ahmaqon ki conference

ek khabar hum ne padhi thi kal kisi akhbar mein
ahmaqon ka ek jalsa tha kahin bazar mein
har namune ka chughad hazir tha is darbar mein
jaise har type ka aashiq kucha-e-dildar mein
tha har ek mehman yahan na-khwanda o khud-sakhta
koi un mein sahib-e-dil tha koi dil-bakhta
sab se pahle ek bada ahmaq hua yun shoala-bar
gentleman and ladies aar what ewer yu aar
aaj aasab-e-watan par aql-o-danish hain sawar
khatm hota ja raha hai ahmaqon ka eqtidar
ahmaqo jago tumhaari aabru khatre mein hai
jis ke sakin ho wo shahr-e-arzu khatre mein hai
har himaqat ka koi mafhum hona chahiye
kyun himaqat ki gai malum hona chahiye
aadmi ko aql se mahrum hona chahiye
kya zarurat hai huma ki bum hona chahiye
is liye hum ne banaya hai ye manifesto
man tera ahmaq bagoyam tu mera ahmaq bago
bhulti jati hai duniya ab ye qaul-e-mustanad
aql chun pukhta shawad insan ahmaq mi shawad
fitratan ahmaq ho jo insan nahin hota wo bad
wo himaqat sab se achchhi kuchh nahin ho jis ki had
kuchh sahi ek khar mohabbat us ka nasabulein hai
wo bhi us insan se achchha hai jo business-main hai
ab raha ye masala kapde nahin hain apne pas
is ke bare mein resolution kiya jaega pas
atlas o kim-khwab ko hum nahin aaenge ras
sab se achchha hai ki pahnen log patton ka libas
nariyal aur kele ka pata ho ya ingir ka
qudrati ho pairahan har paikar-e-taswir ka

iblis ki majlis-e-shura

iblis
ye anasir ka purana khel ye duniya-e-dun
sakinan-e-arsh-e-azam ki tamannaon ka khun
is ki barbaadi pe aaj aamada hai wo karsaz
jis ne is ka nam rakha tha jahan-e-kaf-o-nun
main ne dikhlaya farangi ko mulukiyat ka khwab
main ne toda masjid-o-dair-o-kalisa ka fusun
main ne nadaron ko sikhlaya sabaq taqdir ka
main ne munim ko diya sarmaya dari ka junun
kaun kar sakta hai is ki aatish-e-sozan ko sard
jis ke hangamon mein ho iblis ka soz-e-darun
jis ki shakhen hon hamari aabiyari se buland
kaun kar sakta hai is nakhl-e-kuhan ko sar-nigun
pahla mushir
is mein kya shak hai ki mohkam hai ye iblisi nizam
pukhta-tar is se hue khoi ghulami mein awam
hai azal se in gharibon ke muqaddar mein sujud
in ki fitrat ka taqaza hai namaz-e-be-qayam
aarzu awwal to paida ho nahin sakti kahin
ho kahin paida to mar jati hai ya rahti hai kham
ye hamari sai-e-paiham ki karamat hai ki aaj
sufi-o-mulla mulukiyyat ke bande hain tamam
tab-e-mashriq ke liye mauzun yahi afyun thi
warna qawwali se kuchh kam-tar nahin ilm-e-kalam
hai tawaf-o-haj ka hangama agar baqi to kya
kund ho kar rah gai momin ki tegh-e-be-niyam
kis ki nau-midi pe hujjat hai ye farman-e-jadid
hai jihad is daur mein mard-e-musalman par haram
dusra mushir
khair hai sulatani-e-jamhur ka ghaugha ki shar
tu jahan ke taza fitnon se nahin hai ba-khabar
pahla mushir
hun magar meri jahan-bini batati hai mujhe
jo mulukiyat ka ek parda ho kya is se khatar
hum ne khud shahi ko pahnaya hai jamhuri libas
jab zara aadam hua hai khud-shanas-o-khud-nigar
karobar-e-shahryari ki haqiqat aur hai
ye wajud-e-mir-o-sultan par nahin hai munhasir
majlis-e-millat ho ya parwez ka darbar ho
hai wo sultan ghair ki kheti pe ho jis ki nazar
tu ne kya dekha nahin maghrib ka jamhuri nizam
chehra raushan andarun changez se tarik-tar
tisra mushir
ruh-e-sultani rahe baqi to phir kya iztirab
hai magar kya is yahudi ki shararat ka jawab
wo kalim-e-be-tajalli wo masih-e-be-salib
nist paighambar wa-lekin dar baghal darad kitab
kya bataun kya hai kafir ki nigah-e-parda-soz
mashriq-o-maghrib ki qaumon ke liye roz-e-hisab
is se badh kar aur kya hoga tabiat ka fasad
tod di bandon ne aaqaon ke khemon ki tanab
chautha mushir
tod is ka rumat-ul-kubra ke aiwanon mein dekh
aal-e-ceaser ko dikhaya hum ne phir ceaser ka khwab
kaun bahr-e-rum ki maujon se hai lipta hua
gah baalad-chun-sanobar gah nalad-chun-rubab
tisra mushir
main to is ki aaqibat-bini ka kuchh qail nahin
jis ne afrangi siyasat ko kya yun be-hijab
panchwan mushir iblis ko mukhatab kar ke
ai tere soz-e-nafas se kar-e-alam ustuwar
tu ne jab chaha kiya har pardagi ko aashkar
aab-o-gil teri hararat se jahan-e-soz-o-saz
ablah-e-jannat teri talim se dana-e-kar
tujh se badh kar fitrat-e-adam ka wo mahram nahin
sada-dil bandon mein jo mashhur hai parwardigar
kaam tha jin ka faqat taqdis-o-tasbih-o-tawaf
teri ghairat se abad tak sar-nigun-o-sharmsar
garche hain tere murid afrang ke sahir tamam
ab mujhe un ki farasat par nahin hai e'tibar
wo yahudi fitna-gar wo ruh-e-mazdak ka buruz
har qaba hone ko hai is ke junun se tar tar
zagh dashti ho raha hai ham-sar-e-shahin-o-chargh
kitni surat se badalta hai mizaj-e-rozgar
chha gai aashufta ho kar wusat-e-aflak par
jis ko nadani se hum samjhe the ek musht-e-ghubar
fitna-e-farda ki haibat ka ye aalam hai ki aaj
kanpte hain kohsar-o-murgh-zar-o-juebar
mere aaqa wo jahan zer-o-zabar hone ko hai
jis jahan ka hai faqat teri siyaadat par madar

makr-o-riya

'haali' rah-e-rast jo ki chalte hain sada
khatra unhen gurg ka na dar sheron ka
lekin un bhediyon se wajib hai hazar
bhedon ke libas mein hain jo jalwa-numa

Don't have an account? Sign up

Forgot your password?

Error message here!

Error message here!

Hide Error message here!

Error message here!

OR
OR

Lost your password? Please enter your email address. You will receive a link to create a new password.

Error message here!

Back to log-in

Close