arsh ke tare toD ke laen kawish log hazar karen

arsh ke tare tod ke laen kawish log hazar karen
'mir' ki baat kahan se paen aakhir ko iqrar karen
aap ise husn-e-talab mat samjhen na kuchh aur shumar karen
sher ek 'mir' faqir ka hum jo aap ke gosh guzar karen
aaj hamare ghar aaya lo kya hai jo tujh pe nisar karen
illa khinch baghal mein tujh ko der talak hum pyar karen
kab ki hamare ishq ki naubat qais se aage ja pahunchi
rasman log abhi tak us marhum ka zikr azkar karen
durj-e-chashm mein ashk ke moti le jaane hain un ke huzur
chokha rang lahu ka de kar aur unhen shahwar karen
din o dil o jaan sab sarmaya jis mein apna sarf hua
ishq ye karobar nahin kya aur jo karobar karen
jitne bhi dil-rish hain us ke sab ko name bhej bula
us be-mehr wafa dushman ki yaadon ka darbar karen

ajab hai rang-e-chaman ja-ba-ja udasi hai

ajab hai rang-e-chaman ja-ba-ja udasi hai
mahak udasi hai baad-e-saba udasi hai
nahin nahin ye bhala kis ne kah diya tum se
mein thik-thak hun han bas zara udasi hai
main mubtala kabhi hota nahin udasi mein
main wo hun jis mein ki khud mubtala udasi hai
tabib ne koi tafsil to batai nahin
bahut jo puchha to itna kaha udasi hai
gudaz qalb khushi se bhala kisi ko mila
azim wasf hi insan ka udasi hai
shadid dard ki ru hai rawan rag-e-jaan mein
bala ka ranj hai be-intiha udasi hai
firaq mein bhi udasi bade kamal ki thi
pas-e-visal to is se siwa udasi hai
tumhein mile jo khazane tumhein mubarak hon
meri kamai to ye be-baha udasi hai
chhupa rahi ho magar chhup nahin rahi meri jaan
jhalak rahi hai jo zer-e-qaba udasi hai
mujhe masail-e-kaun-o-makan se kya matlab
mera to sab se bada masala udasi hai
falak hai sar pe udasi ki tarah phaila hua
zamin nahin hai mere zer-e-pa udasi hai
ghazal ke bhes mein aai hai aaj mahram-e-dard
sukhan ki odhe hue hai rida udasi hai
ajib tarah ki haalat hai meri be-ahwal
ajib tarah ki be majra udasi hai
wo kaif-e-hijr mein ab ghaaliban sharik nahin
kai dinon se bahut be-maza udasi hai
wo kah rahe the ki shair ghazab ka hai 'irfan'
har ek sher mein kya gham hai kya udasi hai

Don't have an account? Sign up

Forgot your password?

Error message here!

Error message here!

Hide Error message here!

Error message here!

OR
OR

Lost your password? Please enter your email address. You will receive a link to create a new password.

Error message here!

Back to log-in

Close