ek mulaqat

teri tadap se na tadpa tha mera dil lekin
tere sukun se bechain ho gaya hun main
ye jaan kar tujhe kya jaane kitna gham pahunche
ki aaj tere khayalon mein kho gaya hun main
kisi ki ho ke tu is tarah mere ghar aai
ki jaise phir kabhi aae to ghar mile na mile
nazar uthai magar aisi be-yaqini se
ki jis tarah koi pesh-e-nazar mile na mile
tu muskurai magar muskura ke ruk si gai
ki muskurane se gham ki khabar mile na mile
ruki to aaise ki jaise teri riyazat ko
ab is samar se ziyaada samar mile na mile
gai to sog mein dube qadam ye kah ke gae
safar hai shart sharik-e-safar mile na mile
teri tadap se na tadpa tha mera dil lekin
tere sukun se bechain ho gaya hun main
ye jaan kar tujhe kiya jaane kitna gham pahunche
ki aaj tere khayalon mein kho gaya hun main

humne to yahi marka mara hai safar mein

hum ne to yahi marka mara hai safar mein
manzil ki tarah baith gae rahguzar mein
wo sham-e-shab-anjam ki surat to nahin tha
ek pal mein shab-e-nisf utar aai hai ghar mein
ai nala-e-dil-doz tadap utthi khamoshi
hai marg-e-tamasha kisi aabaad nagar mein
hum khak ke tude pe khade puchh rahe hain
kya lutf mila tum ko samundar ke safar mein
hum saya-e-diwar-e-shikasta mein pade the
dhundoge to paoge hamein saya-e-dar mein
ye marhala-e-qat-e-talluq to kathin tha
ek dard ka dariya bhi hai ab dida-e-tar mein
ek umr ke rishton ko fana pal mein mili hai
hum dhundne kya nikle hain sadiyon ke safar mein
tarik-o-khunuk khak ka paiwand hue hain
hum tol ke lae the jinhen lal-o-gohar mein
yun teri tarah dur ki manzil ke musafir
sab kuchh to nahin chhod ke jate kabhi ghar mein

dil chiz kya hai chahiye to jaan lijiye

dil chiz kya hai chahiye to jaan lijiye
par baat ko bhi meri zara man lijiye
mariye tadap tadap ke dila kya zarur hai
sar par kisi ki tegh ka ehsan lijiye
aata hai ji mein chadar-e-abr-e-bahaar ko
aisi hawa mein sar pe zara tan lijiye
main bhi to dost-dar tumhaara hun meri jaan
mere bhi hath se to kabhu pan lijiye
kije sharik hum ko bhi ai dil rawa nahin
yun aap hi aap lazzat-e-paikan lijiye
is apni tang choli pe tuk rahm kije jaan
khamyaza is tarah se na har aan lijiye
gar qabr-e-kushtagan pe tum aae ho to myan
apne shahid-e-naz ko pahchan lijiye
bose ka jo tumhaare gunahgar ho miyan
lazim hai us se bosa hi tawan lijiye
wahshat ke din phir aae hain is nau-bahaar mein
ai chaak-e-jeb phir rah-e-daman lijiye
mushkil nahin hai yar ka phir milna 'mushafi'
marne ki apne ji mein agar than lijiye

tamam umr ki tanhai ki saza de kar

tamam umr ki tanhai ki saza de kar
tadap utha mera munsif bhi faisla de kar
main ab marun ki jiyun mujh ko ye khushi hai bahut
use sukun to mila mujh ko bad-dua de kar
main us ke waste suraj talash karta hun
jo so gaya meri aankhon ko rat-jaga de kar
wo raat raat ka mehman to umr bhar ke liye
chala gaya mujhe yaadon ka silsila de kar
jo wa kiya bhi daricha to aaj mausam ne
pahad dhanp diya abr ki rida de kar
kati hui hai zamin koh se samundar tak
mila hai ghao ye dariya ko rasta de kar
chatakh chatakh ke jali shakh shakh jangal ki
bahut sharar mila aag ko hawa de kar
phir is ke baad pahad us ko khud pukarenge
tu laut aa use wadi mein ek sada de kar
sutun-e-reg na thahra 'adim' chhat ke tale
main dhah gaya hun khud apne ko aasra de kar

Don't have an account? Sign up

Forgot your password?

Error message here!

Error message here!

Hide Error message here!

Error message here!

OR
OR

Lost your password? Please enter your email address. You will receive a link to create a new password.

Error message here!

Back to log-in

Close