ek parwaz dikhai di hai

ek parwaz dikhai di hai
teri aawaz sunai di hai
sirf ek safha palat kar us ne
sari baaton ki safai di hai
phir wahin laut ke jaana hoga
yar ne kaisi rihai di hai
jis ki aankhon mein kati thin sadiyan
us ne sadiyon ki judai di hai
zindagi par bhi koi zor nahin
dil ne har chiz parai di hai
aag mein kya kya jala hai shab bhar
kitni khush-rang dikhai di hai

ek hi muzhda subh lati hai

ek hi muzhda subh lati hai
dhup aangan mein phail jati hai
rang-e-mausam hai aur baad-e-saba
shahr kuchon mein khak udati hai
farsh par kaghaz udte phirte hain
mez par gard jamti jati hai
sochta hun ki us ki yaad aakhir
ab kise raat bhar jagati hai
main bhi izn-e-nawa-gari chahun
be-dili bhi to lab hilati hai
so gae ped jag uthi khushbu
zindagi khwab kyun dikhati hai
us sarapa wafa ki furqat mein
khwahish-e-ghair kyun satati hai
aap apne se ham-sukhan rahna
ham-nashin sans phul jati hai
kya sitam hai ki ab teri surat
ghaur karne pe yaad aati hai
kaun is ghar ki dekh-bhaal kare
roz ek chiz tut jati hai

ehsas-e-na-rasai se jis dam udas tha

ehsas-e-na-rasai se jis dam udas tha
shayad wo us ghadi bhi mere aas pas tha
mahfil mein phul khushiyon ke jo bantta raha
tanhai mein mila to bahut hi udas tha
har zakhm-e-kohna waqt ke marham ne bhar diya
wo dard bhi mita jo khushi ki asas tha
angdai li sahar ne to lamhe chahak uthe
jangal mein warna raat ke khauf o hiras tha
suraj pe waqt ka jo gahan lag gaya 'hanif'
dekha to mujh se saya mera na-shanas tha

duniya meri bala jaane mahngi hai ya sasti hai

duniya meri bala jaane mahngi hai ya sasti hai
maut mile to muft na lun hasti ki kya hasti hai
aabaadi bhi dekhi hai virane bhi dekhe hain
jo ujde aur phir na base dil wo nirali basti hai
khud jo na hone ka ho adam kya use hona kahte hain
nist na ho to hast nahin ye hasti kya hasti hai
ijz-e-gunah ke dam tak hain ismat-e-kaamil ke jalwe
pasti hai to bulandi hai raaz-e-bulandi pasti hai
jaan si shai bik jati hai ek nazar ke badle mein
aage marzi gahak ki in damon to sasti hai
wahshat-e-dil se phirna hai apne khuda se phir jaana
diwane ye hosh nahin ye to hosh-parasti hai
jag suna hai tere baghair aankhon ka kya haal hua
jab bhi duniya basti thi ab bhi duniya basti hai
aansu the so khushk hue ji hai ki umda aata hai
dil pe ghata si chhai hai khulti hai na barasti hai
dil ka ujadna sahl sahi basna sahl nahin zalim
basti basna khel nahin baste baste basti hai
'fani' jis mein aansu kya dil ke lahu ka kal na tha
hae wo aankh ab pani ki do bundon ko tarasti hai

dua karo ki ye pauda sada hara hi lage

dua karo ki ye pauda sada hara hi lage
udasiyon mein bhi chehra khila khila hi lage
wo sadgi na kare kuchh bhi to ada hi lage
wo bhol-pan hai ki bebaki bhi haya hi lage
ye zafrani pullower usi ka hissa hai
koi jo dusra pahne to dusra hi lage
nahin hai mere muqaddar mein raushni na sahi
ye khidki kholo zara subh ki hawa hi lage
ajib shakhs hai naraaz ho ke hansta hai
main chahta hun khafa ho to wo khafa hi lage
hasin to aur hain lekin koi kahan tujh sa
jo dil jalae bahut phir bhi dilruba hi lage
hazaron bhes mein phirte hain ram aur rahim
koi zaruri nahin hai bhala bhala hi lage

dil mein kisi ke rah kiye ja raha hun main

dil mein kisi ke rah kiye ja raha hun main
kitna hasin gunah kiye ja raha hun main
duniya-e-dil tabah kiye ja raha hun main
sarf-e-nigah-o-ah kiye ja raha hun main
fard-e-amal siyah kiye ja raha hun main
rahmat ko be-panah kiye ja raha hun main
aisi bhi ek nigah kiye ja raha hun main
zarron ko mehr-o-mah kiye ja raha hun main
mujh se lage hain ishq ki azmat ko chaar chand
khud husn ko gawah kiye ja raha hun main
daftar hai ek mani-e-be-lafz-o-saut ka
sada si jo nigah kiye ja raha hun main
aage qadam badhaen jinhen sujhta nahin
raushan charagh-e-rah kiye ja raha hun main
masumi-e-jamal ko bhi jin pe rashk hai
aise bhi kuchh gunah kiye ja raha hun main
tanqid-e-husn maslahat-e-khas-e-ishq hai
ye jurm gah gah kiye ja raha hun main
uthti nahin hai aankh magar us ke ru-ba-ru
nadida ek nigah kiye ja raha hun main
gulshan-parast hun mujhe gul hi nahin aziz
kanton se bhi nibah kiye ja raha hun main
yun zindagi guzar raha hun tere baghair
jaise koi gunah kiye ja raha hun main
mujh se ada hua hai 'jigar' justuju ka haq
har zarre ko gawah kiye ja raha hun main

Don't have an account? Sign up

Forgot your password?

Error message here!

Error message here!

Hide Error message here!

Error message here!

OR
OR

Lost your password? Please enter your email address. You will receive a link to create a new password.

Error message here!

Back to log-in

Close