bujhe ho, hath mayusi lagi hai kya

bujhe ho, hath mayusi lagi hai kya
dar-e-ulfat pe ab kundi lagi hai kya
abhi bhi tujh dar-e-dil par bata jaanan
hamare nam ki takhti lagi hai kya
samundar baukhalaya phir raha hai kyun
kinare phir koi kashti lagi hai kya
hamin tum se hamesha milne aaen kyun
tumhaare panw mein mehndi lagi hai kya
kate hain par to katne do miyan socho
iradon par koi qainchi lagi hai kya
jahan kal ishq par charcha hua ghanton
wahin ab husn ki mandi lagi hai kya
hain aankhen surkh lab zakhmi ana ghayal
tere kirdar ki boli lagi hai kya
teri galiyon se jo guzra use jaanan
bhala duniya kabhi achchhi lagi hai kya
yaqinan aaj be-parda wo nikle hain
wagarna chandni phiki lagi hai kya
na duniya hai na uljhan hai sukun hai bas
thikane ab meri mitti lagi hai kya
kitaben ghar mere suraj si raushan hain
tere kamre mein ye batti lagi hai kya
zaban se aah kya uf tak nahin nikli
to ab ke chot kuchh gahri lagi hai kya
mita loge jihaalat ko 'sikandar' tum
tumhein bhi ye nai dhunki lagi hai kya

bedil ka taKHayyul hun na ghaalib ki nawa hun

'bedil' ka takhayyul hun na ghaalib ki nawa hun
is qafila-e-rafta ka naqsh-e-kaf-e-pa hun
raqsan hai charaghan-e-tamanna mere harsu
wo raushaniyan hain ki main sae se juda hun
jab dasht-e-alam se koi jhonka kabhi aaya
main lala-e-khud-raw ki tarah aur khila hun
zulmat-aman bhi hun ujalon ka amin bhi
main subh ke tare ki tarah dub raha hun
aflak-rasi se bhi talafi nahin hoti
kis azm ki an-dekhi chatanon se gira hun
har aks-e-muqabil se numayan hai mera naqsh
duniya mein hun ya aaina-khane mein khada hun
mahdud hai kyun hadd-e-talab tak meri parwaz
main mauj-e-saba ho ke bhi zanjir-ba-pa hun
idrak ke shoalon ka chaman hai mera aahang
main barg-e-khizan ho ke bhi gulzar-numa hun
ehsas ke ghunchon ki chatak hai meri aawaz
main sina-e-afaq mein dhadkan ki sada hun
har chand ki nas nas mein nihan barq-e-tapan hai
khul kar bhi barasta hun ki ghanghor ghata hun
ek ek kiran mein tere sau rang nazar aae
jab pichhle pahar chand ke hamrah chala hun
ek naghma-e-rangin hun lab-e-saz-e-mizha par
'sadiq' jaras-e-ghuncha hun taswir-e-sada hun

be-KHayali mein yunhi bas ek irada kar liya

be-khayali mein yunhi bas ek irada kar liya
apne dil ke shauq ko had se ziyaada kar liya
jaante the donon hum us ko nibha sakte nahin
us ne wada kar liya main ne bhi wada kar liya
ghair se nafrat jo pa li kharch khud par ho gai
jitne hum the hum ne khud ko us se aadha kar liya
sham ke rangon mein rakh kar saf pani ka gilas
aab-e-sada ko harif-e-rang-e-baada kar liya
hijraton ka khauf tha ya pur-kashish kohna maqam
kya tha jis ko hum ne khud diwar-e-jada kar liya
ek aisa shakhs banta ja raha hun main 'munir'
jis ne khud par band husn o jam o baada kar liya

bahar ka dhan aata jata asal KHazana ghar mein hai

bahar ka dhan aata jata asal khazana ghar mein hai
har dhup mein jo mujhe saya de wo sachcha saya ghar mein hai
patal ke dukh wo kya jaanen jo sath pe hain milne wale
hain ek hawala dost mere aur ek hawala ghar mein hai
meri umr ke ek ek lamhe ko main ne qaid kiya hai lafzon mein
jo haara hun ya jita hun wo sab sarmaya ghar mein hai
tu nanha-munna ek diya main ek samundar andhiyara
tu jalte jalte bujhne laga aur phir bhi andhera ghar mein hai
kya swang bhare roti ke liye izzat ke liye shohrat ke liye
suno sham hui ab ghar ko chalo koi shakhs akela ghar mein hai
ek hijr-zada babul piyari tere jagte bachchon se haari
ai shaer kis duniya mein hai tu teri tanha duniya ghar mein hai
duniya mein khapae sal kai aakhir mein khula ahwal yahi
wo ghar ka ho ya bahar ka har dukh ka mudawa ghar mein hai

aaj phir gardish-e-taqdir pe rona aaya

aaj phir gardish-e-taqdir pe rona aaya
dil ki bigdi hui taswir pe rona aaya
ishq ki qaid mein ab tak to umidon pe jiye
mit gai aas to zanjir pe rona aaya
kya hasin khwab mohabbat ne dikhaya tha hamein
khul gai aankh to tabir pe rona aaya
pahle qasid ki nazar dekh ke dil sahm gaya
phir teri surkhi-e-tahrir pe rona aaya
dil ganwa kar bhi mohabbat ke maze mil na sake
apni khoi hui taqdir pe rona aaya
kitne masrur the jine ki duaon pe 'shakil'
jab mile ranj to tasir pe rona aaya

tu apne pindar ki KHabar le ki ruKH hawa ka badal raha hai

tu apne pindar ki khabar le ki rukh hawa ka badal raha hai
teri nazar se bahakne wala fareb kha kar sambhal raha hai
yahi hai dastur-e-shahr-e-hasti ki jo naya hai wahi purana
hayat angdai le rahi hai zamana karwat badal raha hai
rah-e-talab mein junun ne akasr shuur ko aaina dikhaya
jise tha uzr-e-shikasta-pai wo ab sitaron pe chal raha hai
hamein ye tane na do ki hum ne zamana-sazi ke gur na sikhe
ki rafta rafta mizaj-e-duniya hamare sanche mein dhal raha hai
teri adaon ki sadgi mein kisi ko mahsus bhi na hoga
abhi qayamat ka ek karishma haya ke daman mein pal raha hai
kisi mein himmat na thi ki badh kar junun ki zanjir tham leta
khirad ki basti mein hai andhera charagh sahra mein jal raha hai
hazar shewe the guftugu ke hazar andaz the sukhan ke
magar ba-ima-e-dil 'faridi' fida-e-rang-e-ghazal raha hai

Don't have an account? Sign up

Forgot your password?

Error message here!

Error message here!

Hide Error message here!

Error message here!

OR
OR

Lost your password? Please enter your email address. You will receive a link to create a new password.

Error message here!

Back to log-in

Close