is rupahli sharab-e-nurin se
kash main jam-e-sher bhar sakta!
ai shab-e-mah ke muntashir jalwo!
kash main tum ko nazm kar sakta

ek nai nazm kah raha hun main
apne jazbaat ki hasin tafsir
kis mohabbat se tak rahi hai mujhe
dur rakkhi hui teri taswir

tukda ek nazm ka
din bhar meri sanson mein sarakta hi raha
lab pe aaya to zaban katne lagi
dant se pakda to lab chhilne lage
na to phenka hi gaya munh se, na nigla hi gaya
kanch ka tukda atak jae halaq mein jaise
tukda wo nazm ka sanson mein sarakta hi raha