tujh se hi kya wafa ki nahin khush-nigah chashm
jitne safed-posh hain sab hain siyah-chashm
us mehr-wash ke hone na de girya ru-ba-ru
jab tak safed howe na manind-e-mah chashm
andher hai dayar-e-mohabbat mein ham-daman
taqsir dil ki thahre kare jo gunah chashm
donon makan ghair se khali hain aa ke baith
tere pasand khwah ye dil aae khwah chashm
us ki shab-e-firaq mein itna tu ro ki ho
dariya-e-ashk mein teri kashti tabah chashm
mujh ko jala ke khak kya aur baha diya
tum se to ye na thi mujhe ai ashk-o-ah chashm
'joshish' wo kaun sa hai jafa-kar jis par aaj
munh par lahu male hue hai dad-khwah chashm

sham se un ke tasawwur ka nasha tha itna
nind aai hai to aankhon ne bura mana hai

'mir' un nim-baz aankhon mein
sari masti sharab ki si hai

aankh kam-bakht se us bazm mein aansu na ruka
ek qatre ne duboya mujhe dariya ho kar

rone ki ye shiddat hai ki ghabra gain aankhen
ashkon ki ye kasrat hai ki tang aa gain aankhen

dil sakht hi kafir ka par aankhon mein haya hai
sunte hi jafa ka gila sharma gain aankhen [...]

dilon ka zikr hi kya hai milen milen na milen
nazar milao nazar se nazar ki baat karo