london mein jashn-e-ghaalib

london mein jashn-e-hazrat-e-'ghaalib' ki raat thi
tarikh-e-shaeri mein ye ek wardat thi
is jashn mein sharik the har mulk ke wafud
hal ho gaya tha masala-e-wahdat-ul-wajud
jannat se mirza ko jo kankard le chala
pur ho gaya safar se jo tha rah mein khala
mirza ke pas box mein tambaku thi faqat
custam ke afsaron ne use samjha hi ghalat
afsar ne passport jo un se talab kiya
kahne lage ki aap ne ye kya ghazab kiya
sach baat to yahi hai wo ab nek ho ki bad
mulkon ki sarhadon ko nahin mante 'asad'
tarikh ki hai fikr na jughrafie ki hai
shaer hun main talash mujhe qafiye ki hai
aam aadmi ki tarah mera passport kyun
main andalib-e-gulshan-e-na-afrida hun
main kab yahan makan banane ko aaya hun
london mein apna jashn manane ko aaya hun
angrez ke qaside jo likkhe the yaad hain
nazmen kuchh aur bhi hain jo muhtaj-e-dad hain
mujh ko numud-o-nam ki parwa nahin magar
bulwaya bbc ne to pahunchunga waqt par
'ghaalib' jo restoran mein pahunche ba-waqt-e-sham
baire se ye kaha ki karo mera intizam
mangwao wo jo aatish-e-sayyal pas hai
is balghami mizaj ko garmi hi ras hai
stage par jo ho gae ab jalwa-gar asad
ustad 'zauq' jalne lage az-rah-e-hasad
nazim mushaere ka ye bola ki hazirin
'ghaalib' ko dekhne ko na aaen tamash-bin
'ghaalib' ki shakhsiyyat mein mahasin hain be-shumar
ye aadmi wali tha na hota jo baada-khwar
ye shakhs jis ko waqt ne budha banaya hai
hum ne ise baraat ka dulha banaya hai
biwi se baat kije na sali se puchhiye
'ghaalib' ka kya maqam hai haali se puchhiye
sehhat se kam nahin hai use bahra-pan ka rog
bahra jo is ko kahte hain be-bahra hain wo log
be-tegh kyun ladega ye shaer jo hai jari
sau pusht se hai pesha-e-aba sipah-gari
ye chahta hai ghar mein teri jalwa-gah ho
dekho ise jo dida-e-ibrat nigah ho
tahzib o fan ko rang-e-mughal is ne de diya
urdu ko ek taj mahal is ne de diya
is ne zaban-e-'mir' ko hindi ka ras diya
urdu ghazal ko is ne naya canwas diya
'ghaalib' jo apne jashn mein baithe hain shan se
in ka kalam suniye ab in ki zaban se
'ghaalib' ne tis ghazlen sunain jo subh tak
har sher note karta raha munshi-e-falak
taqrib jab ye khatm hui subh ke qarib
stage ko jo dekha to ghaeb the sab adib
jalsa mein muhtamim ka bhi koi pata na tha
dariyan thin gao takiye the aur shamiyana tha
kya puchhte ho haal jo 'ghaalib' ka aaj tha
pocket mein ek paisa na tha sar pe taj tha

filmi ishq

mohabbat jis ko kahte hain badi mushkil se hoti hai
faqat ek bar hoti hai khulus-e-dil se hoti hai
jahan-e-film mein, ulfat ka har nakhra nirala hai
ye aisi dal hai jis dal mein kala hi kala hai
agar bazar mein ladki phisal jae mohabbat hai
sahaara pa ke ladke ka sambhal jae mohabbat hai
kisi ladki ko daku se chhuda kar lao ulfat ho
kisi ki bicycle se bicycle takrao ulfat ho
ye filmi ishq ne kaisa naya pahlu nikala hai
police-kaptan ki ladki ka aashiq rikshe wala hai
muqaddar ko kahin se saz-gari hi nahin milti
wahi milti hai aur koi sawari hi nahin milti
amiri par gharibi ka wo yun sikka jamata hai
kiraya tak nahin leta magar chaddi khulata hai
sar-e-bazar hero se jo accident ho jae
to us ka ishq accident se disent ho jae
ba-zahir dekhne mein sirf ek motor ki takkar hai
kisi dil-phenk se lekin kisi dilbar ki takkar hai
wo heroine ko motor mein shifa-khane bhi laega
aur us ke dil ko bahlane ko gana bhi sunaega
wo gana jis mein haal-e-dil ki puri tarjumani ho
magar ye shart hai bharpur donon ki jawani ho
wo phir motor se takkar ki shikayat bhul jaegi
wo zakhm-e-dil ke aage har jarahat bhul jaegi
janab-e-seth-sahab ki jo ek be-man ki bachchi hai
nihayat ladli hai umr pukhta aql kachchi hai
aur us ko seth ke daftar ke ek babu se ulfat hai
manager aur babu ke liye wajh-e-raqabat hai
natije mein wilen nashad hero shad hota hai
taraqqi pa ke babu seth ka damad hota hai
kabhi ladki pe jo tanha safar ka saneha guzre
to chalti rail mein bhi ishq ka ye hadsa guzre
ki hero rail ke sandas se dabbe mein aaega
aur is ke baad heroine ko bas behosh paega
wo us ke sar ko phir zanu pe rakh kar gal thapkega
aur us ki aankh se ek ishq ka aansu bhi tapkega
to heroine bhi bas ghabra ke aankhen khol dalegi
ye us ka dil sambhaalega wo is ka dil sambhaalegi
hon do bahnen badi ka un mein iklauta mangetar ho
mohabbat se bapa donon ke dil mein ek mahshar ho
ki chhoti ko bhi ulfat us se hogi barmala hogi
wo apne hone wale dulha-bhai pe fida hogi
firaq-e-yar mein gane ka ye andaz hota hai
wo jangal ho ki basti ho yaqinan saz hota hai
ghazal aadhi jo hero ne kisi jangal mein gai hai
usi ki aadhi heroine ne basti mein sunai hai
jo sazinde, pyano, woilin, tabla bajate hain
kabhi jangal mein jate hain kabhi basti mein aate hain
ye filmi ishq hai, le de ke bas is ka ye hasil hai
hamari qaum ke bachchon ke haq mein zahr-e-qatil hai
'zarif' anjam kya hoga jo mera dil bhi kho jae
kahin aisa na ho, mujh ko bhi filmi ishq ho jae

cricket match

bezar ho gae the jo shaer hayat se
cricket ka match khel liya shaeraat se
waqif na the jo dosto! aurat ki zat se
chauke laga rahe the khayalon mein raat se
aai jo subh sham ke naqshe bigad gae
sarron se hum gharibon ke stump ukhad gae
naz-o-ada o husn ne jadu jaga diye
pahle to opner ke hi chhake chhuda diye
one-down pe jo aae to stump uda diye
rah-e-farar ke bhi to raste bhula diye
go catch wery-low tha magar be-dhadak liya
ek mohtaram ko ek ne gali mein lapak liya
kya kya bayan kijiye ek ek ka bankpan
jalwa-figan zamin pe thi taron ki anjuman
husn-o-shabab o ishq se bharpur har badan
shaer pawilion mein the pahne hue kafan
jitni thin beautiful wo slip par gali pe thin
jitni thin ower-age sabhi baundary pe thin
pariyon ke jis tarah se pare koh-qaf par
ek long-on par thi to ek long-off par
ek thi cower mein ek hasina mid-off par
jo short-pich thi gend wo aati thi naf par
thahre na wo crease pe jo the bade bade
mujh jaise tim-tam to wicketon pe phat pade
wo lal gend phul ho jaise gulab ka
jis tarah dast-e-naz mein saghar sharab ka
saya hawa mein nachta tha aaftab ka
bumper mein sara zor tha husn-o-shabab ka
aise bhi apne ishq ka maidan banate the
empire har apeal par ungli uthate the
jab ball phenkti thi wo gesu sanwar ke
nazdik aur hote the haalat haar ke
kahte the match dekhne wale pukar ke
ustad ja rahe hain shab-e-gham guzar ke
ustad kah rahe the ki phatkar match par
do do jhapat rahi hain sharifon ke catch par

cricket aur mushaira

mushaire ka bhi tafrih aim hota hai
mushaire mein bhi cricket ka game hota hai
wahan jo log khiladi hain wo yahan shaer
yahan jo sadr-nashin hai wahan hai empire
wahan pe shart ki ho zor-e-bazu-e-mahmud
yahan ye qaid ki ho lahn-e-hazrat-e-daood
wahan tamaddun-e-mashriq ki maut ka gham hai
yahan adab ke janaza pe shor-e-matam hai
wahan riyaz-e-musalsal se kaam chalta hai
yahan gale ke sahaare kalam chalta hai
wahan bhi khel mein no-ball ho to faul hai
yahan bhi sher mein ihmal ho to faul hai
wahan hai lbw yahan ye chakkar hai
ki andalib muannas hai ya muzakkar hai
wahan bhi sirf muqaddar ka khel hota hai
jo unlucky hai yahan bhi wo fail hota hai
wahan hai ek hi kaptan puri team ki jaan
yahan har ek player bajae khud kaptan
yahan kuchh aise bhi kaptan pae jate hain
jo ran banate nahin hit lagae jate hain
wahan jo log anadi hain waqt katte hain
yahan bhi kuchh mutashaer dimagh chatte hain
hua kare agar score us ka zero hai
yahan jo shakhs phisaddi hai wo bhi hero hai
nigah jin ki pahunchti hai hashw o ita par
bana diya hai yahan un ko back stoper
adab-nawaz pe shout yahan bhi hote hain
ye bad-nasib ran-out yahan bhi hote hain
'hanif' bhi koi bogus cricketer to nahin
magar 'asar' se ziyaada free-hiter to nahin
baja hai 'fazl' ke sixer pe marhaba kahna
magar 'firaq' ki baundary ka kya kahna
mere khayal ko ahl-e-nazar karenge catch
mushaira bhi hai ek tarah ka cricket match

adib ki mahbuba

tumhaari ulfat mein harmonium pe 'mir' ki ghazlen ga raha hun
bahattar in mein chhupe hain nashtar jo sab ke sab aazma raha hun
bahut dinon se tumhaare jalwe 'khadija-mastur' ho gae hain
hai shukr-e-bari ki samne apne aaj phir tum ko pa raha hun
lihaf 'ismat' ka odh kar tum fasane 'manto' ke padh rahi ho
pahan ke 'bedi' ka garm coat aaj tum se aankhen mila raha hun
tumhaare ghar 'nun-mim-rashid' ka le ke aaya sifarshi khat
magar tajjub hai phir bhi tum se nahin main kuchh 'faiz' pa raha hun
bahut hai sidhi si baat meri na jaane tum kyun nahin samajhtin
qasam khuda ki kalam-e-'ghaalib' nahin main tum ko suna raha hun
tumhaari zulf-e-siyah pe tanqid kis se likhwaun tum hi bolo
'shri-ibaadat-barelwi' ko main tar de kar bula raha hun
main tum pe hun 'jaan-nisar-akhtar' qasam hai 'munshi-fida-ali' ki
bahut dinon se main tum pe 'sahir' se jadu tone kara raha hun
agar ho tum 'hajara' to phir mujh se mil ke 'masrur' kyun nahin ho
tumhaare aage 'opendr-nath-ashk' ban ke aansu baha raha hun
hasin ho zehra-jamal ho tum mujhe sata kar nihaal ho tum
tumhaare ye zulm 'qurrat-ul-ain' ko batane main ja raha hun
meri mohabbat ki dastan sun ke ro pade 'josh-malsiyani'
sukha ke pankhe se un ke aansu abhi wahan se main aa raha hun
meri tabahi pe chhap denge nuqush ka ek khas number
'tufail-sahab' ke pas sare musawwade le ke ja raha hun
'wazir-agha' pathan hain sath sath yaron ke yar bhi hain
pakad ke wo tum ko pit denge main kal unhen sath la raha hun
'hakim-yusuf-ali' ne jab meri nabz dekhi to ro ke bole
'jigar' hai zakhmi tabah gurde ye baat tum se chhupa raha hun
malihabaad aaj ja raha hun main 'josh' laun ki aam laun
hain donon chizen wahan ki achchhi main laun kya tilmila raha hun
jo hukm do 'wajida-tabassum' ka kuchh tabassum main tum ko la dun
tumhaare honton pe gham ki maujon ko dekh kar tilmila raha hun
fasana-e-ishq mukhtasar hai qasam khuda ki na bor hona
'firaq-gorakhpuri' ki ghazlen nahin main tum ko suna raha hun
meri mohabbat ki dastan ko gadhe ki mat sarguzisht samjho
main 'kirshn-chandr' nahin hun zalim yaqin tum ko dila raha hun
pilao aankhon se taki mujh ko kuchh 'al-e-ahmad-surur' aae
bahut hain gham mujh ko aashiqi ke bina piye dagmaga raha hun

Don't have an account? Sign up

Forgot your password?

Error message here!

Error message here!

Hide Error message here!

Error message here!

OR
OR

Lost your password? Please enter your email address. You will receive a link to create a new password.

Error message here!

Back to log-in

Close