kaise be-soz log ho yaro
kya khabar kis jahan mein rahte ho
mere ehsas ke sharare hain
tum jinhen mere sher kahte ho

hind ke mai-khane se ek sath uthe do baada-khwar
ek ne botal sambhaali ek ne botal phod di
fatiha donon pe donon ne kiya hai intiqal
ek jannat mein makin hai ek ne jannat chhod di hai

bahut dur se ek aawaz aai
main, ek ghuncha-e-na-shagufta hun koi mujhe gudgudae
main takhliq ka naghma-e-jaan-faza hun، mujhe koi gae
main insan ki manzil-e-arzu hun mujhe koi pae
bahut dur se ek aawaz aai
main hathon mein le kar tajassus ki mishal
bahut dur pahuncha sitaron se aage
meri rahguzar kahkashan ban ke chamki
mare sath aai ufuq ke kinare
mere naqsh-e-pa ban gae chand suraj
bhadakte rahe aarzu ke sharare
wo aawaz to aa rahi hai musalsal
magar arsh ki rifaton se utar kar
main farsh-e-yaqin par khada sochta hun
har ek jada-e-rang-o-bu se guzar kar
meri justuju intiha to nahin hai
abhi aur nikhrenge rangin nazare
ye be-nur zarre banenge sitare
sitare banenge abhi mah-pare
ye aawaz jadu jagati rahegi
ye manzil yunhi git gati rahegi
nae aadmi ko nae karwan ko
payam-e-tajassus sunati rahegi

pahli aawaz
ab sai ka imkan aur nahin parwaz ka mazmun ho bhi chuka
taron pe kamanden phenk chuke mahtab pe shab-khun ho bhi chuka
ab aur kisi farda ke liye un aankhon se kya paiman kije
kis khwab ke jhute afsun se taskin-e-dil-e-nadan kije
shirini-e-lab khushbu-e-dahan ab shauq ka unwan koi nahin
shadabi-e-dil tafrih-e-nazar ab zist ka darman koi nahin
jine ke fasane rahne do ab in mein ulajh kar kya lenge
ek maut ka dhanda baqi hai jab chahenge nipta lenge
ye tera kafan wo mera kafan ye meri lahad wo teri hai
dusri aawaz
hasti ki mata-e-be-payan jagir teri hai na meri hai
is bazm mein apni mishal-e-dil bismil hai to kya rakhshan hai to kya
ye bazm charaghan rahti hai ek taq agar viran hai to kya
afsurda hain gar ayyam tere badla nahin maslak-e-sham-o-sahar
thahre nahin mausam-e-gul ke qadam qaem hai jamal-e-shams-o-qamar
aabaad hai wadi-e-kakul-o-lab shadab-o-hasin gulgasht-e-nazar
maqsum hai lazzat-e-dard-e-jigar maujud hai nemat-e-dida-e-tar
is dida-e-tar ka shukr karo is zauq-e-nazar ka shukr karo
is sham o sahar ka shukr karo in shams o qamar ka shukr karo
pahli aawaz
gar hai yahi maslak-e-shams-o-qamar in shams-o-qamar ka kya hoga
ranai-e-shab ka kya hoga andaz-e-sahar ka kya hoga
jab khun-e-jigar barfab bana jab aankhen aahan-posh huin
is dida-e-tar ka kya hoga is zauq-e-nazar ka kya hoga
jab sher ke kheme rakh hue naghmon ki tanaben tut gain
ye saz kahan sar phodenge is kilk-e-guhar ka kya hoga
jab kunj-e-qafas maskan thahra aur jaib-o-gareban tauq-o-rasan
aae ki na aae mausam-e-gul is dard-e-jigar ka kya hoga
dusri aawaz
ye hath salamat hain jab tak is khun mein hararat hai jab tak
is dil mein sadaqat hai jab tak is nutq mein taqat hai jab tak
in tauq-o-salasil ko hum tum sikhlaenge shorish-e-barbat-o-nai
wo shorish jis ke aage zubun hangama-e-tabl-e-qaisar-o-kai
aazad hain apne fikr o amal bharpur khazina himmat ka
ek umar hai apni har saat imroz hai apna har farda
ye sham-o-sahar ye shams-o-qamar ye akhtar-o-kaukab apne hain
ye lauh-o-qalam ye tabl-o-alam ye mal-o-hasham sab apne hain

aaj darwaze khule rahne do
yaad ki aag dahak utthi hai
shayad is raat hamare shohda aa jaen
aaj darwaze khule rahne do
jaante ho kabhi tanha nahin chalte hain shahid?
main ne dariya ke kinare jo pare dekhe hain
jo charaghon ki lawen dekhin hain
wo lawen bolti thin zinda zabanon ki tarah
main ne sarhad pe wo naghmat sune hain ki jinhen
kaun gaega shahidon ke siwa?
main ne honton pe tabassum ki nai tez chamak dekhi hai
nur jis ka tha halawat se sharabor
azanon ki tarah!
abhi sarhad se main lauta hun abhi,
main abhi hanp raha hun mujhe dam lene do
raaz wo un ki nigahon mein nazar aaya hai
jo hama-gir tha nadida zamanon ki tarah!
yaad ki aag dahak utthi hai
sab tamannaon ke shahron mein dahak utthi hai
aaj darwaze khule rahne do
shayad is raat hamare shohda aa jaen!
waqt ke panw ulajh jate hain aawaz ki zanjiron se
un ki jhankar se khud waqt jhanak uthta hai
naghma marta hai kabhi, nala bhi marta hai kabhi?
sansanahat kabhi jati hai mohabbat ke bujhe tiron se?
main ne dariya ke kinare unhen yun dekha hai
main ne jis aan mein dekha hai unhen
shayad is raat,
is sham hi,
darwazon pe dastak denge!
shohda itne subuk-pa hain ki jab aaenge
na kisi soe parinde ko khabar tak hogi
na darakhton se kisi shakh ke girne ki sada gunjegi
phadphadahat kisi zambur ki bhi kam hi sunai degi
aaj darwaze khule rahne do!
abhi sarhad se main lauta hun abhi
par jo guzregi us ka hamein gham hi kyun ho?
par kya guzregi malum nahin
ek shab jis mein
pareshani-e-alam se ruhon pe girani tari
ruhen sunsan yatim
un pe hamesha ki jafaen bhaari
bu-e-kafur agar baste gharon se jari
be-panah khauf mein ruya-e-shikasta ki fughan utthegi
bujhti shamon ka dhuan utthega
par jo guzregi malum nahin
apne darwaze khule rahne do

ye kis ne phone pe di sal-e-nau ki tahniyat mujh ko
tamanna raqs karti hai takhayyul gungunata hai
tasawwur ek nae ehsas ki jannat mein le aaya
nigahon mein koi rangin chehra muskuraata hai
jabin ki chhut padti hai falak ke mah-paron par
ziya phaili hui hai sara aalam jagmagata hai
shafaq ke nur se raushan hain mehraben fazaon ki
surayya ki jabin zohra ka aariz timtimata hai
purane sal ki thithuri hui parchhaiyan simtin
nae din ka naya suraj ufuq par uthta aata hai
zamin ne phir nae sar se naya rakht-e-safar bandha
khushi mein har qadam par aaftab aankhen bichhata hai
hazaron khwahishen angdaiyan leti hain sine mein
jahan-e-arzu ka zarra zarra gungunata hai
umiden dal kar aankhon mein aankhen muskuraati hain
zamana jumbish-e-mizhgan se afsane sunata hai
masarrat ke jawan mallah kashti le ke nikle hain
ghamon ke na-khudaon ka safina dagmagata hai
khushi mujh ko bhi hai lekin main ye mahsus karta hun
masarrat ke is aaine mein gham bhi jhilmilata hai
hamare daur-e-mahkumi ki muddat ghatti jati hai
ghulami ke zamane mein izafa hota jata hai
yahi andaz gar baqi hain apni sust-gami ke
na jaane aur kitne sal aaenge ghulami ke