hai bikharne ko ye mahfil-e-rang-o-bu tum kahan jaoge hum kahan jaenge

hai bikharne ko ye mahfil-e-rang-o-bu tum kahan jaoge hum kahan jaenge
har taraf ho rahi hai yahi guftugu tum kahan jaoge hum kahan jaenge
har mata-e-nafas nazr-e-ahang ki hum ko yaran hawas thi bahut rang ki
gul-zamin se ubalne ko hai ab lahu tum kahan jaoge hum kahan jaenge
awwal-e-shab ka mahtab bhi ja chuka sehn-e-mai-khana se ab ufuq mein kahin
aakhir-e-shab hai khali hain jam-o-subu tum kahan jaoge hum kahan jaenge
koi hasil na tha aarzu ka magar saneha ye hai ab aarzu bhi nahin
waqt ki is masafat mein be-arzu tum kahan jaoge hum kahan jaenge
kis qadar dur se laut kar aae hain yun kaho umr barbaad kar aae hain
tha sarab apna sarmaya-e-justuju tum kahan jaoge hum kahan jaenge
ek junun tha ki aabaad ho shahr-e-jaan aur aabaad jab shahr-e-jaan ho gaya
hain ye sargoshiyan dar-ba-dar ku-ba-ku tum kahan jaoge hum kahan jaenge
dasht mein raqs-e-shauq-e-bahaar ab kahan baad-paimai-e-diwana-war ab kahan
bas guzarne ko hai mausam-e-haw-hu tum kahan jaoge hum kahan jaenge
hum hain ruswa-kun-e-dilli-o-lucknow apni kya zindagi apni kya aabru
'mir' dilli se nikalne gae lucknow tum kahan jaoge hum kahan jaenge

hai bahut andhiyar ab suraj nikalna chahiye

hai bahut andhiyar ab suraj nikalna chahiye
jis tarah se bhi ho ye mausam badalna chahiye
roz jo chehre badalte hai libason ki tarah
ab janaza zor se un ka nikalna chahiye
ab bhi kuchh logo ne bechi hai na apni aatma
ye patan ka silsila kuchh aur chalna chahiye
phul ban kar jo jiya hai wo yahan masla gaya
zist ko faulad ke sanche mein dhalna chahiye
chhinta ho jab tumhaara haq koi us waqt to
aankh se aansu nahin shoala nikalna chahiye
dil jawan sapne jawan mausam jawan shab bhi jawan
tujh ko mujh se is samay sune mein milna chahiye

guzarte waqt ko buniyaad karne wala hun

guzarte waqt ko buniyaad karne wala hun
jo sab bhulate hain wo yaad karne wala hun
main wo nahin hun ki fariyaad karne wala hun
sukut ko sukhan-ijad karne wala hun
andheri raat aur us par mere charagh ka zoam
ujadti bazm ko aabaad karne wala hun
main apna kar-e-wafa aazmaunga phir bhi
kahan main tere sitam yaad karne wala hun
main andalib hun ek gulshan-e-mohabbat ka
so main bhi kuchh mere sayyaad karne wala hun

ehsas ke sukhe patte bhi armanon ki chingari bhi

ehsas ke sukhe patte bhi armanon ki chingari bhi
ek dil sine mein tuta sa aur fitrat mein dildari bhi
mast umangon ke jhonke aur faqa masti ka aalam
hasrat ki tez hawaen bhi ummid ki aatish-bari bhi
dil par khole udne ke liye udne ka magar imkan kahan
roken pairon ki zanjiren pinjre ki chaar-diwari bhi
dekha na tujhe ai rab hum ne han duniya teri dekhi hai
sadkon par bhuke bachche bhi kothe par abla nari bhi
behaal na ho yun nadan dil har haal mein jina hai lazim
hai raste mein aasani bhi majburi bhi dushwari bhi
ek khel musalsal gardish ka dekha hai hum ne gulshan mein
phulon ka khil kar murjhana aur kaliyon ki kilkari bhi
manzil pe na pahuncha jab koi ilzam usi par kyun aae
rah-raw ke bhatakne mein hai kuchh rahbar ki zimme-dari bhi
'azim' teri barbaadi mein sab ne mil-jul kar kaam kiya
kuchh khel lakiron ka bhi hai kuchh waqt ki kar-guzari bhi

chahta hun tujhe nabi ki qasam

chahta hun tujhe nabi ki qasam
hazrat-e-murtaza-ali ki qasam
mujhe ghamgin na chhod rota aaj
tujhe apni hansi-khushi ki qasam
saf kah baithiye na ji mein jo ho
aap ko apni sadgi ki qasam
main dilai qasam to kahne lage
hum nahin mante kisi ki qasam
sadqa hota hun jis ghadi mujh ko
yaad aati hai us pari ki qasam
hae kahna wo us ka chupke se
tujhe 'insha' hamari ji ki qasam

bu-e-gul baad-e-saba lai bahut der ke baad

bu-e-gul baad-e-saba lai bahut der ke baad
mere gulshan mein bahaar aai bahut der ke baad
chhup gaya chand to jalwon ki tamanna ubhri
aarzuon ne li angdai bahut der ke baad
nargisi aankhon mein ye ashk-e-nadamat tauba
mauj-e-mai shishon mein lahrai bahut der ke baad
sehn-e-gulshan mein hasin phul khile the kab se
hum hue khud hi tamashai bahut der ke baad
mehr-o-shabnam mein mulaqat hui waqt-e-sahar
zindagi maut se takrai bahut der ke baad
mai-e-gul bat gai aasuda labon mein pahle
tishna kaamon mein sharab aai bahut der ke baad
zehn bhatka kiya dasht-e-gham-e-dauran mein 'salam'
shab-e-gham nind mujhe aai bahut der ke baad

Don't have an account? Sign up

Forgot your password?

Error message here!

Error message here!

Hide Error message here!

Error message here!

OR
OR

Lost your password? Please enter your email address. You will receive a link to create a new password.

Error message here!

Back to log-in

Close