dil chiz kya hai chahiye to jaan lijiye

dil chiz kya hai chahiye to jaan lijiye
par baat ko bhi meri zara man lijiye
mariye tadap tadap ke dila kya zarur hai
sar par kisi ki tegh ka ehsan lijiye
aata hai ji mein chadar-e-abr-e-bahaar ko
aisi hawa mein sar pe zara tan lijiye
main bhi to dost-dar tumhaara hun meri jaan
mere bhi hath se to kabhu pan lijiye
kije sharik hum ko bhi ai dil rawa nahin
yun aap hi aap lazzat-e-paikan lijiye
is apni tang choli pe tuk rahm kije jaan
khamyaza is tarah se na har aan lijiye
gar qabr-e-kushtagan pe tum aae ho to myan
apne shahid-e-naz ko pahchan lijiye
bose ka jo tumhaare gunahgar ho miyan
lazim hai us se bosa hi tawan lijiye
wahshat ke din phir aae hain is nau-bahaar mein
ai chaak-e-jeb phir rah-e-daman lijiye
mushkil nahin hai yar ka phir milna 'mushafi'
marne ki apne ji mein agar than lijiye

dekhiye gul ki mohabbat hamein kya deti hai

dekhiye gul ki mohabbat hamein kya deti hai
bulbul-e-zar ye hasrat se sada deti hai
tum salamat raho zinda hai tumhin se ulfat
hath utha kar tumhein hasrat ye dua deti hai
kya kahun aah mein tum se ki mohabbat kya hai
ye wo shai hai ki jo insan ko mita deti hai
sachchi ulfat bhi ajab chiz hai allah allah
jalwa-e-yar ko har shai mein dikha deti hai
sar-e-taslim tah-e-tegh jhuka de apna
ye sada dil se mere us ki raza deti hai
wae-barbaadi-e-qismat ki pas-e-marg saba
khak ushshaq-e-jafa-kash ki uda deti hai
khana-e-dil mein 'jamila' yahi us ki ulfat
yas-o-arman-o-tamanna ko bitha deti hai

badan pe jis ke sharafat ka pairahan dekha

badan pe jis ke sharafat ka pairahan dekha
wo aadmi bhi yahan hum ne bad-chalan dekha
kharidne ko jise kam thi daulat-e-duniya
kisi kabir ki mutthi mein wo ratan dekha
mujhe mila hai wahan apna hi badan zakhmi
kahin jo tir se ghayal koi hiran dekha
bada na chhota koi farq bas nazar ka hai
sabhi pe chalte samay ek sa kafan dekha
zaban hai aur bayan aur us ka matlab aur
ajib aaj ki duniya ka wyakaran dekha
lutere daku bhi apne pe naz karne lage
unhonne aaj jo santon ka aacharan dekha
jo sadgi hai kuhan mein hamare ai 'niraj'
kisi pe aur bhi kya aisa bankpan dekha

agar wo be-adab hai be-adab likh

agar wo be-adab hai be-adab likh
kabhi jo likh nahin paya wo ab likh
tamazat hirs ki had se badhi hai
samundar khud hua hai tishna-lab likh
ana meri zaban khulne na degi
mujhe tu jitna chahe be-talab likh
kamina sari duniya tere aage
magar apna bhi to nam-o-nasab likh
meri qindil-e-jaan jalti hai shab bhar
zara apni bhi to rudad-e-shab likh
'tapish' tere liye meri dua hai
jo haq tu jaanta hai sab ka sab likh

sirf KHanjar hi nahin aankhon mein pani chahiye

sirf khanjar hi nahin aankhon mein pani chahiye
ai khuda dushman bhi mujh ko khandani chahiye
shahr ki sari alif-lailaen budhi ho chukin
shahzade ko koi taza kahani chahiye
main ne ai suraj tujhe puja nahin samjha to hai
mere hisse mein bhi thodi dhup aani chahiye
meri qimat kaun de sakta hai is bazar mein
tum zulekha ho tumhein qimat lagani chahiye
zindagi hai ek safar aur zindagi ki rah mein
zindagi bhi aae to thokar lagani chahiye
main ne apni khushk aankhon se lahu chhalka diya
ek samundar kah raha tha mujh ko pani chahiye

silsila KHatm hua jalne jalane wala

silsila khatm hua jalne jalane wala
ab koi khwab nahin nind udane wala
ye wo sahra hai sujhae na agar tu rasta
khak ho jae yahan khak udane wala
kya kare aankh jo pathrane ki khwahish na kare
khwab ho jae agar khwab dikhane wala
yaad aata hai ki main khud se yahin bichhda tha
yahi rasta hai tere shahr ko jaane wala
ai hawa us se ye kahna ki salamat hai abhi
tere phulon ko kitabon mein chhupane wala
zindagi apni andheron mein basar karta hai
tere aanchal ko sitaron se sajaane wala
sabhi apne nazar aate hain ba-zahir lekin
ruthne wala hai koi na manane wala
le gain dur bahut dur hawaen jis ko
wahi baadal tha meri pyas bujhane wala

Don't have an account? Sign up

Forgot your password?

Error message here!

Error message here!

Hide Error message here!

Error message here!

OR
OR

Lost your password? Please enter your email address. You will receive a link to create a new password.

Error message here!

Back to log-in

Close