fankar

is bhare shahr mein har chiz ki qimat thahri
dard bik jate hain jazbaat bika karte hain
jagmagate hue sikkon ke ewaz duniya mein
kitne shaer hain jo din raat bika karte hain
ek tera shaer-e-khuddar nahin bik sakta
meri mahbub tera pyar nahin bik sakta
mere khakon mein tere husn ki taswiren hain
jumbish-e-zulf teri jumbish-e-lab teri hai
mera haq kya hai jo nilam uthaun in ka
mere ashaar wo daulat hai jo ab teri hai
ab ye sarmaya-e-ashaar nahin bik sakta
meri mahbub tera pyar nahin bik sakta
apne sheron ka chaman nazr kiya hai tujh ko
apna andaz-e-sukhan nazr kiya hai tujh ko
dhadkanen mere jawan dil ki basi hain jis mein
main ne wo fikr wo fan nazr kiya hai tujh ko
kisi fankar ka kirdar nahin bik sakta
meri mahbub tera pyar nahin bik sakta

hum apni mohabbat ka tamasha nahin karte

hum apni mohabbat ka tamasha nahin karte
karte hain agar kuchh to dikhawa nahin karte
ye sach hai ki duniya ki rawish thik nahin hai
kuchh hum bhi to duniya ko gawara nahin karte
ek bar to mehman banen ghar pe hamare
ye un se guzarish hai taqaza nahin karte
duniya ke jhamele hi kuchh aise hain ki un ko
hum bhul to jate hain bhulaya nahin karte
farda pe hain nazren to kabhi haal pe nazren
mazi ko magar mud ke bhi dekha nahin karte
jin mein ki buzurgon ki koi qadr nahin ho
hum aise gharon mein kabhi rishta nahin karte
barish ho ki tufan ho ya aag ka jangal
hum ghar se nikal jaen to socha nahin karte
jo khwab nazar aata hai sarsabz zamin ka
us khwab ki tabir bataya nahin karte
bazar mein bikte nahin wo log umuman
rishton ka jo apne kabhi sauda nahin karte

anmol sahi nayab sahi be-dam-o-diram bik jate hain

anmol sahi nayab sahi be-dam-o-diram bik jate hain
bas pyar hamari qimat hai mil jae to hum bik jate hain
sikkon ki chamak pe girte hue dekha hai shaikh o barhaman ko
phir mere khandar ki qimat kya jab dair o haram bik jate hain
kya sharm-e-khudi kya pas-e-haya ghurbat ki andheri raaton mein
kitne hi butan-e-zohra-jabin ba-dida-e-nam bik jate hain
ye hirs-o-hawa ki manzil hai ai rah-rawo hushyar zara
jab hath rupahle badhte hain rahbar ke qadam bik jate hain
wo sahib-e-ilm-o-hikmat hon ya paikar-e-aql-o-danai
ek mere dil-e-nadan ke siwa sab teri qasam bik jate hain
ye shahr hai shahr-e-zardari kya hoga 'shamim' anjam tera
yan zehn kharida jata hai yan ahl-e-qalam bik jate hain

Don't have an account? Sign up

Forgot your password?

Error message here!

Error message here!

Hide Error message here!

Error message here!

OR
OR

Lost your password? Please enter your email address. You will receive a link to create a new password.

Error message here!

Back to log-in

Close