marne ki duaen kyun mangun jine ki tamanna kaun kare

marne ki duaen kyun mangun jine ki tamanna kaun kare
ye duniya ho ya wo duniya ab khwahish-e-duniya kaun kare
jab kashti sabit-o-salim thi sahil ki tamanna kis ko thi
ab aisi shikasta kashti par sahil ki tamanna kaun kare
jo aag lagai thi tum ne us ko to bujhaya ashkon ne
jo ashkon ne bhadkai hai us aag ko thanda kaun kare
duniya ne hamein chhoda 'jazbi' hum chhod na den kyun duniya ko
duniya ko samajh kar baithe hain ab duniya duniya kaun kare

hasti apni habab ki si hai

hasti apni habab ki si hai
ye numaish sarab ki si hai
my life is like a bubble now
mirage-like appears this show
nazuki us ke lab ki kya kahiye
pankhudi ek gulab ki si hai
the softness of her lips is close
to velvet petals of a rose
chashm-e-dil khol is bhi aalam par
yan ki auqat khwab ki si hai
do let your heart's eye see this world
tis but a dreamlike state unfurled
bar bar us ke dar pe jata hun
haalat ab iztirab ki si hai
repeatedly to her address
i go, lo, such is my distress
nuqta-e-khal se tera abru
bait ek intikhab ki si hai
your brow inscribed upon your skin
a line of poetry akin
main jo bola kaha ki ye aawaz
usi khana-kharab ki si hai
when i spoke out, she did complain
"that derelict is here again"
aatish-e-gham mein dil bhuna shayad
der se bu kabab ki si hai
this heart long burnt in sorrow's hell
there is a barbecue like smell
dekhiye abr ki tarah ab ke
meri chashm-e-pur-ab ki si hai
just as a monsoon cloud appears
these eyes of mine are full of tears
'mir' un nim-baz aankhon mein
sari masti sharab ki si hai
miir in her half-ope eyes there is
the fullness of wine's heady bliss

ek hi muzhda subh lati hai

ek hi muzhda subh lati hai
dhup aangan mein phail jati hai
rang-e-mausam hai aur baad-e-saba
shahr kuchon mein khak udati hai
farsh par kaghaz udte phirte hain
mez par gard jamti jati hai
sochta hun ki us ki yaad aakhir
ab kise raat bhar jagati hai
main bhi izn-e-nawa-gari chahun
be-dili bhi to lab hilati hai
so gae ped jag uthi khushbu
zindagi khwab kyun dikhati hai
us sarapa wafa ki furqat mein
khwahish-e-ghair kyun satati hai
aap apne se ham-sukhan rahna
ham-nashin sans phul jati hai
kya sitam hai ki ab teri surat
ghaur karne pe yaad aati hai
kaun is ghar ki dekh-bhaal kare
roz ek chiz tut jati hai

duniya meri bala jaane mahngi hai ya sasti hai

duniya meri bala jaane mahngi hai ya sasti hai
maut mile to muft na lun hasti ki kya hasti hai
aabaadi bhi dekhi hai virane bhi dekhe hain
jo ujde aur phir na base dil wo nirali basti hai
khud jo na hone ka ho adam kya use hona kahte hain
nist na ho to hast nahin ye hasti kya hasti hai
ijz-e-gunah ke dam tak hain ismat-e-kaamil ke jalwe
pasti hai to bulandi hai raaz-e-bulandi pasti hai
jaan si shai bik jati hai ek nazar ke badle mein
aage marzi gahak ki in damon to sasti hai
wahshat-e-dil se phirna hai apne khuda se phir jaana
diwane ye hosh nahin ye to hosh-parasti hai
jag suna hai tere baghair aankhon ka kya haal hua
jab bhi duniya basti thi ab bhi duniya basti hai
aansu the so khushk hue ji hai ki umda aata hai
dil pe ghata si chhai hai khulti hai na barasti hai
dil ka ujadna sahl sahi basna sahl nahin zalim
basti basna khel nahin baste baste basti hai
'fani' jis mein aansu kya dil ke lahu ka kal na tha
hae wo aankh ab pani ki do bundon ko tarasti hai

Don't have an account? Sign up

Forgot your password?

Error message here!

Error message here!

Hide Error message here!

Error message here!

OR
OR

Lost your password? Please enter your email address. You will receive a link to create a new password.

Error message here!

Back to log-in

Close