darwaza koi ghar se nikalne ke liye de

darwaza koi ghar se nikalne ke liye de
be-khauf koi rasta chalne ke liye de
aankhon ko ata khwab kiye shukriya lekin
paikar bhi koi khwabon mein dhalne ke liye de
pani ka hi paikar kisi parbat ko ata kar
ek bund hi naddi ko uchhalne ke liye de
sahmi hui shakhon ko zara si koi mohlat
suraj ki sawari ko nigalne ke liye de
sab waqt ki diwar se sar phod rahe hain
rauzan hi koi bhag nikalne ke liye de
sailab mein saat ke mujhe phenkne wale
tuta hua ek pul hi sambhalne ke liye de
mahfuz jo tartib-e-anasir se hain asrar
to khol ko ek aanch pighalne ke liye de
takhil ko takhliq ki taufiq ata kar
phir pahlu se ek chiz nikalne ke liye de

bhugat raha hun KHud apne kiye ka KHamyaza

bhugat raha hun khud apne kiye ka khamyaza
tapak raha hai jo aankhon se ye lahu taza
kisi ki yaad ke sae ko ham-safar samjha
laga sako to laga lo junun ka andaza
kise majal ki ab mere dil mein ghar kar le
hai garche ab bhi khula apne dil ka darwaza
nigar-e-waqt ne har-su kamand dali hai
bikhar na jae kahin anjuman ka shiraaza
khuda gawah hai un ko bhi de raha hun dua
jo kaste rahte hain 'shakir' pe roz aawaza

charaghon ka gharana chal raha hai

charaghon ka gharana chal raha hai
hawa se dostana chal raha hai
jawani ki hawaen chal rahi hain
buzurgon ka khazana chal raha hai
meri gum-gashtagi par hansne walo
mere pichhe zamana chal raha hai
abhi hum zindagi se mil na pae
taaruf ghaebana chal raha hai
nae kirdar aate ja rahe hain
magar natak purana chal raha hai
wahi duniya wahi sansen wahi hum
wahi sab kuchh purana chal raha hai
ziyaada kya tawaqqoa ho ghazal se
miyan bas aab-o-dana chal raha hai
samundar se kisi din phir milenge
abhi pina-pilana chal raha hai
wahi mahshar wahi milne ka wada
wahi budha bahana chal raha hai
yahan ek madrasa hota tha pahle
magar ab kar-khana chal raha hai

aa gai yaad sham Dhalte hi

aa gai yaad sham dhalte hi
bujh gaya dil charagh jalte hi
khul gae shahr-e-gham ke darwaze
ek zara si hawa ke chalte hi
kaun tha tu ki phir na dekha tujhe
mit gaya khwab aankh malte hi
khauf aata hai apne hi ghar se
mah-e-shab-tab ke nikalte hi
tu bhi jaise badal sa jata hai
aks-e-diwar ke badalte hi
khun sa lag gaya hai hathon mein
chadh gaya zahr gul masalte hi

Don't have an account? Sign up

Forgot your password?

Error message here!

Error message here!

Hide Error message here!

Error message here!

OR
OR

Lost your password? Please enter your email address. You will receive a link to create a new password.

Error message here!

Back to log-in

Close