kasrat-e-aulad

kasrat-e-aulad se hum is qadar bezar hain
ab to begam se alag rahne ko bhi tayyar hain
ab ye aalam hai ki jas kamre mein bhi dalo nazar
ghar ke har kone mein hain bikhre hoe lakht-e-jigar
apni begam par hue sham-o-sahar hum yun nisar
postaron ki shakl mein rassi pe latka hai wo pyar
jis taraf bhi dekhiye aulad hi aulad hai
khana-abaadi ke baad ab khana-e-barbaad hai
sard aahen dekh kar begam ko hum bharne lage
muskura kar dekhne se in ke hum darne lage
chidchide kuchh is qadar hum ho rahe hain aaj-kal
rakh kai khanjar darmiyan mein so rahe hain aaj-kal
khun ke aansu hum apne haal par rone lage
pahle single ho rahe the ab double hone lage
mujh ko ye dar hai kabhi shaitan bahkane lage
hum miyan-biwi qarib aane se katrane lage
hum kisi taqrib mein hon ya kisi baraat mein
log dar jate hain bachche dekh kar hi sath mein
dekh kar logon ka ghussa kitne ghabrae the hum
apne bachchon ki jagah un ke utha lae the hum
sas bhi ab to hamein kuchh din ko bulwati nahin
aur begam bhi bina bulwae khud jati nahin
is dafa phir jab wiladat ka hua tha silsila
aa gae aaankhon mein aansu main ne ro kar yun kaha
mere ghar mein to bahut pahle hi se bhar-mar hai
aur tu duniya mein aane kai liye tayyar hai
tal de apni wiladat aur kuchh din ke liye
tu ne hum se kaun se badle ye gin gin ke liye
kya kahun haalat apne aaj-kal aise nahin
ab to marne ke liye bhi jeb mein paise nahin
koi bimari agar aa jae to jati nahin
kharch ke dar se hamein to maut bhi aati nahin

karachi ki bus

bus mein latak raha tha koi haar ki tarah
koi pada tha saya-e-diwar ki tarah
sahma hua tha koi gunahgar ki tarah
koi phansa tha murgh-e-giraftar ki tarah
mahrum ho gaya tha koi ek panw se
juta badal gaya tha kisi ka khadaun se
koi pukarta tha meri jeb kat gai
kahta tha koi meri nai paint phat gai
bus mein tamam pardon ki diwar hat gai
rish-e-safed zulf-e-siyah se lipat gai
ek achchha-khasa mard zanane mein ghus pada
goya ki ek chor khazane mein ghus pada
ladies ki safon mein jo chehre the kuchh hasin
un par nazar jamae hue the miyan-matin
shamil musafiron mein the har fan ke maherin
kuchh un mein nazirin the baqi tamash-been
zauq-e-nazar ki shart thi manzar bura na tha
das paise ke ticket mein ye picture bura na tha
gadi mein ek shor tha conductor aage chal
kah de khuda ke waste han thik hai double
kab tak khada rahega sar-e-jada-e-amal
ladne ki aarzu hai to bahar zara nikal
tujh par khuda ki mar ho start kar de bus
do paise aur le le jo daulat ki hai hawas
conductor ab ye kahta tha wo bus chalae kyun
jo bus mein aa gaya hai kare hae hae kyun
jis ko ho jaan aziz meri bus mein aae kyun
aaise hi gul-badan the to paise bachae kyun
thani hai dil mein ab na dabenge kisi se hum
tang aa gae hain roz ki conductori se hum
kahta tha wo kisi se bhi kam-tar nahin hun main
yani kisi ke bap ka naukar nahin hun main
public se kyun darun koi leader nahin hun main
kyun regular chalun mah o akhtar nahin hun main
bus mein khade raho jo mere khair-khwah ho
dekho mujhe jo dur se ibrat-nigah ho
ye bus jo waqai thi kai sal se alil
mushkil se ek ghante mein chalti thi chaar mil
malik ne bhi ye soch ke de di thi is ko dhil
ab is ki zindagi ke hain lamhe bahut qalil
ab to kisi clerk se aachanak ye ja mile
kuchh bima company se hamein bhi sila mile
mumkin na tha ki bus se hamara mile mizaj
jamhuriyat hai hum ko pasand aur ise niraj
mushkil to ye hai bus ka muawin hai kul samaj
aaise mein kya buland ho aawaz-e-ehtijaj
ghabra ke hum to art ki duniya mein kho gae
jab tak maler aaya kai sher ho gae

clerk ka naghma-e-mohabbat

sab raat meri sapnon mein guzar jati hai aur main sota hun
phir subh ki dewi aati hai
apne bistar se uthta hun munh dhota hun
laya tha kal jo double-roti
us mein se aadhi khai thi
baqi jo bachi wo mera aaj ka nashta hai
duniya ke rang anokhe hain
jo mere samne rahta hai us ke ghar mein ghar-wali hai
aur daen pahlu mein ek manzil ka hai makan wo khali hai
aur baen jaanib ek ayyash hai jis ke han ek dashta hai
aur in sab mein ek main bhi hun lekin bas tu hi nahin
hain aur to sab aaram mujhe ek gesuon ki khushbu hi nahin
farigh hota hun nashte se aur apne ghar se nikalta hun
daftar ki rah par chalta hun
raste mein shahr ki raunaq hai ek tanga hai do karen hain
bachche maktab ko jate hain aur tangon ki kya baat kahun
karen to chhichhalti bijli hain tangon ke tiron ko kaise sahun
ye mana in mein sharifon ke ghar ki dhan-daulat hai maya hai
kuchh shokh bhi hain masum bhi hain
lekin raste par paidal mujh se bad-qismat maghmum bhi hain
tangon par barq-e-tabassum hai
baaton ka mitha tarannum hai
uksata hai dhyan ye rah rah kar qudrat ke dil mein tarahhum hai
har chiz to hai maujud yahan ek tu hi nahin ek tu hi nahin
aur meri aankhon mein rone ki himmat hi nahin aansu hi nahin
jun tun rasta kat jata hai aur bandi-khana aata hai
chal kaam mein apne dil ko laga yun koi mujhe samjhata hai
main dhire dhire daftar mein apne dil ko le jata hun
nadan hai dil murakh bachcha ek aur tarah de jata hun
phir kaam ka dariya bahta hai aur hosh mujhe kab rahta hai
jab aadha din dhal jata hai to ghar se afsar aata hai
aur apne kamre mein mujh ko chaprasi se bulwata hai
yun kahta hai wun kahta hai lekin bekar hi rahta hai
main us ki aisi baaton se thak jata hun thak jata hun
pal-bhar ke liye apne kamre ko file lene aata hun
aur dil mein aag sulagti hai main bhi jo koi afsar hota
is shahr ki dhul aur galiyon se kuchh dur mera phir ghar hota
aur tu hoti
lekin main to ek munshi hun tu unche ghar ki rani hai
ye meri prem-kahani hai aur dharti se bhi purani hai

Don't have an account? Sign up

Forgot your password?

Error message here!

Error message here!

Hide Error message here!

Error message here!

OR
OR

Lost your password? Please enter your email address. You will receive a link to create a new password.

Error message here!

Back to log-in

Close