meri aankhon mein tere pyar ka aansu aae

meri aankhon mein tere pyar ka aansu aae
koi khushbu main lagaun teri khushbu aae
waqt-e-rukhsat kahin tare kahin jugnu aae
haar pahnane mujhe phul se bazu aae
main ne din raat khuda se ye dua mangi thi
koi aahat na ho dar par mere jab tu aae
in dinon aap ka aalam bhi ajab aalam hai
tir khaya hua jaise koi aahu aae
us ki baaten ki gul-o-lala pe shabnam barse
sab ko apnane ka us shokh ko jadu aae
us ne chhu kar mujhe patthar se phir insan kiya
muddaton baad meri aankhon mein aansu aae

KHafa hona zara si baat par talwar ho jaana

khafa hona zara si baat par talwar ho jaana
magar phir khud-ba-khud wo aap ka gulnar ho jaana
kisi din meri ruswai ka ye karan na ban jae
tumhaara shahr se jaana mera bimar ho jaana
wo apna jism sara saunp dena meri aankhon ko
meri padhne ki koshish aap ka akhbar ho jaana
kabhi jab aandhiyan chalti hain hum ko yaad aata hai
hawa ka tez chalna aap ka diwar ho jaana
bahut dushwar hai mere liye us ka tasawwur bhi
bahut aasan hai us ke liye dushwar ho jaana
kisi ki yaad aati hai to ye bhi yaad aata hai
kahin chalne ki zid karna mera tayyar ho jaana
kahani ka ye hissa ab bhi koi khwab lagta hai
tera sar par bitha lena mera dastar ho jaana
mohabbat ek na ek din ye hunar tum ko sikha degi
baghawat par utarna aur khud-mukhtar ho jaana
nazar nichi kiye us ka guzarna pas se mere
zara si der rukna phir saba-raftar ho jaana

garmi-e-hasrat-e-nakaam se jal jate hain

garmi-e-hasrat-e-nakaam se jal jate hain
hum charaghon ki tarah sham se jal jate hain
i burn up in the flames of unfulfilled desire
like lanterns are, at eventide i am set afire
shama jis aag mein jalti hai numaish ke liye
hum usi aag mein gumnam se jal jate hain
the fire,that the flame burns in, for all to see
in that very fire i do burn but namelessly
bach nikalte hain agar aatish-e-sayyal se hum
shola-e-ariz-e-gulfam se jal jate hain
if from the hunter's fire i manage to escape
i perish in the fire that's in the flower's cape
khud-numai to nahin shewa-e-arbab-e-wafa
jin ko jalna ho wo aaram se jal jate hain
exhibition's not the norm for those that faithful be
those who wish to perish then do so quietly
rabt-e-baham pe hamein kya na kahenge dushman
aashna jab tere paigham se jal jate hain
at our mutual fondness why will enemies not fret
when even friends, at your messages, are all het
jab bhi aata hai mera nam tere nam ke sath
jaane kyun log mere nam se jal jate hain
whenever my name happens to be linked to thee
i wonder why these people burn with jealousy

dil dhaDakne ka sabab yaad aaya

dil dhadakne ka sabab yaad aaya
wo teri yaad thi ab yaad aaya
aaj mushkil tha sambhalna ai dost
tu musibat mein ajab yaad aaya
din guzara tha badi mushkil se
phir tera wada-e-shab yaad aaya
tera bhula hua paiman-e-wafa
mar rahenge agar ab yaad aaya
phir kai log nazar se guzre
phir koi shahr-e-tarab yaad aaya
haal-e-dil hum bhi sunate lekin
jab wo rukhsat hua tab yaad aaya
baith kar saya-e-gul mein 'nasir'
hum bahut roe wo jab yaad aaya

ab ke tajdid-e-wafa ka nahin imkan jaanan

ab ke tajdid-e-wafa ka nahin imkan jaanan
yaad kya tujh ko dilaen tera paiman jaanan
yunhi mausam ki ada dekh ke yaad aaya hai
kis qadar jald badal jate hain insan jaanan
zindagi teri ata thi so tere nam ki hai
hum ne jaise bhi basar ki tera ehsan jaanan
dil ye kahta hai ki shayad hai fasurda tu bhi
dil ki kya baat karen dil to hai nadan jaanan
awwal awwal ki mohabbat ke nashe yaad to kar
be-piye bhi tera chehra tha gulistan jaanan
aakhir aakhir to ye aalam hai ki ab hosh nahin
rag-e-mina sulag utthi ki rag-e-jaan jaanan
muddaton se yahi aalam na tawaqqo na ummid
dil pukare hi chala jata hai jaanan jaanan
hum bhi kya sada the hum ne bhi samajh rakkha tha
gham-e-dauran se juda hai gham-e-jaanan jaanan
ab ke kuchh aisi saji mahfil-e-yaran jaanan
sar-ba-zanu hai koi sar-ba-gareban jaanan
har koi apni hi aawaz se kanp uthta hai
har koi apne hi sae se hirasan jaanan
jis ko dekho wahi zanjir-ba-pa lagta hai
shahr ka shahr hua dakhil-e-zindan jaanan
ab tera zikr bhi shayad hi ghazal mein aae
aur se aur hue dard ke unwan jaanan
hum ki ruthi hui rut ko bhi mana lete the
hum ne dekha hi na tha mausam-e-hijran jaanan
hosh aaya to sabhi khwab the reza reza
jaise udte hue auraq-e-pareshan jaanan

Don't have an account? Sign up

Forgot your password?

Error message here!

Error message here!

Hide Error message here!

Error message here!

OR
OR

Lost your password? Please enter your email address. You will receive a link to create a new password.

Error message here!

Back to log-in

Close