kya kahiye kya rakkhen hain hum tujhse yar KHwahish

kya kahiye kya rakkhen hain hum tujh se yar khwahish
yak jaan o sad tamanna yak dil hazar khwahish
le hath mein qafas tuk sayyaad chal chaman tak
muddat se hai hamein bhi sair-e-bahaar khwahish
ne kuchh gunah hai dil ka ne jurm-e-chashm is mein
rakhti hai hum ko itna be-ikhtiyar khwahish
haalanki umr sari mayus guzri tis par
kya kya rakhen hain us ke ummid-war khwahish
ghairat se dosti ki kis kis se ho je dushman
rakhta hai yari hi ki sara dayar khwahish
hum mehr o raz kyun kar khali hon aarzu se
shewa yahi tamanna fan o shiar khwahish
uthti hai mauj har yak aaghosh hi ki surat
dariya ko hai ye kis ka bos o kanar khwahish
sad rang jalwa-gar hai har jada ghairat gul
aashiq ki ek pawe kyun kar qarar khwahish
yak bar bar na aae us se ummid dil ki
izhaar karte kab tak yun bar bar khwahish
karte hain sab tamanna par 'mir' ji na itni
rakkhegi mar tum ko payan-e-kar khwahish

funun-e-latifa

ai ahl-e-nazar zauq-e-nazar khub hai lekin
jo shai ki haqiqat ko na dekhe wo nazar kya!
maqsud-e-hunar soz-e-hayat-e-abadi hai
ye ek nafas ya do nafas misl-e-sharar kya!
jis se dil-e-dariya mutalatim nahin hota
ai qatra-e-naisan wo sadaf kya wo guhar kya!
shaer ki nawa ho ki mughanni ka nafas ho
jis se chaman afsurda ho wo baad-e-sahar kya!
be-moajaza duniya mein ubhartin nahin qaumen
jo zarb-e-kalimi nahin rakhta wo hunar kya

ek nazm likhna mushkil hai

ise wahi jaanta hai
jis ne ek bachcha jana ho
ya use janm dene se
pahle baha diya ho
donon dukh ek hi hain
jaise tumhein
garm garm jalte hue lohe se
dagha ja raha ho
ya tumhaare jism ko
guda ja raha ho
ek sire se dusre sire tak
andhere aur sannate mein
darwaza ho na koi shigaf
ki aawaz bahar ja sake
bas jaise
ek kund chhuri jo tumhaare hi hathon
tumhaari gardan kat rahi ho
aur is lazzat-amez khud-aziyyati mein
tum khud ko halkan hote hue
dekh rahe ho
lamha-ba-lamha
ek wajud ko
dusre se bahar dhakelna
bahar aaludgiyon ke dher par
dhire dhire
koi nam dene ke liye

ek chehlum par

jamila ab uttho na aansu bahao
nahin waqt rone ka dariyan bichhao
ye duniya hai fani gaya jaane wala
wo rone se wapas nahin aane wala
na be-kar ab tum duhai machao
utho apne ghar mein safai karao
muazzaz muazzaz jo aaenge mehman
bahut nak aur bhaun chadhaengi amman
tum un ke liye jald huqqe mangao
miyan bhag kar chae lipton ki lao
wo sab aa ke izhaar-e-matam karenge
wo baithak mein roenge chae piyenge
sunaenge marhum ke wo fasane
ki lab bolne ko diye hain khuda ne
dulhan ne utara na tha surkh joda
ki dulha ne duniya-e-fani ko chhoda
bahut khub-surat bahut nek tha wo
hazaron jawanon mein bas ek tha wo
namaz ek bhi hargiz na us ne qaza ki
shab o roz karta ibaadat khuda ki
jidhar dekhte hain udhar gham hi gham hai
karen is ka jitna bhi matam wo kam hai
na ro ro ke behaal ho ai dulhan tu
na kar is qadar aah-o-ranj-o-mehan tu
wo jannat mein khushiyan manaega mat ro
wo huron se ab dil lagaega mat ro
jamila khuda ki qasam muskura de
teri be-qarari na hum ko rula de
raziyya zara garm chawal to lana
zakiyya zara thanda pani pilana
bahut khub-surat bahut nek tha wo
hazaron jawanon mein bas ek tha wo
jamila mujhe roghni nan dena
wo firni uthana wo pakwan dena
judai mein us ke hua dil diwana
ki lagta hai achchha na pina na khana
mangao polaw zara aur khala
badhana zara qorme ka piyala
jidhar dekhte hain udhar gham hi gham hai
karen is ka jitna bhi matam wo kam hai
wo nannhi ke zarde mein kishmish hai thodi
bahut der se mangti hai nigodi
wo tukda jigar ka tha aankhon ka tara
hamein apni aulad se bhi tha pyara
pada hai polaw mein ghee dalde ka
khuda tu hi hafiz hai mere gale ka
dulhan se kaho aah itni na roe
be-chaari na be-kar mein jaan khoe
ari botiyan tin salan mein tere
ye chhichhda likha tha muqaddar mein mere
bahut khub-surat bahut nek tha wo
hazaron jawanon mein bas ek tha wo
dulhan ghar mein churan agar hai to lana
nahin to zara khaari botal mangana
na kar bain itne na ro itna pyari
hamare kaleje pe chalti hai aari

banbi

dosti kahan jae?
us ki aastinon se
biphre sanp nikle hain
guth gae hain munh khole
bin wajd karti hai
aur sapera hansta hai

andheri shab se ek la-hasil

andheri shab ke sharmile moattar kan mein us ne kaha wo shakhs
dur uftada lekin mere dil ki tarah raushan hai
jo mere panw ke talwe hatheli ke gulabi gal mein
kanta sa chubhta hai
jo mere jism ki kheti pe barish ka chhalawa hai
wo jis ki aankh ki qatil
hawas ek muntazir lekin na zahir hone wale phul ki manind
bechaini mein rakhti hai mujhe wo
aane wala hai
magar wo shakhs is shab bhi nahin aaya
bhala tuti kalai se
wo sare khwab sab wade mulaqaton ke paimane
kahan sambhlen
bhala be-nur aankhon mein wo surat
jham jhamati tund josh-e-khun se garmi-e-lab tak tamtamati
kis tarah rukti
andheri raat ne
dekha na kuchh sunna hi chaha us ke gosh-e-nazuk aur chashm-e-siyah masum hote hain

Don't have an account? Sign up

Forgot your password?

Error message here!

Error message here!

Hide Error message here!

Error message here!

OR
OR

Lost your password? Please enter your email address. You will receive a link to create a new password.

Error message here!

Back to log-in

Close