maut mujh par bar-haq nahin

main marne ke liye paida nahin hua
mujh par kisi qism ka hamla
us muahide ki khilaf-warzi hogi
jis par ek ghaibi hath aur main ne
dastakhat kiye the
aur jis ki ru se
maut mujh par bar-haq nahin thahri thi
zinda rahna ab mera dard-e-sar nahin
main ye fariza
tarikh ko saunp chuka hun
tarikh jo meri ragon mein
zahr ki surat dakhil hui
aur ab amrit ban kar
mere masamon se
qatra qatra tapak rahi hai
maut se meri koi shanasai nahin
main us se darkhwast karunga
wo mere khilaf
kisi sazish mein sharik na ho
ki mere pas
muahide ki jo naql mahfuz hai
us par us ke dastakhat
ba-taur-e-gawah maujud hain

daraKHton par koi patta nahin tha

darakhton par koi patta nahin tha
guzarte raste khamosh the
udte parinde raat ka aaseb lagte the
jahan tak bhi nazar jati thi
un logon ki qabren thin jo paida hi na ho pae
sitare the magar wo aasmanon par huwaida hi na ho pae
khabar ye thi is mitti mein sabza lahlahae ga
yahan wo waqt aaega ki har-su rang honge phul honge raushni hogi
magar ye kaun batlae
ki kaise is andhere mein kami hogi
jo sadiyon se hamari aankh ki putli ka hissa hai
suna hai waqt aage ki taraf jata hai
lekin hum hazaron sal se us ek nuqte par khade hain jis ke niche kuchh nahin hai jis ke upar kuchh nahin hai
tum ne to chauthi jihat bhi dhund li
aur hum pahli jihat ki justuju mein khak ho kar rah gae

Don't have an account? Sign up

Forgot your password?

Error message here!

Error message here!

Hide Error message here!

Error message here!

OR
OR

Lost your password? Please enter your email address. You will receive a link to create a new password.

Error message here!

Back to log-in

Close