subh-dam jo dekha tha
kya hara-bhara ghar tha
dantti hui biwi
bhagte hue bachche
rassiyon ki banhon mein
jhulte hue kapde
bolte hue bartan
jagte hue chulhe
ek taraf ko gudiya ka
adh-bana gharaunda tha
dur ek kone mein
cycle ka pahiya tha
murghiyon ke darbe the
kabuken thin, pinjra tha
tis gaz ke aangan mein
sab hi kuchh to rakkha tha
ek pal mein ye manzar
kyun badal sa jata hai
ek dhuan sa uthta hai
han magar dhundalke mein
kuchh dikhai deta hai
ja-namaz ka kona
jhadiyon mein uljha hai
safha-e-kalam-e-pak
khak par larazta hai
sath aur khabron ke
ye khabar bhi chhapti hai
log is ko padhte hain
baaten hoti rahti hain
kaam chalte rahte hain
embulance edhi ki
bain karti aati hai
sab jali kati lashen
sath le ke jati hai
subh tak sabhi lashen
dafn kar di jati hain
auraton ki bachchon ki
budhon aur jawanon ki
masjidon se hoti hain
barishen azanon ki
la-ilah il-lallah
la-ilaha il-lallah

wo jis ki did mein lakhon masarraten pinhan
wo hasan jis ki tamanna main jannaten pinhan
hazar fitne tah-e-pa-e-naz khak-nashin
har ek nigah khumar-e-shabab se rangin
shabab jis se takhayyul pe bijliyan barsen
waqar jis ki rafaqat ko shokhiyan tarsen
ada-e-laghzish-e-pa par qayamaten qurban
bayaz-rukh pe sahar ki sabahaten qurban
siyah zulfon mein warafta nikhaton ka hujum
tawil raaton ki khwabida rahaton ka hujum
wo aankh jis ke banaw pa khaliq itrae
zaban-e-sher ko tarif karte sharm aae
wo hont faiz se jin ke bahaar lala-farosh
bahisht o kausar o tasnim o salsabil ba-dosh
gudaz jism qaba jis pe saj ke naz kare
daraaz qad jise sarw-e-sahi namaz kare
gharaz wo husn jo mohtaj-e-wasf-o-nam nahin
wo hasan jis ka tasawwur bashar ka kaam nahin
kisi zamane mein is rah-guzar se guzra tha
ba-sad ghurur o tajammul idhar se guzra tha
aur ab ye rah-guzar bhi hai dil-fareb o hasin
hai is ki khak mein kaif-e-sharab-o-sher makin
hawa mein shokhi-e-raftar ki adaen hain
faza mein narmi-e-guftar ki sadaen hain
gharaz wo husn ab is rah ka juzw-e-manzar hai
niyaz-e-ishq ko ek sajda-gah mayassar hai

azizo is ko na ghadiyal ki sada samjho
ye umr-e-rafta ki apni sada-e-pa samjho
baja kahe jise aalam use baja samjho
zaban-e-khalq ko naqqara-e-khuda samjho
na samjho dasht shifa-khana-e-junun hai ye
jo khak si bhi pade phankni dawa samjho
samajh tu kor-sawadon ko ho jo ilm na ho
agar samajh bhi na ho kor-e-be-asa samjho
pade kitab ke qisson mein kya karo dil saf
safa ho dil to ba-az rauzatus-safa samjho
hanse jo wo mere rone pe to saf-e-mizhgan
na samjho tum use diwar-e-qahqaha samjho
nafas ki aamad-o-shud hai namaz-e-ahl-e-hayat
jo ye qaza ho to ai ghafilo qaza samjho
tumhaari rah mein milte hain khak mein lakhon
is aarzu mein ki tum apna khak-e-pa samjho
duaen dete hain hum dil se tegh-e-qatil ko
lab-e-jarahat-e-dil ko lab-e-dua samjho
baha diya mera khun us ne apne kuche mein
usi ko yaro diyat samjho khun-baha samjho
samajh hai aur tumhaari kahun main tum se kya
tum apne dil mein khuda jaane sun ke kya samjho
tumhein hai nam se kya kaam misl-e-aina
jo ru-ba-ru ho use surat-ashna samjho
zahe nasib ki hangam-e-mashq tir-e-sitam
hamare dher ko tum to wo khak ka samjho
nahin hai kam zar-e-khalis se zardi-e-rukhsar
tum apne ishq ko ai 'zauq' kimiya samjho