mazduron ka git

mehnat se ye mana chur hain hum
aaram se koson dur hain hum
par ladne par majbur hain hum
mazdur hain hum mazdur hain hum
go aafat o gham ke mare hain
hum khak nahin hain tare hain
is jag ke raj-dulare hain
mazdur hain hum mazdur hain hum
banne ki tamanna rakhte hain
mitne ka kaleja rakhte hain
sarkash hain sar uncha rakhte hain
mazdur hain hum mazdur hain hum
har chand ki hain adbar mein hum
kahte hain khule bazar mein hum
hain sab se bade sansar mein hum
mazdur mein hum mazdur hain hum
jis samt badha dete hain qadam
jhuk jate hain shahon ke parcham
sawant hain hum balwant hain hum
mazdur hain hum mazdur hain hum
go jaan pe lakhon bar bani
kar guzre magar jo ji mein thani
hum dil ke khare baaton ke dhani
mazdur hain hum mazdur hain hum
hum kya hain kabhi dikhla denge
hum nazm-e-kuhan ko dha denge
hum arz-o-sama ko hila denge
mazdur hain hum mazdur hain hum
hum jism mein taqat rakhte hain
sinon mein hararat rakhte hain
hum azm-e-baghawat rakhte hain
mazdur hain hum mazdur hain hum
jis roz baghawat kar denge
duniya mein qayamat kar denge
khwabon ko haqiqat kar denge
mazdur hain hum mazdur hain hum
hum qabza karenge daftar par
hum war karenge qaisar par
hum tut padenge lashkar par
mazdur hain hum mazdur hain hum

mazdur ki bansuri

mazdur hain ham, mazdur hain ham, majbur the ham, majbur hain hum
insaniyat ke sine mein rista hua ek nasur hain hum
daulat ki aankhon ka surma banta hai hamari haddi se
mandir ke diye bhi jalte hain mazdur ki pighli charbi se
hum se bazar ki raunaq hai, hum se chehron ki lali hai
jalta hai hamare dil ka diya duniya ki sabha ujyali hai
daulat ki sewa karte hain thukrae hue hum daulat ke
mazdur hain ham, mazdur hain hum sautele bete qismat ke
sone ki chatai tak bhi nahin, hum zat ke itne hete hain
ye sejon par sone wale shayad bhagwan ke bete hain
hum mein nahin koi tabdili jade ki pali raaton mein
baisakh ke tapte mausam mein, sawan ki bhari barsaton mein
kapde ki zarurat hi kya hai mazduron ko, haiwanon ko
kya bahs hai, sardi garmi se lohe ke bane insanon ko
hone do charaghan mahlon mein, kya hum ko agar diwali hai
mazdur hain ham, mazdur hain ham, mazdur ki duniya kali hai
mazdur ke bachche takte hain jab hasrat se dukanon ko
mazdur ka dil deta hai dua dewtaon ko, bhagwanon ko
khaya mitti ke bartan mein, soe to bichhaune ko tarse
mukhtaron par tanqiden hain, be-chaargiyan majburon ki
sukha chehra dahqanon ka, zakhmi pithen mazduron ki
wo bhukon ke an-data hain, haq un ka hai be-dad karen
hum kis darwaze par jaen kis se ja kar fariyaad karen
bazar-e-tamaddun bhi un ka duniya-e-siyasat bhi un ki
mazhab ka irada bhi un ka, duniya-e-siyasat bhi un ki
paband hamein karne ke liye sau rahen nikali jati hain
qanun banae jate hain, zanjiren dhaali jati hain
phir bhi aaghaz ki shokhi mein anjam dikhai deta hai
hum chup hain lekin fitrat ka insaf duhai deta hai
uth baithe angdai le kar jo ghaflat ka matwala hai
aakash ke tewar kahte hain, tufan phir aane wala hai
ek abr ka tukda aata hai, ek abr ka tukda jata hai
ya khwab-e-pareshan duniya ka baala-e-faza mandlata hai
chalti hai zamane mein aandhi shaer ke tund khayalon ki
is tez hawa mein khair nahin hai unchi pagdi walon ki
ehsas-e-khudi mazlumon ka ab chaunk ke karwat leta hai
jo waqt ki aane wala hai dil us ki aahat leta hai
tufan ki lahren jag uthin so kar apne gahware se
kuchh tinke shokhi karte hain sailab ke sarkash dhaare se
mindil saron se girti hai aur panw se rondi jati hai
sine mein ghataon ki bijli, bechain hai kaundi jati hai
manzar ki kudurat dho degi dharti ki pyas bujhaegi
mausam ke ishaare kahte hain ye badli kuchh barsaegi
ye abr jo ghir kar aata hai, gar aaj nahin kal barsega
sab khet hare ho jaenge jab tut ke baadal barsega

kisan

chir ke sal mein do bar zamin ka sina
dafn ho jata hun
gudgudate hain jo suraj ke sunahre nakhun
phir nikal aata hun
ab nikalta hun to itna ki batore jo koi daman mein
daman phat jae
ghar ke jis kone mein le ja ke koi rakh de mujhe
bhuk wahan se hat jae
phir mujhe piste hain, gundhte hain, senkte hain
gundhne senkne mein shakl badal jati hai
aur ho jati hai mushkil pahchan
phir bhi rahta hun kisan
wahi khasta, bad-haal
qarz ke panja-e-khunin mein nidhaal
is daranti ke tufail
kuchh hai mazi se ghanimat mera haal
haal se hoga hasin istiqbaal
uthte suraj ko zara dekho to
ho gaya sara ufuq laln-lal

niwala

man hai resham ke kar-khane mein
bap masruf suti mill mein hai
kokh se man ki jab se nikla hai
bachcha kholi ke kale dil mein hai
jab yahan se nikal ke jaega
kar-khanon ke kaam aaega
apne majbur pet ki khatir
bhuk sarmae ki badhaega
hath sone ke phul uglenge
jism chandi ka dhan lutaega
khidkiyan hongi bank ki raushan
khun us ka diye jalaega
ye jo nanha hai bhola-bhaala hai
sirf sarmae ka niwala hai
puchhti hai ye us ki khamoshi
koi mujh ko bachane wala hai

Don't have an account? Sign up

Forgot your password?

Error message here!

Error message here!

Hide Error message here!

Error message here!

OR
OR

Lost your password? Please enter your email address. You will receive a link to create a new password.

Error message here!

Back to log-in

Close