dard-e-mushtarak

mizha-e-khar pe kis tarah bhala pae qarar
aariz-e-gul pe na jab qatra-e-shabnam thahre
hadsa hai ki dar aai ye masarrat ki kiran
warna is dil pe the tariki-e-gham ke pahre
dard-e-mahrumi-e-jawed hamari qismat
rahat-e-wasl-o-mulaqat ke dar band rahe
sal-ha-sal riwayat ke zindanon mein
kitne biphre hue jazbaat nazar-band rahe
sim-sim-e-sim se khul jate hain uqdon ke pahad
jagmaga uthte hain phulon ke diye sahra mein
ghaza-e-zar se hai rukhsar-e-tamaddun ka nikhaar
dil to ek jins-e-faromaya hai is duniya mein
chadhte suraj ke parastar hain duniya wale
dubte chand ko bin dekhe guzar jate hain
kaun jude mein sajata hai bhala dhul ke phul
shakh ke khar bhi aankhon mein jagah pate hain
tu meri hai ki yahan koi nahin tha mera
main tera hun ki tujhe koi bhi apna na saka
kitni pyari hai suhani hai ye duniya jis mein
tu bhi thukrai gai mujh ko bhi thukraya gaya

bistar aur bawarchi

hazar sadiyon ke safar ke bawajud
bint-e-hawwa ka ye safar to
azal se ab tak
tumhaari khwab-gah aur
dalan ke darmiyan
qaid kar diya gaya hai
na jaane kitne qadam hain
jo tumhaare bistar mein
hunut ho kar pade hue hain
kitni manzilen hain
jo tumhaare bistar par
bawarchi-khane ke darmiyan dafn ho chuki hain

barf pighlegi

barf pighlegi jab pahadon se
aur wadi se kohra simtega
bij angdai le ke jagenge
apni lasai aankhen kholenge
sabza bah niklega dhalanon par
ghaur se dekhna bahaaron mein
pichhle mausam ke bhi nishan honge
konpalon ki udas aaankhon mein
aansuon ki nami bachi hogi

andheri raat ka musafir

jawani ki andheri raat hai zulmat ka tufan hai
meri rahon se nur-e-mah-o-anjum tak gurezan hai
khuda soya hua hai ahrman mahshar-ba-daman hai
magar main apni manzil ki taraf badhta hi jata hun
gham o hirman ki yurish hai masaib ki ghataen hain
junun ki fitna-khezi husn ki khunin adaen hain
badi pur-zor aandhi hai badi kafir balaen hain
magar main apni manzil ki taraf badhta hi jata hun
faza mein maut ke tarik sae thartharaate hain
hawa ke sard jhonke qalb par khanjar chalate hain
guzishta ishraton ke khwab aaina dikhate hain
magar main apni manzil ki taraf badhta hi jata hun
zamin chin-bar-jabin hai aasman takhrib par mail
rafiqan-e-safar mein koi bismil hai koi ghael
taaqub mein lutere hain chatanen rah mein hael
magar main apni manzil ki taraf badhta hi jata hun
ufuq par zindagi ke lashkar-e-zulmat ka dera hai
hawadis ke qayamat-khez tufanon ne ghera hai
jahan tak dekh sakta hun andhera hi andhera hai
magar main apni manzil ki taraf badhta hi jata hun
charagh-e-dair fanus-e-haram qindil-e-rahbani
ye sab hain muddaton se be-niyaz-e-nur-e-irfani
na naqus-e-barhaman hai na aahang-e-huda-khwani
magar main apni manzil ki taraf badhta hi jata hun
talatum-khez dariya aag ke maidan hael hain
garajti aandhiyan biphre hue tufan hael hain
tabahi ke farishte jabr ke shaitan hael hain
magar main apni manzil ki taraf badhta hi jata hun
faza mein shoala-afshan dew-e-istibdad ka khanjar
siyasat ki sananen ahl-e-zar ke khun-chakan tewar
fareb-e-be-khudi dete hue billor ke saghar
magar main apni manzil ki taraf badhta hi jata hun
badi par barish-e-lutf-o-karam neki pe taziren
jawani ke hasin khwabon ki haibatnak tabiren
nukili tez sanginen hain khun-asham shamshiren
magar main apni manzil ki taraf badhta hi jata hun
hukumat ke mazahir jang ke pur-haul naqshe hain
kudalon ke muqabil top banduqen hain neze hain
salasil taziyane bediyan phansi ke takhte hain
magar main apni manzil ki taraf badhta hi jata hun
ufuq par jang ka khunin sitara jagmagata hai
har ek jhonka hawa ka maut ka paigham lata hai
ghata ki ghan-garaj se qalb-e-giti kanp jata hai
magar main apni manzil ki taraf badhta hi jata hun
fana ke aahani wahshat-asar qadmon ki aahat hai
dhuwen ki badliyan hain goliyon ki sansanahat hai
ajal ke qahqahe hain zalzalon ki gadgadahat hai
magar main apni manzil ki taraf badhta hi jata hun

alif laila

thak gai raat masakne laga ghaza ka fusun
sard padne lagin gardan mein hamail banhen
farsh bistar pe bikharne lage afshan ke charagh
muzmahil si nazar aane lagin ishrat-gahen
zindagi kitne hi viranon mein dam tod chuki
ab bhi milti hain magar gham ki fasurda rahen
jis tarah taq mein jal bujhti hain shamon ki qatar
zulmat-e-shab mein jagati hui kashanon ko
ban ke rah jati hai ta-subh patangon ka mazar
khun ke harfon mein tahrir hai diwaron par
in ghisatte hue ajsam ke ambaron mein
dard ke rukh ko palat dene ka maqdur nahin
fikr ghabrai hui phirti hai bazaron mein
umr ek sail-e-ufunat hai badar-ru ki misal
zist ek cha-ba-cha sadta hua gadla pani
jis se sairab hua karte hain khinzir o shaghaal
waqt ki jalti hui rakh se jhulse hue panw
ki ghani chhanw mein baithe hue dil
karb-e-mazi ke giran bojh se dubi nabzen
lakh chahen pe ubharne ka guman la-hasil
ek mauhum si hasrat mein jiye jate hain
nam hi nam masarrat ka liye jate hain
apni be-khwab tamanna ka fasana hai yahi
kal ki shab aur nai aur nai shab hogi
zindagi hogi nai aur kahani bhi nai
sabr ai dost ki zulmat ki ghadi bit gai
thak gai raat masalne laga ghaza ka fusun
sard padne lagin gardan mein hamail banhen

ai dil-e-betab Thahar

tirgi hai ki unmadti hi chali aati hai
shab ki rag rag se lahu phut raha ho jaise
chal rahi hai kuchh is andaz se nabz-e-hasti
donon aalam ka nasha tut raha ho jaise
raat ka garm lahu aur bhi bah jaane do
yahi tariki to hai ghaza-e-rukhsar-e-sahar
subh hone hi ko hai ai dil-e-betab thahar
abhi zanjir chhanakti hai pas-e-parda-e-saz
mutlaq-ul-hukm hai shiraaza-e-asbab abhi
saghar-e-nab mein aansu bhi dhalak jate hain
laghzish-e-pa mein hai pabandii-e-adab abhi
apne diwanon ko diwana to ban lene do
apne mai-khanon ko mai-khana to ban lene do
jald ye satwat-e-asbab bhi uth jaegi
ye giran-bari-e-adab bhi uth jaegi
khwah zanjir chhanakti hi chhanakti hi rahe

Don't have an account? Sign up

Forgot your password?

Error message here!

Error message here!

Hide Error message here!

Error message here!

OR
OR

Lost your password? Please enter your email address. You will receive a link to create a new password.

Error message here!

Back to log-in

Close