magar zulm ke KHilaf

hum amn chahte hain magar zulm ke khilaf
gar jang lazmi hai to phir jang hi sahi
zalim ko jo na roke wo shamil hai zulm mein
qatil ko jo na toke wo qatil ke sath hai
hum sar-ba-kaf uthe hain ki haq fatah-yab ho
kah do use jo lashkar-e-baatil ke sath hai
is dhang par hai zor to ye dhang hi sahi
zalim ki koi zat na mazhab na koi qaum
zalim ke lab pe zikr bhi in ka gunah hai
phalti nahin hai shakh-e-sitam is zamin par
tarikh jaanti hai zamana gawah hai
kuchh kor-baatinon ki nazar tang hi sahi
ye zar ki jang hai na zaminon ki jang hai
ye jang hai baqa ke usulon ke waste
jo khun hum ne nazr diya hai zamin ko
wo khun hai gulab ke phulon ke waste
phutegi subh-e-amn lahu-rang hi sahi

jawed ke nam

dayar-e-ishq mein apna maqam paida kar
naya zamana nae subh o sham paida kar
khuda agar dil-e-fitrat-shanas de tujh ko
sukut-e-lala-o-gul se kalam paida kar
utha na shishagaran-e-farang ke ehsan
sifal-e-hind se mina o jam paida kar
main shakh-e-tak hun meri ghazal hai mera samar
mere samar se mai-e-lala-fam paida kar
mera tariq amiri nahin faqiri hai
khudi na bech gharibi mein nam paida kar

jab teri yaad ke jugnu chamke

jab teri yaad ke jugnu chamke
der tak aankh mein aansu chamke
sakht tarik hai dil ki duniya
aise aalam mein agar tu chamke
hum ne dekha sar-e-bazar-e-wafa
kabhi moti kabhi aansu chamke
shart hai shiddat-e-ehsas-e-jamal
rang to rang hai khushbu chamke
aankh majbur-e-tamasha hai 'faraaz'
ek surat hai ki har su chamke

jab hua irfan to gham aaram-e-jaan banta gaya

jab hua irfan to gham aaram-e-jaan banta gaya
soz-e-jaanan dil mein soz-e-digaran banta gaya
rafta rafta munqalib hoti gai rasm-e-chaman
dhire dhire naghma-e-dil bhi fughan banta gaya
main akela hi chala tha jaanib-e-manzil magar
log sath aate gae aur karwan banta gaya
main to jab jaanun ki bhar de saghar-e-har-khas-o-am
yun to jo aaya wahi pir-e-mughan banta gaya
jis taraf bhi chal pade hum aabla-payan-e-shauq
khar se gul aur gul se gulsitan banta gaya
sharh-e-gham to mukhtasar hoti gai us ke huzur
lafz jo munh se na nikla dastan banta gaya
dahr mein 'majruh' koi jawedan mazmun kahan
main jise chhuta gaya wo jawedan banta gaya

ab ye sochun to bhanwar zehn mein paD jate hain

ab ye sochun to bhanwar zehn mein pad jate hain
kaise chehre hain jo milte hi bichhad jate hain
kyun tere dard ko den tohmat-e-virani-e-dil
zalzalon mein to bhare shahr ujad jate hain
mausam-e-zard mein ek dil ko bachaun kaise
aisi rut mein to ghane ped bhi jhad jate hain
ab koi kya mere qadmon ke nishan dhundega
tez aandhi mein to kheme bhi ukhad jate hain
shaghl-e-arbab-e-hunar puchhte kya ho ki ye log
pattharon mein bhi kabhi aaine jad jati hain
soch ka aaina dhundla ho to phir waqt ke sath
chand chehron ke khad-o-khal bigad jate hain
shiddat-e-gham mein bhi zinda hun to hairat kaisi
kuchh diye tund hawaon se bhi lad jate hain
wo bhi kya log hain 'mohsin' jo wafa ki khatir
khud-tarashida usulon pe bhi ud jate hain

Don't have an account? Sign up

Forgot your password?

Error message here!

Error message here!

Hide Error message here!

Error message here!

OR
OR

Lost your password? Please enter your email address. You will receive a link to create a new password.

Error message here!

Back to log-in

Close