chandni raat mein

aur main chandni raat mein so gaya
dekhta kya hun
phaili hui chandni ke kinare kinare
kai barq-raftar parchhaiyan
jaane kab se taaqub-kunan
samt-e-na-ashna ki taraf hain rawan
aur main aahista aahista aage badha
rahgiron se daman bachata hua
hadd-e-afaq se jab guzarne laga
dekhta kya hun
ek be-karan bahr hai aasman se zamin tak muhit
jis mein har saya-e-tez-rau dub kar
dhaar leta hai bhige ujale ka rup
main bhi duba hun is bahr mein bar-ha
chandni ki jhalak bhi na pai kahin
jism o jaan ki siyahi ubharti rahi
aur har bar tarik mahaul mein
aankh khulti rahi
chandni raat mein!!

chand aur chakor

thi ek aisi raat ki hum donon tanha the
chand bhi hum bhi
chand ye bola
diwane aa baat karen kuchh
hijr ki raat bahut bhaari hai
main to kab se sard pada hun
is nile sahra mein yunhi main sadiyon se aawara hun
aur tanha hun
diwane aa baat karen kuchh
tere dil mein shayad ab tak koi dahakta angara hai
hijr ki thandi rakh ki tah mein shayad koi chingari hai
hijr ki raat bahut bhaari hai
diwane aa baat karen kuchh
main ne socha
main dharti ka rahne wala
ye nile aakash ka basi
mera is ka mel nahin hai
tanhai hai khel nahin hai
main ne ek chaman mein ja kar khushbu ko ye baat batai
chand ka bachna ab mushkil hai
chaar taraf se ghabra ke us ko mar rahi hai phaili hui nili tanhai
khushbu ne li ek angdai
aur ye boli
han bas thodi der hui
shabnam kuchh is se milta-julta
ek paigham sa to lai thi
lekin shaer main kyun jaun
jis ko tanhai dasti ho wo khud aae
main kyun jaun
aakhir mauj-e-hawa aati hai
aur barhana-pa aati hai
main kya karta
main laut aaya
chand judai ke nile sahra mein ab tak aawara tha
aur tanha tha
meri jaanib dekh raha tha
tab main ne do pankh lagae
koi nahin jata to na jae main jata hun
chand akela dar jaega
mar jaega
niche ab ek chandni ki gahri khai hai
aawazon ka ek jangal hai
aur ek dasht-e-tanhai hai
ek sahra-e-ruswai hai
mere thakte bazu mein aur chand mein shayad duri ab bhi utni hi hai
chand abhi tak dur hai mujh se
aur abhi tak
meri jaanib dekh raha hai
aur kahta hai
diwane aa baat karen kuchh
hijr ki raat bahut bhaari hai
tere dil mein shayad ab tak shauq ki koi chingari hai

baiza-e-nur

dur tak
dur phaili hui raat mein
chandni mein nahaya hua
ek shishe ka ghar
baiza-e-nur
us ke diwar-o-dar
tez jaan-soz khushbu ke par
sabz patton se tar
surkh gahre gulabon se bhige hue
os ki narm sanson mein sinche hue
dur tak
dur phaili hui raat mein
chandni ka ye ghar
subh tak raat bhar
mera iman hai
mera imkan hai

Don't have an account? Sign up

Forgot your password?

Error message here!

Error message here!

Hide Error message here!

Error message here!

OR
OR

Lost your password? Please enter your email address. You will receive a link to create a new password.

Error message here!

Back to log-in

Close