waqt guzarta nahin

waqt koi sham nahin
jise wahshat se dhanpa ja sake
na koi git, jis ki lai
hamare honton ki giraft mein ho
ye ek la-matanahi la-talluq hai
waqt thahra rahta hai
un zaminon par
jahan se nae qafile nikal padte hain
waqt-guzari ke kathin safar par
guzishta bahut pichhe rah gaya
jahan tak koi sadak nahin jati
gadi ki khat-khat se
shahr ki virani kahan kam hoti hai
muqaffal gharon
aur qahwa-khanon ki bhunbhunahat mein
sari baaten to log karte hain!
kitabon ki jilden, kaghazon ka shor
mobile ke paighamat
aur waqt guzar jata hai
haalanki nahin guzarta
bachchon ko sidhiyan chadha chukne ke baad
dahliz par baith kar
kisi be-samt ufuq ko ghurte hue?
hisab karte hue
un khwabon ka, jo dekhe

kabhi kabhi

kabhi kabhi behad dar lagta hai
ki dosti ke sab rupahle rishte
pyar ke sare sunahre bandhan
sukhi tahniyon ki tarah
chatakh kar tut na jaen
aankhen khulen, band hon dekhen
lekin baaten karna chhod den
hath kaam karen
ungliyan duniya bhar ke qaziye likkhen
magar phul jaise bachchon ke
dagmagate chhote chhote pairon ko
sahaara dena bhul jaen
aur suhani shabnami raaton mein
jab raushniyan gul ho jaen
tare motiya chameli ki tarah mahken
prit ki rit
nibhai na jae
dilon mein kathorta ghar kar le
man ke chanchal sote sukh jaen
yahi maut hai!
us dusri se
bahut ziyaada buri
jis par sab aansu bahate hain
arthi uthti hai
chita sulagti hai
qabron par phul chadhae jate hain
charagh julte hain
lekin ye، ye to
tanhai ke bhayanak maqbare hain
daimi qaid hai
jis ke gol gumbad se
apni chikhon ki bhi
baz-gasht nahin aati
kabhi kabhi behad dar lagta hai

dard tanhai ka

nim ke ped mein atka hua chand
nim ke ped se chhan-chhan ke barasta hua dard
dard yaadon-bhari tanhai ka
dard un yaadon ki ranai ka
dard shabnam ke bayaban mein meri pyas ki zebai ka
dard har lamhe ki jalti hui pinhai ka
ishq-o-ehsas-e-shakebai ka dard
waqt ke chehre pe hai guzri hui sham ki gard
raat ke hath hain sard
nim ke ped se chhan-chhan ke barasta hua dard
aur har dard hai manind
nim ke ped pe atka hua chand

agli rut ki namaz

main chahti hun
ki agli rut mein milun jo tum se
janam janam ki thakawaton ke khutut chehre se mit chuke hon
qadam qadam ek safar ki pichhli alamaten sab guzar chuki hon
malal-e-sahra-nawardi panw ke aablon mein simat chuka ho
musafirat ki tamam ranjish
mere masamon se dhul chuki ho
kisi bhi patthar ka koi dhabba
kisi bhi chaukhat ka koi qarza
meri jabin par rahe na larzan
main chahti hun ki agli rut mein milen jo hum tum
damak raha ho yun mera daman
ki tum jo chaho
namaz padh lo

hum jo tarik rahon mein mare gae

tere honton ke phulon ki chahat mein hum
dar ki khushk tahni pe ware gae
tere haton ki shamon ki hasrat mein hum
nim-tarik rahon mein mare gae
suliyon par hamare labon se pare
tere honton ki lali lapakti rahi
teri zulfon ki masti barasti rahi
tere hathon ki chandi damakti rahi
jab ghuli teri rahon mein sham-e-sitam
hum chale aae lae jahan tak qadam
lab pe harf-e-ghazal dil mein qindil-e-gham
apna gham tha gawahi tere husn ki
dekh qaem rahe is gawahi pe hum
hum jo tarik rahon pe mare gae
na-rasai agar apni taqdir thi
teri ulfat to apni hi tadbir thi
kis ko shikwa hai gar shauq ke silsile
hijr ki qatl-gahon se sab ja mile
qatl-gahon se chun kar hamare alam
aur niklenge ushshaq ke qafile
jin ki rah-e-talab se hamare qadam
mukhtasar kar chale dard ke fasle
kar chale jin ki khatir jahangir hum
jaan ganwa kar teri dilbari ka bharam
hum jo tarik rahon mein mare gae

Don't have an account? Sign up

Forgot your password?

Error message here!

Error message here!

Hide Error message here!

Error message here!

OR
OR

Lost your password? Please enter your email address. You will receive a link to create a new password.

Error message here!

Back to log-in

Close