jaan-ruba hai ishq
ba-wafa wo hain bewafa hai husn
bewafa hum hain ba-wafa hai ishq
ghamza sa ghamza gham mein karta hai
kuchh se kuchh ab to ho gaya hai ishq
kaise kaison ki us ne li hai jaan
dekhna kya hi khush-ada hai ishq
kyun ke matam na ab wafa ka rahe
mere marte hi mar mita hai ishq
dekhna marg-o-zist ke jhagde
jaan-faza husn-o-jaan-guza hai ishq
waisa hi hai farishta jaisi ruh
ai 'qalaq' tera aashna hai ishq

bhiD mein koi shanasa bhi nahin chhoDti hai

bhid mein koi shanasa bhi nahin chhodti hai
zindagi mujh ko akela bhi nahin chhodti hai
aafiyat ka koi gosha bhi nahin chhodti hai
aur duniya mera rasta bhi nahin chhodti hai
mujh ko ruswa bhi bahut karti hai shohrat ki hawas
aur shohrat mera pichha bhi nahin chhodti hai
hum ko do ghont ki khairaat hi de do warna
pyas pagal ho to dariya bhi nahin chhodti hai
aabru ke liye roti hai bahut pichhle pahar
ek aurat ki jo pesha bhi nahin chhodti hai
dubne wale ke hathon mein ye pagal duniya
ek tuta hua tinka bhi nahin chhodti hai
ab ke jab ganw se laute to ye ehsas hua
dushmani khun ka rishta bhi nahin chhodti hai
kya mukammal hai judai ki bichhad jaane ke baad
tujh se milne ka bahana bhi nahin chhodti hai
jaante sab the ki nafrat ki ye kali aandhi
dasht to dasht hain dariya bhi nahin chhodti hai

ranjish hi sahi dil hi dukhane ke liye aa

ranjish hi sahi dil hi dukhane ke liye aa
aa phir se mujhe chhod ke jaane ke liye aa
even if you are annoyed come just to give me pain
come even if you have to then leave me yet again
kuchh to mere pindar-e-mohabbat ka bharam rakh
tu bhi to kabhi mujh ko manane ke liye aa
the notion of my love's self-pride please do pacify
you should surely come one day and try to mollify
pahle se marasim na sahi phir bhi kabhi to
rasm-o-rah-e-duniya hi nibhane ke liye aa
even tho no longer close we are as used to be
come even if it's purely for sake of formality
kis kis ko bataenge judai ka sabab hum
tu mujh se khafa hai to zamane ke liye aa
the reason for our parting to whom should i relate
if cross with methen come and to the world narrate
ek umr se hun lazzat-e-girya se bhi mahrum
ai rahat-e-jaan mujh ko rulane ke liye aa
a lifetime have i missed the joy of tearful ecstasy
life's comfort thus to make me cry, you should come to me
ab tak dil-e-khush-fahm ko tujh se hain ummiden
ye aakhiri shamen bhi bujhane ke liye aa
my heart is optimistic yet, its hopes are still alive
come to snuff it out, let not this final flame survive

na bewafai ka Dar tha na gham judai ka

na bewafai ka dar tha na gham judai ka
maza mein kya kahun aaghaz-e-ashnai ka
kahan nahin hai tamasha teri khudai ka
magar jo dekhne de roab kibriyai ka
wo na-tawan hun agar nabz ko hui jumbish
to saf jod juda ho gaya kalai ka
shab-e-visal bahut kam hai aasman se kaho
ki jod de koi tukda shab-e-judai ka
ye josh-e-husn se tang aai hai qaba in ki
ki band band hai khwahan girah-kushai ka
kaman hath se rakh said-gah-e-irfan mein
ki tir said hai yan dam-e-na-rasai ka
wo bad-nasib hun yar aae mere ghar to bane
simat ke wasl ki shab til rukh-e-judai ka
hazaron kafir o momin pade hain sajde mein
buton ke ghar mein bhi saman hai khudai ka
tamam ho gae hum pahle hi nigah mein haif
na raat wasl ki dekhi na din judai ka
nahin hai mohr lifafa pe khat ke ai qasid
ye dagh hai meri qismat ki na-rasai ka
naqab dal ke ai aaftab-e-hashr nikal
khuda se dar ye kahin din hai khud-numai ka
nahin qarar ghadi bhar kisi ke pahlu mein
ye zauq hai tere nawak ko dilrubai ka
mari taraf se koi ja ke kohkan se kahe
nahin nahin ye mahal zor-azmai ka
kaha jo main ne ki main khak-e-rah hun tera
to bole hai abhi pindar khud-numai ka
junun jo meri taraf ho wo jast-o-khez karun
ki dil ho tut ke tukde shikasta-pai ka
'amir' rawayye apne nasib ko aisa
ki ho saped siyah abr na-rasai ka

chupke chupke raat din aansu bahana yaad hai

chupke chupke raat din aansu bahana yaad hai
hum ko ab tak aashiqi ka wo zamana yaad hai
ba-hazaran iztirab o sad-hazaran ishtiyaq
tujh se wo pahle-pahal dil ka lagana yaad hai
bar bar uthna usi jaanib nigah-e-shauq ka
aur tera ghurfe se wo aankhen ladana yaad hai
tujh se kuchh milte hi wo bebak ho jaana mera
aur tera danton mein wo ungli dabana yaad hai
khinch lena wo mera parde ka kona dafatan
aur dupatte se tera wo munh chhupana yaad hai
jaan kar sona tujhe wo qasd-e-pa-bosi mera
aur tera thukra ke sar wo muskurana yaad hai
tujh ko jab tanha kabhi pana to az-rah-e-lihaz
haal-e-dil baaton hi baaton mein jatana yaad hai
jab siwa mere tumhaara koi diwana na tha
sach kaho kuchh tum ko bhi wo kar-khana yaad hai
ghair ki nazron se bach kar sab ki marzi ke khilaf
wo tera chori-chhupe raaton ko aana yaad hai
aa gaya gar wasl ki shab bhi kahin zikr-e-firaq
wo tera ro ro ke mujh ko bhi rulana yaad hai
dopahar ki dhup mein mere bulane ke liye
wo tera kothe pe nange panw aana yaad hai
aaj tak nazron mein hai wo sohbat-e-raaz-o-niyaz
apna jaana yaad hai tera bulana yaad hai
mithi mithi chhed kar baaten nirali pyar ki
zikr dushman ka wo baaton mein udana yaad hai
dekhna mujh ko jo bargashta to sau sau naz se
jab mana lena to phir khud ruth jaana yaad hai
chori chori hum se tum aa kar mile the jis jagah
muddaten guzrin par ab tak wo thikana yaad hai
shauq mein mehndi ke wo be-dast-o-pa hona tera
aur mera wo chhedna wo gudgudana yaad hai
bawajud-e-iddia-e-ittiqa 'hasrat' mujhe
aaj tak ahd-e-hawas ka wo fasana yaad hai

barbaad-e-mohabbat ki dua sath liye ja

barbaad-e-mohabbat ki dua sath liye ja
tuta hua iqrar-e-wafa sath liye ja
ek dil tha jo pahle hi tujhe saunp diya tha
ye jaan bhi ai jaan-e-ada sath liye ja
tapti hui rahon se tujhe aanch na pahunche
diwanon ke ashkon ki ghata sath liye ja
shamil hai mera khun-e-jigar teri hina mein
ye kam ho to ab khun-e-wafa sath liye ja
hum jurm-e-mohabbat ki saza paenge tanha
jo tujh se hui ho wo khata sath liye ja

Don't have an account? Sign up

Forgot your password?

Error message here!

Error message here!

Hide Error message here!

Error message here!

OR
OR

Lost your password? Please enter your email address. You will receive a link to create a new password.

Error message here!

Back to log-in

Close